२८ पुस (२०८१), दाङ । नेकपा (एमाले)का महासचिव शंकर पोखरेलले भूमिहीन सबै दलित परिवारलाई भूमि आयोगसँग जोड्नुपर्ने बताउनुभएको छ । 
आइतबार दाङमा नेपाल उत्पीडित जातीय मुक्ति समाजद्वारा आयोजित कार्यक्रममा बोल्दै महासचिव पोखरेलले सङ्कटग्रस्त दलित समुदायलाई जमिन र घरबासको व्यवस्था राज्यले गर्ने बताउनुभयो । 
संविधानले नै गरेको यो व्यवस्था जिल्ला जिल्लामा भूमि आयोग गठन हुने बित्तिकै कार्यान्वयनमा आउने उहाँले स्पष्ट पार्नुभयो । 
दलित समुदायले आफ्नो सीप र पेसालाई व्यावसायिक बनाउने कुरामा पनि ध्यान दिनुपर्ने बताउँदै अन्यथा जीवन विकासमा नै समस्या पर्ने उहाँले स्पष्ट पार्नुभयो । समाज रूपान्तरणको लागि पनि यो जरुरी रहेको महासचिव पोखरेलले बताउनुभयो । 
दलित समुदायको भोट कहाँ जान्छ भन्ने कुरा मतदानको अघिल्लो दिन मात्र थाहा हुन्छ भन्ने मानसिकताले गर्दा दलित समुदायमा राजनीतिक सशक्तीकरण हुन नसकेको उहाँले बताउनुभयो । दलित समुदाय संगठित हुने हो भने राजनीतिक नेतृत्व विकास हुने महासचिव पोखरेलको धारणा छ । ‘समुदायको नेताको वरिपरि समुदाय संगठित हुनुप‍र्यो, संगठित जीवनमा हामी जति जोडिन सक्छौँ त्यति नै समुदाय सशक्त हुन्छ’, महासचिव पोखरेलले भन्नुभयो । 
देशमा राजनीतिक परिवर्तन भइसकेकाले सामाजिक, आर्थिक र सांस्कृतिक सशक्तीकरण अबको आवश्यकता रहेको उहाँले बताउनुभयो । नेपाली समाज उदार समाज भएकाले सामाजिक रूपान्तरण सजिलै गर्न सकिने विश्वास उहाँले व्यक्त गर्नुभयो । 
महासचिव पोखरेलले अब विभेद अन्त्य र आर्थिक, सामाजिक सशक्तीकरणमा ध्यान केन्द्रित हुनुपर्नेमा जोड दिनुभयो । राज्यले सामाजिक समानताको लागि गर्नुपर्ने सबै काम गरिसकेको भए पनि हाम्रा सांस्कृतिक मान्यतासँग विभेद जोडिएका हुँदा अब सामाजिक र सांस्कृतिक परिवर्तनको क्षेत्रमा काम गर्नुपर्ने उहाँले बताउनुभयो । सामाजिक विभेदबाट मुक्त हुनका लागि आर्थिक रूपमा सबल हुन पनि त्यतिकै जरुरी रहेको महासचिव पोखरेलले बताउनुभयो ।