detail-img

परराष्ट्र नीतिका सम्बन्धमा राष्ट्रिय सहमति आवश्यक

काठमाडौं । नेकपा (एमाले) का अध्यक्ष केपी शर्मा ओलीले वर्तमान सरकारले अन्तर्राष्ट्रिय सम्बन्धलाई सुमधुर राख्न नसकेको वताउनु भएको छ ।

परराष्ट्र मामिलाबारे पूर्वराजदूतसँग २०७९ असार ७ गते राजधानीमा भएको अन्तरक्रियामा अध्यक्ष ओलीले विगतमा अन्तर्राष्ट्रिय सम्बन्ध र प्रधानमन्त्रीको विदेश भ्रमणका सन्दर्भमा प्रतिपक्ष र विज्ञहरूसँग सल्लाह हुने प्रचलन रहेपनि अहिले तोडिएको बताउनु भयो ।

अध्यक्ष ओलीले परराष्ट्र नीतिका सम्बन्धमा राष्ट्रिय सहमति आवश्यक हुने बताउनु भयो ।

उहाँले भन्नुभयो , ‘हामी जहिले पनि प्रधानमन्त्री विदेश भ्रमणमा जाँदा जानु अघि छलफल गथ्र्यौं, भ्रमणका विषयमा परामर्श हुन्थ्यो । तर, अहिले त्यस्तो हुन छाडेको छ । सरकार एकलौटी ढंगले चलेको छ ।

अध्यक्ष ओलीले बाह्य राष्ट्रसँगको सम्बन्धको सञ्चालन राष्ट्रिय हितमा रहेर केन्द्रित हुन्छ भन्ने ठान्नुपर्ने बताउनुभयो ।

नेपाल कुनै पनि छिमेकी राष्ट्रविरुद्ध प्रयोग हुन नहुने बताउँदै अध्यक्ष ओलीले छिमेकी देशहरूसँगको सम्बन्ध भरपर्दाे र विश्वसनीय हुनुपर्ने धारणा राख्नुभयो ।

उहाँले भन्नुभयोे, ‘हामीले द्वैध चरित्र देखाउन हुँदैन । अन्तर्राष्ट्रिय सम्बन्धको सवालमा हामीले कुनै कार्ड खेल्नुपर्दैन । कुनै छिमेकीका विरुद्ध अरु कसैसँग भित्रभित्र साँठगाँठ गर्ने अनि बाहिर अर्कै कुरा गर्ने काम राम्रो होइन ।’

अध्यक्ष ओलीले आफ्नो भूभाग फिर्ता चाहियो भन्नुलाई अर्घेल्याइँको रुपमा बुझ्न नहुने बताउँदै कालापानी, लिपुलेक र लिम्पियाधुरा सुगौली सन्धिपछि १४६ वर्षसम्म नेपालले भोगचलन गरेको हाम्रो भूभाग हामीले फिर्ता पाउनुपर्छ भन्नुभयो ।

लोकप्रिय समाचार

cpnuml

गण्डकी प्रदेशका मुख्यमन्त्रीलाई राजिनामा दिन उपमहासचिव गुरुङको सुझाव 


पोखरा । नेकपा (एमाले) गण्डकी प्रदेश संसदीय दलले बजेटमाथि छलफल सुरू नगर्ने हो भने मुख्यमन्त्रीले राजीनामा दिनुपर्ने माग राखेको छ । 
गण्डकी प्रदेश एमाले संसदीय दलले बुधबार पत्रकार सम्मेलन गरी मुख्यमन्त्रीको राजीनामा माग गरेको हो । 
गण्डकी प्रदेशका पूर्व मुख्यमन्त्री एवं प्रदेश सभाका प्रमुख प्रतिपक्षी दलका नेता पृथ्वीसुब्बा गुरुङले यस्तो माग गर्नुभएको हो । 
उहाँले पत्रकार सम्मेलनमा गण्डकी प्रदेश सभामा तत्काल बजेट सत्र सुचारु गर्न माग गर्नुभयो ।  
गण्डकी प्रदेशसभा अनिश्चितकालका लागि स्थगित गरिएको र आफूहरूले खोल्न गरेको आग्रहलाई अस्वीकार गरेकाले पत्रकार सम्मेलन गरी यस्तो माग गरेको बताउनुभयो । 
असार १ मा अर्थमन्त्री रामजी बरालले बजेट प्रस्तुत गरेपछि छलफल स्थगित छ । त्यसो त ५ असारमा छलफल सुरु गर्ने भनिए पनि सत्ता गठबन्धनभित्रैको विवादका कारण छलफल रोकिएको हो । 
‘सभामा बजेट प्रस्तुत गरेर सत्ता पक्षले नै अनिश्चितकालका लागि सदन स्थगित गर्ने काम गैरसंसदीय हो,’ एमाले उपमहासचिव समेत रहनुभएको गुरुङले भन्नुभयो, ‘लोकतान्त्रिक परिपाटी अनुसार सरकारलाई चल्न आग्रह गर्दछु ।’ 
उहाँले बजेटमाथि छलफल गराउन पनि नसक्ने र मुख्यमन्त्रीलाई पनि मन्त्रीले नमान्ने कुरा लोकतान्त्रिक नहुने बताउनुभयो ।  
‘मुख्यमन्त्रीले भनेको नमान्ने मन्त्रीलाई तत्काल  हटाउन र त्यो पनि नसक्ने हो भने आफैँ राजीनामा दिन म मुख्यमन्त्रीलाई सुझाव दिन्छु,’ उहाँले भन्नुभयो ।

