काठमाडौं । नेकपा (एमाले)का अध्यक्ष केपी शर्मा ओलीले गिरी बन्धु टि स्टेटको जग्गा कानुनसम्मत ढङ्गले मन्त्रिपरिषदले सट्टाभर्ना गर्न अनुमति दिएको बताउनुभएको छ ।
झापाको दमकमा आज आयोजना गरिएको नेकपा (एमाले)को कार्यकर्ता भेलालाई सम्बोधन गर्दै अध्यक्ष ओलीले काँग्रेस माओवादी जस्तो आफू कमिसनको लोभमा नपरेको बताउनुभयो ।  
बरु माओवादी र काँग्रेसले गिरी बन्धुकै ७० विगाहा जग्गा हचुवाका भरमा बसपार्क बनाउन दिएको उहाँको भनाइ छ । अध्यक्ष ओलीले भन्नुभयो– गिरी बन्धु टि स्टेट केपी ओलीले खायो भन्छन्, त्यहींँ छ त कसरी खाएँ ?’

माओवादी र कांग्रेसलाई लक्षित गर्दै उहाँले भन्नुभयो– तिनीहरूले एकपटक १९ विगाहा र एक पटक ५१ विगाहा गरेर ७० विगाहा जमिन बिना कानुन टि स्टेटलाई सट्टाभर्ना दिएका हुन् ।’
आफू प्रधानमन्त्री भएका बेला उक्त जग्गा सट्टाभर्नाका लागि टि स्टेटका तर्फबाट निवेदन आएको उहाँले बताउनुभयो । ‘चियाको बोटको आयु ६० देखि ८० वर्ष हुँदो रहेछ । ०२०÷०२१ सालमा लगाएको चियाको बोटको आयु पुगिसकेको थियो,’ अध्यक्ष ओलीले भन्नुभयो– फेरि चिया लगाउनका लागि अरु २० वर्ष पर्खनुपर्ने रहेछ । त्यसैले अर्को जमिन खरिद गरेर यहाँ सहरीकरण गर्न मिल्ने गरी २०७८ साल बैशाख १३ गतेको मन्त्रिपरिषदले निर्णय गरेको हो ।’
आफू देश बनाउने गन्तव्य बोकेर हिंडेको व्यक्ति भएको वताउँदै अध्यक्ष ओलीले राज्यको सम्पत्ति, जनताको सम्पत्ति र सार्जजनिक सम्पत्ति अनधिकृत र गलत ढङ्गले आफ्नो बनाउन कहिल्यै नलागेको र नलाग्ने स्पष्ट गर्नुभयो । 
कार्यक्रममा नेकपा एमालेका सचिव रघुवीर महासेठ, पार्टीका स्थायी कमिटी सदस्य हिक्मत कुमार कार्की, पोलिटव्युरो सदस्य विशाल भट्टराई, प्रतिनिधि सभाका सांसद एलपी साँवा लिम्बुलगायत नेताहरूको सहभागिता थियो ।
यस्तै, अध्यक्ष ओलीले नेकपा (एमाले)को उद्योग, वाणिज्य तथा आपूर्ति विभागले विराटनगरमा गरेको कार्यक्रमलाई सम्बोधन गर्नुहुँदै औद्योगिक विकासका लागि पूर्वाधार निर्माण आवश्यक रहेको बताउनुभयो ।
उहाँले पूर्वाधार निर्माणबाट मुलुकमा औद्योगिक उत्पादन वृद्धि हुने र विकासको गतिले तिब्रता पाउने बताउनुभयो । 
अध्यक्ष ओलीले आफू नेतृत्वको सरकारले पूर्वाधार निर्माणदेखि हरेक क्षेत्रमा अभूतपूर्व काम गरेको स्मरण गर्नुहुँदै एमालेले सरकार छोडेपछि देशको अर्थतन्त्र पूरै तहसनहस भएको बताउनुभयो । 
उहाँले उद्यमीहरूलाई उद्योग स्थापना, भन्सार, कृषिसम्बन्धी समस्या समाधानका लागि एमालेले सदनमा आवाज उठाइरहेको बताउनुभयो ।