सुर्खेत । नेकपा (एमाले) कर्णाली प्रदेश कमिटीको पहिलो अधिवेशन गुलावजंग शाहको अध्यक्षतामा नयाँ नेतृत्व चयन गर्दै सम्पन्न भएको छ । पार्टीका पोलिटव्यूरो सदस्य समेत रहेको शाह ३६९ मत प्राप्त गरी अध्यक्षमा विजयी हुनु भएको हो । अध्यक्षका तीनजना प्रतिस्पर्धीमध्ये मीनबहादुर शाहीले २०७ मत ल्याउनुभएको छ भने प्रकाश रोकायले चार मत प्राप्त गर्नुभएको छ । 
मतदानमा ६०४ मत खसेकोमा ५८० मत सदर भएको थियो भने २४ मत बदर भएको निर्वाचन समितिले जानकारी दिएको छ ।
त्यसैगरी, उपाध्यक्षमा टेकराज पछाईले २४२ मत ल्याएर निर्वाचित हुनुभएको छ भने लाल बहादुर महताराले १७६ मत प्राप्त गर्नुभएको छ । प्रदेश कमिटी सचिवमा ध्रुबबहादुर शाही ४०६ मत प्राप्त गरी विजयी हुनुभयो भने निकटतम प्रतिस्पर्धी रूद्र बहादुर शाहीले १६९ मत ल्याउनुभयो । दुई उपसचिवमा रवीन्द्रराज शर्मा र रमेश बहादुर शाही निर्वाचित हुनुभएको छ । 
त्यस्तै कर्णाली प्रदेशको लेखा समितिको अध्यक्षमा जितबहादुर मल्ल निर्वाचित हुनुभएको छ । कर्णाली प्रदेश कमिटीको अधिवेशन असोज १० गते उद्घाटन समारोहसँगै शुरू भएको थियो । आज समापन कार्यक्रम रहेको छ ।