रुपन्देही । नेकपा (एमाले)का उपाध्यक्ष तथा पूर्व अर्थमन्त्री विष्णुप्रसाद पौडेलले सरकारले कर्मचारीलाई तलब खुवाउनसमेत आन्तरिक ऋण लिनुपरेको अवस्थामा अर्थतन्त्र सम्हाल्ने कुनै उपयुक्त कार्यक्रम अगाडि सार्न नसकेको बताउनुभएको छ ।
आइतबार प्रेस चौतारी रुपन्देहीले बुटवलमा गरेको कार्यक्रममा उहाँले मुलुकमा सङ्कटपूर्ण अवस्था कसरी आयो भन्ने विषयमा ध्यान नदिएर सत्तारुढ गठबन्धन दल कसरी सत्तामा बस्ने र रमाउने भन्ने विषयमै केन्द्रित रहेको बताउनुुभयो । 
‘मुलुकको अर्थतन्त्रको अपरेशन गर्नुपर्नेमा सरकारले सिटामोल पनि दिन नसकेको अवस्था छ, मेजर अपरेशन गर्नपर्ने छ, सिटामोल छैन, अनि चल्छ ? अर्थतन्त्रको बेथितिलाई यो सरकारले अझै बढाएको छ, राजस्वबाट साधारण खर्च चल्न सकेको छैन । आन्तरिक ऋण बढ्दै छ । तलब, सामाजिक सुरक्षा कोष, पेन्सन रोकिइरहेको छ, अर्थतन्त्र गम्भीर मोडमा छ’ उपाध्यक्ष पौडेलले भन्नुभयो । 
प्रधानमन्त्री तथा अर्थमन्त्रीले अर्थतन्त्र सुधार हुँदै छ भनेर गलत बोलिरहेको बताउँदै पौडेलले भन्नुभयो– अन्तर्राष्ट्रिय सहयोग तल झरेको छ ।  पुँजी पलायन भइरहेको छ, व्यवसायीको ढाड भाँच्ने अवस्था सिर्जना हुँदा पनि सरकार मुकदर्शक भएको अवस्था छ ।
नेपाल तस्करी केन्द्रका रूपमा परिचित भएको उपाध्यक्ष पौडेलले बताउनुभयो । उहाँले क्विन्टल सुन प्रकणमा सरकारले उच्चस्तरीय अनुसन्धान आयोग बनाउन आनाकानी गरेको बताउँदै आफूहरूको माग बमोजिम गठन भएको जनाउनुभयो ।
उपाध्यक्ष पौडेलले कोशीमा पटक पटक गठबन्धन दलबाट किर्ते भएको सबै प्रमाणले प्रष्ट पारेको बताउँदै नेपाली कांग्रेसको विद्रोहलाई एमालेले साथ दिएको बताउनुभयो । 
नेकपा (एमाले)का नेता हिक्मत कार्कीले निकास दिन मुख्यमन्त्रीबाट राजीनामा दिएर अहिलेको अवस्था आएको तर सबै किर्ते गरेर थाकेका गठबन्धन दलहरु बाध्य भएर अहिलेको सरकारलाई साथ दिन बाध्य भएको उहाँको भनाइ थियो ।