cpnuml

थारु समुदायसँगको सहमति कार्यान्वयनमा पार्टी गम्भीर छः अध्यक्ष ओली 


काठमाडौँ । थारु कल्याणकारी सभाका पदाधिकारीले पार्टी अध्यक्ष केपी शर्मा ओलीसँग भेट गरी सरकारसँग भएका छ बुँदे सम्झौता कार्यान्वयनका लागि सकारात्मक भूमिका निर्वाह गरिदिन आग्रह गरेका छन् । 
पार्टी कार्यालय च्यासलमा भेट गरी उनीहरूले पूर्व प्रधानमन्त्री ओलीसँग यस्तो आग्रह गरेका हुन् ।  
भेटमा अध्यक्ष ओलीले थारू कल्याणकारी सभाका मागप्रति आफू सकारात्मक रहेको बताउनु भएको थियो । 
आफू प्रधानमन्त्री हुँदादेखि नै थारू समुदायका मागप्रति सकारात्मक रहेको भन्दै आगामी दिनमा पनि ती माग पूरा गर्ने सन्दर्भमा आफू र आफ्नो पार्टीले सक्दो सकारात्मक भूमिका निर्वाह गर्ने बताउनु भएको थियो । 
‘म अहिले होइन, पहिलादेखि नै तपाईँहरूको मागप्रति सकारात्मक छु,’ उहाँले भेटमा भन्नभयो, ‘म प्रधानमन्त्री हुँदा नै तपाईँहरूसँग छ बुँदे सहमति भएको हो । त्यसैले म अहिले प्रधानमन्त्री नभए पनि तपाईँहरूका माग सम्वोधनका लागि निरन्तर लड्ने छु ।’ 
थारू कल्याणकारी सभाले लोकसेवा लगायतका सरकारी निकायहरूमा थारु क्लस्टर छुट्याउनुपर्ने, समावेशी सिद्धान्त अनुसार जनसंख्याको अनुपातमा ६.६ प्रतिशत कोटाको माग सम्वोधन हुनुपर्ने जस्ता माग उनीहरूका छन् । 
समावेशी सिद्धान्त अनुसार जनसंख्याको अनुपातमा ६.६ प्रतिशत कोटाको माग गर्दै अहिले सर्वोच्च अदालतमा मुद्धा दायर भएको छ । उक्त विधेयकमा थारूहरूले पहल गरिदिन पनि आग्रह गरेका थिए ।  
जवाफमा अध्यक्ष ओलीले समावेशी सिद्धान्त अनुसार जनसंख्याको अनुपातमा ६.६ लाई सात प्रतिशत गर्न सकिने तर छ प्रतिशतमा झार्न नमिल्ने तथ्यको समेत ध्यानाकर्षण गराउँदै अदातलले पनि थारूहरूका पक्षमा न्याय गर्नेमा आफू आशावादी रहेको बताउनुभयो ।  
थारू कल्याणकारी सभाले २०७८ चैत १६ गते प्रधानमन्त्री शेरबहादुर देउवालाई तत्कालीन प्रधानमन्त्री केपी शर्मा ओलीका पालामा सरकारसँग थारु कल्याणकारी सभा÷थरुहट÷थारुवान संयुक्त सङ्घर्ष समितिसँग भएको छ बुँदे सहमति कार्यान्वयनको माग गर्दै ज्ञापनपत्र बुझाएको थियो ।  
ज्ञापनपत्रमा सात प्रतिशत थारू आरक्षणको व्यवस्था साथै विगतमा मुक्त कमैया तथा कमलरी लगायत थारूसँग भएको सम्पूर्ण सहमति कार्यान्वयन गर्न माग गरेको थियो । 
ज्ञापनपत्र बुझाउन एमाले सांसद गंगा चौधरीसहित थारू कल्याणकारी सभाका तर्फबाट महामन्त्री प्रेमीलाल चौधरी, कन्नुलाल चौधरी, कुछतनारायण चौधरी, सुमन चौधरी लगायत च्यासल पुग्नुभएको थियो ।  
भेटपछि प्रेमीलालले अध्यक्ष ओली थारूहरूका मागमा सकारात्मक रहेको भन्दै उहाँ गम्भीर ढङ्गले आफ्नो कार्यकालमा भएका सम्झौता कार्यान्वयनका लागि पहल गरिरहने बचनबद्धता व्यक्त गरेको बताउनुभयो । 
‘पूर्वप्रधानमन्त्री ओली हाम्रा माग सम्वोधन गर्ने सन्दर्भमा निकै सकारात्मक पायौँ,’ उहाँले भन्नुभयो, ‘हामी माग सम्वोधन हुनेमा आशावादी छौँ ।’ 
छ बुँदेमा संविधानमा उल्लेखित व्यवस्था र सम्मानित सर्वोच्च अदालतको फैसला अनुसार राज्यका हरेक तह र तप्कामा थारूहरूको आरक्षणको व्यवस्था तथा सबैखाले थारू समुदायको बारेमा संविधान अनुरूपको व्याख्या र व्यवस्था कायम गर्ने, संविधान बमोजिम थारूभाषी बाहुल्य क्षेत्रमा प्राथमिक तहसम्मको शिक्षा मातृभाषामा पठन–पाठनको व्यवस्था गर्ने, कमैया, कमलरी सङ्घर्ष समितिसँग विगतमा सरकारले गरेको सहमति कार्यान्वयन गर्ने, थरूहट÷थारूवान आन्दोलनका क्रममा सहिद भई राहत प्राप्त गर्न छुटेका परिवारलाई राहत उपलब्ध गराउने, सहिद परिवारको उचित व्यवस्थापन गर्ने, घाइतेहरूको उपचार गर्नेलगायत छन् ।      

