२८पुस (२०८१), विराटनगर । नेकपा माओवादी केन्द्रका केन्द्रीय सल्लाहकार, पुराना बाम बुद्धिजीवी प्रा.डा. मेदिनीप्रसाद शर्मा नेकपा (एमाले)मा प्रवेश गर्नुभएको छ ।
विराटनगरमा बसेको एमाले कोशी प्रदेश कमिटीको पाँचौँ बैठकमा पुगेर प्रा.डा. शर्मा एमाले प्रवेश गर्नुभएको हो । विराटनगरस्थित पोष्टग्राजुयट क्याम्पसका प्राध्यापक डा. शर्माले माओवादीको औचित्य सकिएको र विघटनको सङ्घारमा रहेको जनाउँदै जनताको लोकप्रिय पार्टी नेकपा (एमाले)मा प्रवेश गरेको बताउनुभयो ।
उहाँले अब सबै कम्युनिष्टहरू नेकपा एमालेमा गोलबन्द भएर नेपाली कम्युनिष्ट आन्दोलन र जनताको हितमा काम गर्नुपर्छ भन्ने आफ्नो निष्कर्ष रहेको उहाँले सुनाउनुभयो । 
प्रा.डा. शर्मालाई नेकपा (एमाले)का उपाध्यक्ष गुरु बराल, स्थायी कमिटी सदस्य तथा कोशी प्रदेश इञ्चार्ज शेरधन राई, स्थायी कमिटी सदस्य भानुभक्त ढकाल, कोशी प्रदेशका मुख्यमन्त्री तथा एमाले स्थायी कमिटी सदस्य हिक्मत कार्की, केन्द्रीय प्रचार तथा प्रकाशन विभाग प्रमुख राजेन्द्र गौतम, कोशी प्रदेश अध्यक्ष घनश्याम खतिवडालगायतले पार्टीमा स्वागत गर्नुभयो ।