काठमाडौं । नेपाल कम्युनिष्ट पार्टी (एमाले)को छैटौं केन्द्रीय कमिटीको बैठक यही मंसिर १४ गतेदेखि मध्यपहाडि (पुष्पलाल) लोकमार्ग केन्द्रित विशेष अभियान (झुलाघाट–चिवाभञ्ज्याङः समृद्धिका लागि सङ्कल्प यात्रा कार्यक्रम सञ्चालन गर्ने निर्णय गरी सम्पन्न भएको छ ।  

अध्यक्ष केपी शर्मा ओलीको अध्यक्षतामा पार्टी केन्द्रीय कार्यालय तुल्सीलाल स्मृति भवन च्यासलमा सम्पन्न बैठकले केही महत्वपूर्ण समसामयिक प्रस्तावहरू पनि पारित गरेको छ । बैठक आरम्भमा अध्यक्ष ओलीले समसामयिक राजनीति र पार्टीको अभिभाराका विषयमा सम्बोधन गर्नुभएको थियो ।

मध्यपहाडि लोकमार्ग केन्द्रित विशेष अभियान यही २०८० मंसिर १४ गते बिहान ८ः३० बजे अध्यक्ष केपी शर्मा ओलीबाट बैतडिको झुलाघाटमा राष्ट्रिय झन्डा झन्डोत्तोलन गरी आरम्भ गरिने भएको छ । 

सो अभियानको सन्दर्भ झल्काउने गरी निश्चित स्मृतिचिन्ह स्थापनासँगै पाँचथरको चिवाभञ्ज्याङमा अभियानको समापन हुनेछ । अध्यक्ष कमरेडको नेतृत्वमा पदाधिकारी, केन्द्रीय निकायका अध्यक्ष/प्रमुखहरू, भूगोल कार्यक्षेत्र नभएका स्थायी कमिटीका सदस्यहरू र तोकिएका व्यक्तिहरू सङ्कल्प यात्राको केन्द्रीय टोलीमा रहनेछन् । 

अभियानको सान्दर्भिकता र सन्देश 

क. हिमाल, पहाड र तराई गरी तीन तह मिलेर बनेको नेपालको भौगोलिक संरचनामा पहाडको विशेष महत्व रहेको छ । पहाडी क्षेत्रले नेपालको सर्वाधिक ठूलो भूभाग समेट्छ । यहाँ जनसङ्ख्याको उल्लेख्य बसोबास रहेको छ । पहाड जैविक विविधताका दृष्टिले समृद्ध छ र जलस्रोतको विकासको सर्वाधिक सम्भावना बोकेको छ । पहाड फलफूल, तरकारी र जडिबुटीजन्य कृषिको भण्डार नै हो । सामाजिक–सांस्कृतिक विविधता र जातीय सद्भाव यस भूभागको विशेषता हो । राजनीतिक परिवर्तन र सामाजिक जागरणका क्षेत्रमा यस भेगले ऐतिहासिक भूमिका खेल्दै आएको छ । यद्यपि, जटिल भौगोलिक संरचना, छरिएका बस्तीहरू, प्राकृतिक विपत्तिको उच्च जोखिम, वन्य जन्तुहरूका कारण कृषि उत्पादनमा ह«ास तथा जलवायु सङ्कट पहाडको विकासका मुख्य चुनौती रहँदै आएका छन् । 

यिनै चुनौती र सम्भावनाहरूलाई ध्यानमा राखेर हाम्रो पार्टीले पहाडी क्षेत्रको विकासका लागि रणनीतिक महत्वका पूर्वाधार निर्माण, शिक्षा, स्वास्थ्य र खानेपानी संरचना एवं विद्युतीकरणलगायत महत्वपूर्ण योजना अगाडि बढाउँदै आएको छ । पुष्पलाल मध्यपहाडी लोकमार्ग र यसमा निर्माणाधीन दसवटा सहरहरू यसका दृष्टान्तहरू हुन् । आज पहाड पूर्वाधार, विद्युतीकरण, खानेपानी र स्वास्थ्य तथा शिक्षामा पहुँचका दृष्टिले उल्लेख्य ढङ्गले रुपान्तरित हुँदै आएको छ ।

तर पनि तीब्र बसाइँसराइँ आज पहाडको मुख्य समस्या बन्न थालेको छ । एकातिर विकासका योजनाहरू पहाड चढ्दै जाने, अर्कातिर पहाडबाट जनसङ्ख्याको ठूलो हिस्सा तराई, सहर हुँदै विदेशिँदै जाने चुनौती आजको हाम्रो अर्थ–राजनीतिको सर्वाधिक जटिल प्रश्न हो । 

 =समस्या कहाँ छन् ? 