 

cpnuml

मेसिनबाट धान रोपेपछि अध्यक्ष ओलीले भन्नुभयो– ‘धानका लागि नेपालको जमिन उत्तम छ’

 

भक्तपुर । नेकपा (एमाले) का अध्यक्ष केपी शर्मा ओली १९ औँ राष्ट्रिय धान दिवस तथा रोपाईं महोत्सवमा सहभागी हुनुभएको छ ।

 पार्टीको जनसंगठन अखिल नेपाल किसान महासंघले भक्तपुरको सिरूटारमा आयोजना गरेको कार्यक्रममा अध्यक्ष ओली प्रमुख अतिथिको रूपमा सहभागी भई करीब १५ मिनेट मेसिनबाट धान रोप्नुभएको थियो ।

अध्यक्ष ओलीसँगै पत्नी राधिका शाक्य र अखिल नेपाल किसान महासंघका अध्यक्ष डा. प्रेम दंगालसहितका नेता कार्यकर्ताहरू रोपाईंमा सहभागी हुनुभएको थियो ।

रोपाईं कार्यक्रममा संक्षिप्त सम्वोधन  गर्दै अध्यक्ष ओलीले ६० प्रतिशत जनता कृषिमा निर्भर रहेको अवस्थामा धान आयात गर्नुपर्ने कुरा सकारात्मक नभएको बताउनुभयो ।

‘बहुसंख्यक जनता कृषिमा निर्भर भए पनि हाम्रो अवस्था भने आयातमा भर पर्नुपर्ने छ,’ उहाँले भन्नुभयो, ‘यो सकारात्मक होइन । यो स्थिति हाम्रा लापर्वाही, असावधानी र प्रयास नगरेको कारण भएको हो ।’

 उहाँले आगामी दिनमा उत्पादन बृद्धिको बाटोबाट, जमिन खेर जान नदिने माध्यमबाट, कृषिको आधुनिकीकरण गर्नुपर्नेमा जोड दिनुभयो ।

 ‘सही योजनाका साथ काम गरे धान उत्पादनमा नेपालले फड्को मार्न सक्छ,’ उहाँले भन्नुभयो, ‘नेपाल कृषि प्रधान देश हो र नेपालको मुख्य खाद्यान्न बाली भनेको धान हो । धानका लागि नेपालको जमिन उत्तम छ । हामीसँग समथर तराई र उर्वर माटो छ, त्यसै गरेर यहाँको हावापानी उत्तम छ धानको लागि,’ ओलीले भन्नुभयो ।

cpnuml

कृषि र पर्यटनलाई जोडेर नेपालको अर्थतन्त्र माथि उठाउन सकिन्छः महासचिव पोखरेल

 

