नेकपा (एमाले) को सातौँ राष्ट्रिय महाधिवेशन २०५९ माघ १८–२२ गतेसम्म धनुषाको जनकपुरमा सम्पन्न भएको थियो । एकातिर राजाले शासन आफ्नो हातमा लिएको र अर्कातिर माओवादीले जनयुद्ध का नाममा उग्रवामपन्थी क्रियाकलाप अघि बढाएर पार्टीमाथि प्रहार केन्द्रित गरिरहेको बेला प्रजातन्त्र, शान्ति र समग्र विकास, प्रतिगमनविरुद्ध अग्रगामी निकास भन्ने मूलनाराका महाधिवेशन आयोजना भएको थियो ।

महाधिवेशनमा कमरेड केपी शर्मा ओलीद्वारा प्रस्तुत पार्टी जीवनको लोकतान्त्रीकरणसम्बन्धी अवधारणा सामयिक भए पनि तत्कालीन नेतृत्वको अरुचिका कारण स्थगन गर्नुपरेको थियो भने कमरेड शंकर पोखरेलद्वारा प्रस्तुत संविधानसभाको निर्वाचनसम्बन्धी अवधारणलाई पनि पारित गरिएन ।

२०५६ बैशाख १३ गते अध्यक्ष मनमोहन अधिकारीको चुनाव प्रचार अभियानका क्रममै दुःखद निधन भएपछि स्थगनमा रहेको अध्यक्ष पद महाधिवेशनबाट खारेज गरिएको थियो र सातौँ महाधिवेशनले कमरेड माधवकुमार नेपाललाई पार्टीको एक मात्र पदाधिकारीका रुपमा महासचिव निर्वाचित गरेको थियो ।

यही अवधिमा तत्कालीन राजा ज्ञानेन्द्रले २०६१ माघ १९ गते प्रतिगामी कदम चाल्दै सम्पूर्ण शासन आफ्नो हातमा लिएपछि पार्टीको ध्यान जनआन्दोलन उठाउनमा केन्द्रित रह्यो र २०६३ बैशाख ११ गते राजाले आन्दोलनसामु घुँडा टेके । माओवादीलाई शान्तिपूर्ण राजनीतिमा ल्याउन अन्तरिम संविधान निर्माण र संविधानसभाको निर्वाचन जस्ता विषयमा पार्टीको नेतृत्वदायी भूमिका रह्यो ।

२०६४ चैत २८ गते नेपालमा पहिलो पटक आयोजित संविधानसभाको निर्वाचनमा नेकपा (एमाले) ले अपेक्षित सफलता हासिल गर्न सकेन र तत्कालीन महासचिव माधवकुमार नेपालले आफ्नो पदबाट राजीनामा दिनुभयो । केन्द्रीय कमिटीको बैठकले रिक्त महासचिव पदमा झलनाथ खनाललाई चयन ग¥यो ।

नेकपा (एमाले) सातौँ महाधिवेशनबाट निर्वाचित केन्द्रीय कमिटी (मनोनयनसहित) २०५९ माघ १८–२२, जनकपुर