= किन पूर्वाधार र उत्पादनको विषय जोडिन सकेको छैन ? 

= हाम्रो विकास र पूर्वाधार निर्माणको ढाँचामा नै पो कुनै समस्या छन् कि ?

=छन् भने समाधान कसरी गर्न सकिन्छ ? 

=र, पहाडलाई विकास र समृद्धिको नमूना कसरी बनाउन सकिन्छ ?

यस अभियानमार्फत् हामी जवाफ खोज्ने कोशिस गर्नेछौं ।

ख. बहुजातीय, बहुभाषिक, बहुसांस्कृतिक र बहुधार्मिक विशेषता हाम्रो समाजको पहिचान हो । यो हाम्रो राष्ट्रिय सामथ्र्य पनि हो । विविधताभित्रको एकता नेपाल राष्ट्रको बलियो आधारशीला हो । अहिले विभिन्न नाममा यस एकतालाई खल्बलाउने, सामाजिक सद्भावलाई कमजोर पार्ने र जनताका बीचमा फाटो ल्याउने प्रयाश देखा पर्न थालेका छन् । यस्ता अतिवादी र सङ्कीर्ण सोचहरू गलत, हानिकारक र अस्वीकार्य छन् । यस अभियानले सामाजिक सद्भाव र राष्ट्रिय एकतालाई बलियो बनाउन योगदान गर्नेछ । 

ग. लोकतन्त्र स्थापनापछिका हाम्रा योजनाबद्ध प्रयासका कारण मुलुकमा विभिन्न क्षेत्रमा महत्वपूर्ण प्रगति हासिल भएका छन् । पूर्वाधार निर्माण, सामाजिक न्याय र रुपान्तरणकारी योजनाका दृष्टिले नेपालले महत्वपूर्ण प्रगति गरेको छ । यस प्रगतिमा आफ्नो गाउँ आफै बनाऊँ जस्ता विकासका नयाँ र जनमुखी अवधारणा, समृद्ध नेपाल सुखी नेपालीको राष्ट्रिय आकाङ्क्षा र छोटो समयमै नेपाललाई मध्यम आय भएको मुलुकमा स्तरोन्नत गर्दै यस शताब्दीको अन्त्यसम्म समुन्नत नेपाल निर्माण गर्ने नेकपा (एमाले)का दीर्घकालीन सोँचको निर्णायक भूमिका छ भन्ने कुरामा हामी गर्व गर्छौं ।

घ. यो वर्ष नेपाल कम्युनिष्ट पार्टी स्थापनाको ७५औं वर्ष हो । ७५ वर्ष अगाडि पुष्पलाल लगायत अग्रजहरूले निर्माण गर्नुभएको यस पार्टीको हीरक वर्ष जस्तो महत्वपूर्ण ‘माइलस्टोन’ उहाँकै नाममा निर्माणाधीन लोकमार्गमा केन्द्रित गरेर अगाडि बढाउनु आफैमा महत्वपूर्ण छ । यसक्रममा नेपाल कम्युनिष्ट पार्टीले गएको ७५ वर्षमा गरेको बलिदानी सङ्घर्ष, खेलेको गौरवशाली भूमिका र यसका नीतिहरूका बारेमा जनस्तरमा स्पष्ट पार्ने तथा राष्ट्रका सामू उत्पन्न बहुआयामिक चुनौतीलाई सामना गर्न बलियो राष्ट्रिय शक्तिको निर्माण गर्न सहयोग पुर्याउनु अभियानको उद्देश्य हुनेछ ।

ङ. हाम्रो पार्टी जनआधारित पार्टी हो । जनता नै हाम्रा मार्गदर्शक हुन् । जनसमर्थन नै हाम्रो सामथ्र्य हो । जनसेवा नै हाम्रो धर्म, हाम्रो सङ्कल्प र उद्देश्य हो । अभियानमा हुने जनसंवादमार्फत् हामी जनताका अनुभूति सुन्नेछौं, सुझावहरू ग्रहण गर्नेछौं र जनताकै साथमा अगाडिका योजनाहरू बारेमा परामर्श गर्नेछौं । यो अभियान जनतालाई सुन्ने र जनताबाट सिक्ने महत्वपूर्ण अभियान पनि हुनेछ ।