ललितपुर । आज असार १५ गते राष्ट्रिय धान दिवस । यस अवसरमा आज देशभर रोपाईं विशेष कार्यक्रमहरू आयोजना गरिएको छ ।

नेकपा (एमाले) का जनसंगठन अखिल नेपाल किसान महासंघ र राष्ट्रिय युवा संघ नेपालले उपत्यकाका ललितपुर र भक्तपुरमा विशेष रोपाईं कार्यक्रम आयोजना गरे ।

अखिल नेपाल किसान महासंघले भक्तपुरको सिरूटारमा पार्टी अध्यक्ष केपी शर्मा ओलीको प्रमुख आतिथ्यतामा १९ औँ राष्ट्रिय धान दिवस तथा रोपाई महोत्सवको आयोजना गरेको छ भने ललितपुरमा राष्ट्रिय युवा संघ नेपालले आयोजना गरेको रोपाईं विशेष कार्यक्रमको प्रमुख आतिथ्यता महासचिव शंकर पोखरेलले गर्नुभयो ।    

ललितपुरको फर्सीडोल, बुङमतीमा आयोजित कार्यक्रमलाई सम्वोधन गर्दै महासचिव शंकर पोखरेलले कृषि र पर्यटनलाई जोडेर नेपालको अर्थतन्त्रलाई माथि उठाउन सक्ने बलियो आधार रहेको बताउनु भयो । 

‘कृषि र पर्यटनलाई जोड्ने हो भने नेपालको भविष्यको सम्भावना छ,’ पोखरेलले भन्नुभयो, ‘नेपालको कृषिलाई आत्मनिर्भर बनाउने र आयात प्रतिस्थापन गर्ने विन्दुमा पुर्याउने मात्रै होइन निर्यात गर्न सक्ने क्षेत्रका रूपमा पनि विकास गर्न सकिन्छ ।’

उहाँले अहिले पनि नेपालले कृषि पैदावार समेत आयात गर्नुपर्ने अवस्था रहेको स्मरण गराउनुभयो ।

‘अब त्यसलाई बदल्न जरुरी छ । त्यसका लागि यन्त्र उपकरण र आधुनिक बीउ–बिजनको माध्ययमबाट खेती प्रणाली अगाडि बढाउन र कृषिका माध्यमबाट उत्पादकत्व बढाउन आवश्यक छ,’ उहाँले भन्नुभयो, ‘स्वस्थकर खाना कहाँ पाइन्छ ? भन्दा नेपालमा भन्ने विकास गर्न सकियो भने हाम्रो पर्यटन उद्योग पनि फस्टाएर जान्छ भन्ने मान्यताका आधारमा अब नेपालका युवा कृषिमा फर्किनुपर्छ र राष्ट्र निर्माणको आधारका रूपमा अगाडि बढाउनुपर्छ ।’

पोखरेलले असार १५ लाई नेपाल सरकारले नेपालमा धान खेतीलाई  प्रवद्र्धन गर्ने दिवसका रूपमा मनाउने गरेको भन्दै नेपालको सँस्कृतिलाई हेर्ने हो भने पनि असार १५ एउटा विशेष पर्व अर्थात् मानो रोपेर मुरी उब्जाउने पर्वका रूपमा नेपाली समुदायमा प्रचलित रहेको बताउनुभयो ।

‘यो पर्वलाई हामीले कृषिको आधुनिकीकरण र व्यवसायीकरणसँगै राष्ट्रिय सङ्कल्पसँग जोडेर कृषिका माध्ययमबाट नेपाली समाजको रूपान्तरण गर्ने योजनातर्फ अगाडि बढ्नुपर्छ,’ उहाँले भन्नुभयो, ‘कृषिमा रहेको परम्परागत तरिकालाई क्रमशः आधुनिकीकरण गर्नुपर्ने आवश्यकता छ ।’

उहाँले पछिल्लो समय प्रकृतिसँग बदलाव आइरहेको भन्दै त्यससँग जुध्न प्रकृतिमैत्री उत्पादनमा पनि जोड दिनुपर्ने बताउनुभयो ।

