२६ चैत (२०८२), काठमाडौं । नेकपा (एमाले)का अध्यक्ष एवं पूर्व प्रधानमन्त्री केपी शर्मा ओली रिहा हुनुभएको छ । 
अध्यक्ष ओलीलाई जेनजी आन्दोलन घटनाको छानबिन गर्न गठित उच्चस्तरीय जाँचबुझ आयोगको प्रतिवेदनलाई आधार बनाई अनुसन्धानका लागि भन्दै सरकारद्वारा प्रतिशोधपूर्ण र पूर्वाग्रह राखेर गैरकानुनी रुपमा चैत १४ गते पक्राउ गरिएको थियो । 
सोही प्रतिवेदनका आधारमा पूर्व गृहमन्त्री तथा नेपाली कांग्रेसका नेता रमेश लेखकलाई पनि प्रहरीले पक्राउ गरेको थियो । 
अध्यक्ष ओली र नेता लेखकका तर्फबाट दायर भएका बन्दी प्रत्यक्षीकरण रिटको सुनुवाइ गर्दै सर्वोच्च अदालतले हिरासतमा राख्न म्याद थप भएको अन्तिम दिन आज(विहीबार)सम्म अनुसन्धान पूरा गरी हिरासतमुक्त गर्न आदेश दिएको थियो । 
अध्यक्ष ओली पक्राउ परेदेखि नै अस्पतालमा उपचाररत हुनुहुन्थ्यो । उहाँ रिहापछि पनि उपचारका लागि केही दिन अस्पतालमा रहनुहुने छ । 
हिरासतमुक्त हुनुभए लगत्तै अध्यक्ष ओलीले सामाजिक सञ्जालबाट आफ्नो रिहाइकालागि आवाज उठाउने सबैप्रति आभार व्यक्त गर्नुभएको छ । 
उहाँले सरकारले आफूलाई पूर्वाग्रह र प्रतिशोधपूर्णरूपमा फौजदारी अभियोग लगाई १३ दिनसम्म गैरकानुनी नियन्त्रणमा राखे पनि मुद्दा चलाउने आधार र प्रमाण नपुगेपछि अन्ततः आफू रिहा भएको उल्लेख गर्नुभएको छ ।
अध्यक्ष ओलीले सामाजिक सञ्जाल फेसबुकमा लेख्नुभएको छ–
सरकारले पूर्वाग्रह र प्रतिशोधपूर्ण रूपमा फौजदारी अभियोग लगाई १३ दिनसम्म गैरकानुनी नियन्त्रणमा राखे पनि मुद्दा चलाउने आधार र प्रमाण नपुगेपछि अन्ततः म रिहा भएको छु।