च. ‘सम्बन्ध स्थानीय, सन्देश राष्ट्रिय’को मर्म एवं भावनाअनुरुप यात्रा सञ्चालन हुनेछ ।

अभियानको नाम ‘झुलाघाट–चिवाभञ्ज्याङः समृद्धिका लागि सङ्कल्प यात्रा’ रहनेछ ।

अभियानका क्रममा जनसभा, जनभेला तथा भेटघाटहरू, कलेज तथा विद्यालयका विद्यार्थीहरूसँग छलफल, किसानहरूसँग अन्तक्र्रिया, कृषि वैज्ञानिकहरूसँग संवाद, विकास कार्यहरूको अवलोकन र नमूना काम गरिरहेका उद्यमीहरूसँग भेटघाट, ऐतिहासिक, धार्मिक र सांस्कृतिक स्थलहरूको अवलोकन, जनताका अनुभूति, गुनासा र सुझावहरूको सङ्कलन गरिनेछ, आदि ।

१. २०८० कात्तिक १७ गते जाजरकोटको रामीडाँडा केन्द्रबिन्दु भई गएको भूकम्पबाट जाजरकोट र पश्चिम रुकुममा ठूलो मानवीय तथा भौतिक क्षति भएको छ । मुख्यतः जाजरकोटका भेरी नगरपालिका, नलगाड, बारेकोट र कुशे गाउँपालिका तथा  रुकुम पश्चिमका सानी भेरी एवं आठबीसकोट नगरपालिकामा अपूरणीय क्षति भएको छ । भूकम्पमा परी १५३ जनाले ज्यान गुमाएका छन् भने ३७५ जना घाइते भएका छन् । भूकम्पबाट हजारौँ घरहरू भत्किएका छन् । ठूलो सङ्ख्यामा पशु चौपायाको क्षति भएको छ, भण्डारण गरिएको खाद्यान्न नष्ट भएको छ । यस दुःखद् घटनामा परी ज्यान गुमाउनुु हुने सबै नागरिकहरूप्रति भावपूर्ण श्रद्धाञ्जली अर्पण गर्दै यो बैठक शोकाकूल परिवारजनप्रति गहिरो समवेदना व्यक्त गर्दछ । साथै, सम्पूर्ण घाइतेहरूको शीघ्र स्वास्थ्यलाभको कामना गर्दछ ।

भत्केका संरचना पञ्छाउन र तत्काल शीतबाट बचाउनका लागि अस्थायी टहरा बनाएर नागरिकलाई राहत दिनका लागि हाम्रो पार्टीले जाजरकोट र रुकुम पश्चिममा एक हजारभन्दा बढी स्वयम् सेवक परिचालन गरी काम गरिरहेको छ । यो बैठक उद्धार, राहत तथा पुनस्र्थापनाको काममा खट्ने जिफन्ट, अनेरास्ववियु, राष्ट्रिय युवा संघ नेपाल, भूतपूर्व सैनिक तथा प्रहरी सङ्गठन लगायत पार्टी सम्बद्ध जनसङ्गठनहरू र पार्टीका विभिन्न जिल्ला कमिटी एवं सम्पर्क समन्वय कमिटीबाट खटिनुभएका स्वयम्सेवक लगायत पार्टीका नेता–कार्यकर्ताहरूलाई हार्दिक धन्यवाद ज्ञापन गर्दछ । 