‘त्यसमा पनि जैविक उत्पादनमा हामीले जोड दिनुपर्ने अवस्था छ,’ पोखरेलले भन्नुभयो, ‘अहिले नेपालको ठूलो युवा जनशक्ति विदेश पलायन भएको छ ।  त्यो जनशक्तिलाई मुलुकभित्र नै राख्न सक्ने सामथ्र्य छ भने त्यो भनेको कृषि नै हो । त्यसैले हामीले युवालाई कृषिमा आत्मनिर्भर बनाई स्वदेशमै फिर्ता ल्याउने कुरामा बढी ध्यान केन्द्रित गर्न आवश्यक छ ।’

उहाँले अहिलेको युवा कृषि प्रणालीबाट अलग भैरहेको अवस्थाबाट गुज्रिरहेको भन्दै फेरि युवालाई कृषि प्रणालीतर्फ फर्काउने कुरामा भूमिका खेल्न जरुरी रहेको बताउनुभयो ।

‘कृषिलाई हामीले आधुनिक तरिकाबाट अगाडि बढाउन खोज्यौँ र कृषिमा प्रविधिको प्रयोग गर्न सक्यौँ भने जति युवा विदेश जानु भएको छ, ती सबै युवालाई कृषिबाटै रोजगारी दिन सकिन्छ,’ उहाँले भन्नुभयो, ‘यो पर्व यही सङ्कल्पका साथ अगाडि बढ्न सकोस् भन्ने शुभकामना व्यक्त गर्न चाहन्छु ।’

cpnuml

लमजुङमा काँग्रेस लगायत विभिन्न दलका १४८ जना एमालेमा

 

 

बेसीसहर । लमजुङमा नेपाली काँग्रेस र अन्य विभिन्न पार्टी परित्याग गरी १४८ जना नेकपा (एमाले) मा प्रवेश गरेका छन् ।

नेपाली काँग्रेस सुन्दरबजार नगरपालिका समितिका पूर्व सभापति द्वारिकाप्रसाद मिश्र, जनता समाजवादी पार्टीका केन्द्रीय सल्लाहकार ऋषिराम पोखरेल, जनता समाजवादी पार्टीका जिल्ला सल्लाहकार लक्ष्मीप्रसाद मिश्र, नेपाली काँग्रेसका क्षेत्रीय प्रतिनिधि शिवकुमारी मिश्र, राष्ट्रिय कर्मचारी संगठन नार्कका केन्द्रीय सदस्य माओवादी सम्बद्ध रामचन्द्र मिश्रलगायत एमाले प्रवेश गर्नु भएको हो । 

नेकपा (एमाले) जिल्ला कमिटी लमजुङले सुन्दरबजारमा २०७९ असार १४ गते आयोजना गरेको पार्टी प्रवेश कार्यक्रममा नेकपा (एमाले) का उपमहासचिव, प्रचार तथा प्रकाशन विभाग प्रमुख पृथ्वीसुब्बा गुरुङले उहाँहरूलाई स्वागत गर्नुभएको थियो ।

उपमहासचिव गुरूङले नवप्रवेशीहरूलाई पार्टीमा सक्रियतापूर्वक काम गर्न अनुरोध गर्दै सक्रियताका आधारमा पार्टीमा विना भेदभाव जिम्मेवारी दिइने बताउनु भयो ।

नेपाली काँग्रेस परित्याग गरी एमालेमा प्रवेश गर्नुभएका द्वारिकाप्रसाद मिश्रले कुनै स्वार्थका लागि नभई आफू बसेको ठाउँ सही नभएका कारण एमालेमा प्रवेश गरेको बताउनुभयो ।

जनता समाजवादी पार्टीका केन्द्रीय सल्लाहकार ऋषिराम पोखरेलले काम गर्ने ठाउँ सही हुनुपर्छ भन्ने उद्देश्य र एमालेलाई राम्रो बनाउनुपर्छ भन्ने लक्ष्यका साथ एमालेमा प्रवेश गर्ने बताउनुभयो ।

कार्यक्रममा नेकपा (एमाले) का केन्द्रीय सदस्यहरू टुका हमाल, जमिन्द्रमान घले, प्रदेश कमिटीका सचिव धनञ्जय दवाडी लगायतको उपस्थिति थियो ।

कार्यक्रम नेकपा (एमाले) जिल्ला कमिटी अध्यक्ष कृष्णप्रसाद अधिकारीको अध्यक्षतामा भएको थियो ।

 

 

 

नेकपा (एमाले) को मोबाइल एप डाउनलोड गर्नुहोस् ।

cpnuml
सम्पर्क

कुनै प्रश्न वा सुझाव भएमा यहाँबाट पठाउनुहोस् ।

https://github.com/igoshev/laravel-captcha