२ फागुन (२०८१), काठमाडौं । नेकपा (एमाले)का महासचिव शंकर पोखरेलले सरकारले अध्यादेशहरू सचेततापूर्वक ल्याएको स्पष्ट गर्दै तिनलाई टुङ्गोमा पुर्याइने बताउनुभएको छ । 
महासचिव पोखरेलले अध्यादेशहरू आफैमा कानुन भएकाले कार्यान्वयनमा जानसकिने स्पष्ट गर्दै ती अध्यादेशलाई राज्यका कानुनमा ढालिने दृढता व्यक्त गर्नुभयो । 
नेकपा (एमाले) केन्द्रीय विज्ञान तथा प्रविधि विभागद्वारा आज पार्टी कार्यालयमा आयोजित ‘नेपालका लागि आईसीटी आधारित उद्यमशीलताः आर्थिक समृद्धिको नयाँ बाटो’ विषयक अन्तर्क्रिया कार्यक्रममा सरोकारवालाहरूले अध्यादेशहरूको विरोध भएको सन्दर्भ उठाएपछि त्यस विषयमा स्पष्ट गर्नुभएको हो ।  
महासचिव पोखरेलले सरकारले अध्यादेश मार्फत विभिन्न कानुनी समस्यालाई सम्बोधन गर्ने प्रयास गरेको बताउनुभयो । 
अध्यादेशका सम्बन्धमा विरोधका स्वरहरू सुनिए पनि असफल हुन्छ कि भन्ने नठान्न आग्रह गर्दै महासचिव पोखरेलले भन्नुभयो– यो प्रमुख पार्टीहरूले सचेततापूर्वक गरेको काम हो, त्यस अर्थमा त्यसलाई हामी जसरी पनि टुङ्ग्याउँछौँ, कसैले विरोध गरेर त्यो रोकिनेवाला छैन । 
उहाँले अध्यादेशलाई स्थायी कानुनमा ढाल्न कुनै समस्या नभएको स्पष्ट पार्नुभयो । 
आइसिटीको विकासका लागि शिक्षाको प्रणालीमा नै परिवर्तन गर्नुपर्नेमा जोड दिँदै महासचिव पोखरेलले नेपालमा आइसिटीमा आधारित शिक्षा प्रणाली नै विकास नभएको बताउनुभयो । 
त्यसैले यसका विषयमा यसका विज्ञले नै नेतृत्व लिनुपर्ने उहाँको धारणा छ । महासचिव पोखरेलले भन्नुभयो– नयाँ प्रविधि विकास भइसक्यो तर हामी त्यसमा नै अनविज्ञ छौँ, भएन भन्ने होइन के कसरी गर्ने भन्ने कुरामा जानु पर्दछ । 
आइसिटीलाई प्रयोगमा ल्याउन कर नीतिमा पनि राज्य उदार बन्नुपर्नेमा उहाँले जोड दिनुभयो । यस विषयमा छलफल गरेर आवश्यक नीति बनाउन सकिने महासचिव पोखरेलले प्रष्ट पार्नुभयो । 
सरकारले आइसीटी क्षेत्रलाई प्रवद्र्धन गर्नेगरी नै कानुनमा सुधार गर्न खोजेको उहाँले बताउनुभयो । 
कार्यक्रममा उद्योग मन्त्री दामोदर भण्डारीले आइसीटी क्षेत्र सुशासन र रोजगारी सिर्जनाका सन्दर्भमा ज्यादै महत्वपूर्ण क्षेत्र भएको हुँदा सरकारले यस क्षेत्रलाई महत्व दिइरहेको बताउनुभयो । उहाँले सुशासनलाई प्रभावकारी बनाउन तथा सेवा प्रवाहलाई अनलाईनमार्फत छिटोछरितो र सहज बनाउन आईसीटी क्षेत्रको भूमिकाको चर्चा गर्दै सरोकारवाला पक्षबाट प्राप्त सुझावहरूले नीति निर्माणमा सहयोग पुग्न विश्वास व्यक्त गर्नुभयाृे । 
कार्यक्रमको अध्यक्षता गर्नुभएका पार्टीका केन्द्रीय सदस्य तथा विज्ञान प्रविधि विभाग प्रमुख टंक कार्कीले सहभागीहरूबाट प्राप्त सुझावलाई सङ्कलन गरी पार्टीलाई बुझाउने र त्यो नीति निर्माणको तहमा जाने जानकारी गराउनुभयो । 
कार्यक्रममा विज्ञ प्रा. आर के दाहालले कार्यपत्र प्रस्तुत गर्नुभएको थियो भने आइसीटी क्षेत्रमा काम गरिरहेको एक दर्जनभन्दा बढी संस्थाका प्रतिनिधिहरूले आ–आफ्ना अनुभव सुनाउँदै आइसीटी क्षेत्रको सुधार र प्रबद्र्धनका लागि विभिन्न सुझाव राखेका थिए । कार्यक्रम विभागका सचिव सञ्जीव रोकाहाले सञ्चालन गर्नुभएको थियो ।