२. यतिबेला नेपाली समाजमा अराजकता बढ्दै गएको छ । नेपाली समाजलाई विभिन्न ढङ्गले विभाजित गर्ने र राष्ट्रलाई कमजोर बनाउने शृङ्खलाबद्ध प्रयासहरू भइरहेका छन् । जनताले बलिदान गरेर ल्याएको लोकतान्त्रिक गणतन्त्र र नेपालको संविधानका विरुद्ध समाजलाई दिग्भ्रमित पार्ने, राजनीतिक लेपनको आडमा विभिन्न राजनीतिक अपराधहरूबाट उन्मुक्ति खोज्ने, राजनीतिक नेतृत्वका विरुद्ध निराधार लाञ्छना, गालीगलौज र चरित्रहत्या गर्ने, समाजलाई प्रदुषित पार्ने, जातीय र धार्मिक सहिष्णुतामा खलल पु¥याउने जस्ता अराजक गतिविधिहरू बढिरहेका छन् । यसबीचमा कतिपय ठाउँमा धार्मिक दङ्गाहरू समेत गराइएका छन् । तर यस्ता अराजक क्रियाकलापप्रति गंभीर भएर नियन्त्रणमा लाग्नुको साटो वर्तमान गठबन्धन सरकार त्यस्ता गतिविधिहरूलाई उल्टै बढावा दिइरहेको छ । यसबाट संघीय लोकतान्त्रिक गणतन्त्रात्मक प्रणालीलाई कमजोर बनाउन सरकार स्वयम् सङ्लग्न त छैन भन्ने गंभीर आशङ्का पैदा भएको छ । सत्ता गठबन्धनको स्वार्थका लागि राज्यका निकायहरूमा हस्तक्षेप गर्ने, तिनलाई कमजोर बनाउने र राज्यका निकायको विश्वसनीयता समाप्त पार्ने काम सरकारबाटै भइरहेको छ । यो बैठक लोकतान्त्रिक गणतन्त्रका विरुद्ध भइरहेका अराजक क्रियाकलापहरूको निन्दा गर्दछ, लोकतान्त्रिक गणतन्त्रको रक्षाका लागि दृढ सङ्कल्प व्यक्त गर्दछ र अराजकतालाई प्रोत्साहन गर्ने, आर्थिक मन्दी बढाउँदै लैजाने, सामाजिक वैमनश्यलाई बढावा दिने र राज्यका निकायहरूलाई कमजोर बनाउँदै जनतामा निराशा बढाउने वर्तमान गठबन्धन सरकारको रबैयाप्रति आपत्ति प्रकट गर्दछ । 

३. २०८० कात्तिक २० (७ अक्टोबर, २०२३) मा प्यालेस्टेनी लडाकू सङ्गठन हमासले इजरायलमाथि गरेको आतङ्ककारी हमलामा १४ सय सर्वसाधारणको ज्यान गएको छ भने दुईसय भन्दा बढी बन्धक बनाइएका छन् । त्यस आक्रमणमा परी इजरायलमा  अध्ययन र रोजगारीका क्रममा रहेका १० जना नेपाली युवाको दुखद मृत्यु भएको छ भने एकजनाको अवस्था अझै अज्ञात छ । त्यसपछि इजरायलले  सुरु गरेको प्रतिहिंसामा हजारौँ बालबालिका, बृद्धबृद्धा र निहत्था मानिसहरूको  मृत्यु भएको छ । यस युद्धबाट लाखौँ प्यालेस्टेनी नागरिक घरबारविहीन भएका छन्, विस्थापित भएका छन् । मानवीय कानुन तथा मर्यादाको पूर्ण रुपमा धज्जी उडाइएको छ । प्यालेस्टाइनको गाजा क्षेत्र पूर्ण रुपमा तहसनहस भएको छ । भवनहरू ध्वस्त भएका छन्, अस्पताल र संयुक्त राष्ट्रसंघका कार्यालयसमेत आक्रमणको निशानामा परेका छन् । संयुक्त राष्ट्रसंघले बारम्बार गरेको अविलम्ब युद्धविराम र न्यूनतम मानवीय कानुनको पालनाको अपिललाई वेवास्ता गरिएको छ । इजरायल– हमास युद्धको यस विनाशकारी घटनाले आफ्नो स्वतन्त्र भूमिमा सार्वभौम अधिकार सहित बाँच्न पाउने प्यालेस्टाइनी जनताको अधिकार र चाहनामाथि ठूलो धक्का लागेको छ । युद्ध चर्किँदै जाँदा यसले क्षेत्रीय द्वन्द्वको स्वरुप लिन सक्ने र स्थिति थप भयावह र अनियन्त्रित हुने खतरा बढेको छ । 

१. यो बैठक हाम्रो पार्टीका उपाध्यक्ष, संविधानसभा अध्यक्ष, पूर्व सभामुख एवं इलाम–१ बाट निर्वाचित प्रतिनिधिसभा सदस्य कमरेड सुवासचन्द्र नेम्बाङको गतः भदौ २६ गते भएको असामयिक निधनप्रति गहिरो शोक प्रकट गर्दछ । नेपालको कम्युनिष्ट आन्दोलन, लोकतान्त्रिक आन्दोलन तथा राष्ट्र निर्माणको अभियानमा उहाँको योगदानको यो बैठक उच्च मूल्याङ्कनका साथ स्मरण गर्दछ । उहाँको निधनबाट पार्टीले आफ्नो महत्वपूर्ण धरोहर, लोकतान्त्रिक आन्दोलनले एकजना भरोसायोग्य नेता र परिवारले आफ्ना असल अभिभावक गुमाएको छ । यो बैठक कमरेड सुवासचन्द्र नेम्बाङप्रति भावपूर्ण श्रद्धाञ्जली अर्पण गर्दछ ।    

