१ मङ्सिर (२०८१), काठमाडौं । प्रधानमन्त्री एवं नेकपा (एमाले)का अध्यक्ष केपी शर्मा ओलीमाथि नेकपा माओवादी केन्द्रका अध्यक्ष पुष्पकमल दाहाल प्रचण्डले लगाएको लाञ्छनाप्रति नेकपा (एमाले)ले आपत्ति जनाएको छ ।
नेकपा (एमाले)का परराष्ट्र विभाग प्रमुख रघुवीर महासेठले शनिबार विज्ञप्ति प्रकाशित गरी माओवादी अध्यक्ष दाहालले १४ नोभेम्बरमा द हिन्दूसँगको अन्तर्वार्तामा प्रधानमन्त्री तथा पार्टी अध्यक्ष ओलीले चाइना कार्ड प्रयोग गरे भनि गरेको टिप्पणीको भर्त्सना गर्नुभएको छ ।
सम्माननीय प्रधानमन्त्री केपी शर्मा ओलीको आसन्न चीन भ्रमणको निर्णयलाई ‘चाइना कार्ड प्रयोग’ र ‘अपरिपक्वता’ भनेर लेबल लगाउनु निराधार, गैरजिम्मेवारपूर्ण र नेपालको सार्वभौम छवि र परराष्ट्र नीतिमा गहिरो चोट पु‍र्याउने कार्य भएको विज्ञप्तिमा उल्लेख छ ।
यस्तो कार्य कूटनीतिक प्रोटोकलको सरासर उल्लङ्घन भएको र प्रचण्डको अभिव्यक्तिले नेपालको स्वतन्त्रताको पूर्ण अवहेलना भएको एमालेको ठहर छ । 
‘सार्वभौमसत्ता सम्पन्न राष्ट्र भएकाले नेपाललाई आफ्नो कूटनीतिक संलग्नताका लागि कुनै बाह्य स्वीकृति आवश्यक पर्दैन, प्रधानमन्त्रीको चीन भ्रमणको निर्णय नेपालको स्वतन्त्र परराष्ट्र नीतिको प्रतिबिम्ब हो, झुटो दाबी गरिएको ‘कार्ड कूटनीति’ को जुवा होइन’, विज्ञप्तिमा उल्लेख गरिएको छ । 
प्रचण्डको भनाइले नेपालले आफ्ना दुई मित्र छिमेकी भारत र चीनसँग कायम राखेको सन्तुलनलाई कमजोर बनाउने नेकपा (एमाले)को ठहर छ । नेकपा (एमाले) भारत र चीन दुवै छिमेकी नेपालको विकास र समृद्धिको हिस्सा भएको स्पष्ट पारेको छ । 
प्रचण्डले नेपालको सार्वभौमसत्ता र राष्ट्रिय स्वाभिमानमा आँच पु‍र्याउने आधारहीन आरोप लगाएको एमालेले जनाएको छ । ‘उहाँको भनाइले नेपालको सार्वभौमसत्ताप्रतिको घृणा र राष्ट्रको स्वाभिमानको मूल्यमा राजनीतिक चालबाजी गर्ने प्रवृत्ति झल्काउँछ’, विज्ञप्तिमा उल्लेख छ ।
प्रधानमन्त्री ओलीको सन्तुलित र व्यावहारिक परराष्ट्र नीतिको दृष्टिकोणले नेपालको सार्वभौमसत्ता र राष्ट्रिय हितलाई प्राथमिकतामा राख्दै भारत र चीन दुवैसँग आपसी सम्मान र सहयोगलाई बढवा दिने विज्ञप्तिमा उल्लेख गरिएको छ । 
परराष्ट्र नीति सानोतिनो राजनीतिक झगडाको विषय नभएको नेकपा (एमाले)ले स्पष्ट पारेको छ । माओवादी अध्यक्ष प्रचण्डको भनाइ निराधार मात्रै नभई नेपालको अन्तर्राष्ट्रिय मान्यताका लागि पनि हानिकारक रहेको एमालेले जनाएको छ । नेपालको परराष्ट्र नीति मौलिक रूपमा असंलग्नता, शान्तिपूर्ण सहअस्तित्व र संयुक्त राष्ट्र संघको बडापत्रको सिद्धान्तमा आधारित रहेको एमालेले स्पष्ट पारेको छ । नेकपा (एमाले)ले भारत र चीन दुवैसँग नेपालको सन्तुलित सम्बन्ध कायम गर्ने प्रतिबद्धता दोहो‍र्याउँदै प्रचण्डलाई  आफ्ना गैरजिम्मेवारपूर्ण अभिव्यक्ति फिर्ता लिन र नेपाली जनतासँग माफी माग्न आग्रह गरेको छ ।