२. हाम्रो पार्टीका केन्द्रीय सल्लाहकार परिषद् सदस्य कमरेडहरू रामचन्द्र चापागार्ई र भोजराज ढुङ्गेलको हालै भएको दुःखद निधनबाट हाम्रो पार्टी दुखित भएको छ । उहाँहरूले नेपालको कम्युनिस्ट आन्दोलनमा पु¥याउनुभएको योगदानको कदर गर्दै यो बैठक उहाँहरूप्रति भावपूर्ण श्रद्धाञ्जली अर्पण गर्दछ । शोकाकूल परिवारजनमा गहिरो समवेदना प्रकट गर्दछ ।

३. यो बैठक मधेस प्रदेश सङ्गठन कमिटीका तत्कालीन सचिव एवं जीतपुर–सिमरा उपमहानगरपालिकाका पूर्व प्रमुख कमरेड कृष्ण पौडेलको असामयिक निधनप्रति गहिरो दुःख व्यक्त गर्दै उहाँप्रति भावपूर्ण श्रद्धाञ्जली अर्पण गर्दछ । शोकसन्तप्त परिवारजनमा गहिरो समवेदना व्यक्त गर्दछ ।

४. हाम्रो पार्टीका पोलिटब्युरो सदस्य एवं लुम्बिनी प्रदेशका निवर्तमान मुख्यमन्त्री कमरेड लिला गिरीकी ममतामयी आमा केशवकुमारी गिरीको उपचारका क्रममा भएको दुःखद निधनबाट पार्टी दुखित भएको छ । बैठक उहाँप्रति हार्दिक श्रद्धाञ्जली अर्पण गर्दै कमरेड लिला गिरी लगायत शोकसन्तप्त परिवारजनमा गहिरो समवेदना व्यक्त गर्दछ ।

५. हाम्रो पार्टीका केन्द्रीय कमिटी सदस्य कमरेड कोमल ओलीकी ममतामयी आमा दीपा ओलीको २०८० मंसिर २ गते भएको निधनबाट पार्टी दुखित भएको छ । यस दुखद् घडीमा उहाँप्रति श्रद्धाञ्जली अर्पण गर्दै यो बैठक कमरेड कोमल ओली लगायत शोकसन्तप्त परिवारजनमा समवेदना व्यक्त गर्दछ ।

६. यो बैठक केन्द्रीय सल्लाहकार परिषद्का सदस्य कमरेड कुलभक्त शाक्यकी ममतामयी आमाको निधनप्रति गहिरो दुःख व्यक्त गर्दै उहाँप्रति हार्दिक श्रद्धाञ्जली अर्पण गर्दछ र शोकाकुल परिवारजनमा गहिरो समवेदना व्यक्त गर्दछ । केन्द्रीय सल्लाहकार परिषद् सदस्य कमरेड रामचन्द्र आचार्यकी धर्मपत्नी सीता आचार्यको निधनप्रति गहिरो दुःख व्यक्त गर्दै उहाँप्रति भावपूर्ण श्रद्धाञ्जली अर्पण गर्दै शोकाकुल परिवारजनमा हार्दिक समवेदना व्यक्त गर्दछ । त्यसै गरी केन्द्रीय सल्लाहकार परिषद् सदस्य रामचरित्र साहकी श्रीमतीको निधनप्रति दुःख व्यक्त गर्दै उहाँप्रति हार्दिक श्रद्धाञ्जली अर्पण गर्दछ र शोकाकुल परिवारजनप्रति गहिरो समवेदना व्यक्त गर्दछ ।

७. यो बैठक प्रसिद्ध बालसाहित्यकार एवं प्रगतिशील स्रष्टा शान्तदास मानन्धरको निधनप्रति गहिरो दुःख व्यक्त गर्दै नेपाली साहित्यको विकासमा उहाँले गर्नुभएको योगदानको उच्च मूल्याङ्कन गर्दै उहाँप्रति हार्दिक श्रद्धाञ्जली अर्पण गर्दछ ।