विभिन्न जिल्लाबाट २९ जना प्रदेश कमिटी सदस्य मनोनित 
१८ माघ (२०८१), रूपन्देही । नेकपा (एमाले) लुम्बिनी प्रदेश कमिटीले सङ्गठन सुदृढीकरण र विकासको नयाँ नीति बनाएको छ । 
बाँकेको नेपालगन्जमा यही माघ १५ र १६ गते सम्पन्न दुई दिने चौथो पूर्ण बैठकले पार्टी केन्द्रले बनाएको जरा केन्द्रित अभियान अन्तर्गत तीन महिने अभियानलाई अगाडि बढाउने निर्णय गरेको छ । बैठकमा छवटा समूहमा विभाजन गरी पार्टी सञ्चालनमा देखिएका समस्या, सुधारका उपाय, सङ्गठन सुदृढीकरण तथा आगामी कार्ययोजना तयार गरेको प्रचार विभाग प्रमुख डिआर घिमिरेले जानकारी दिनुभयो । 
बैठकमा पार्टीका सबै जिल्ला तथा पालिकास्तरमा प्रचार डेस्क स्थापना गर्ने र कार्यकर्तालाई विभिन्न क्षेत्रमा सेवा प्रवाहका लागि विशेषज्ञ डेस्क बनाउने निर्णय गर्नुका साथै, स्थानीय तहबाटै विकास आयोजना छनोट गर्ने विधि निर्माण गरी पार्टीका इन्चार्जहरू नागरिकका समस्यासँग प्रत्यक्ष जोडिने नीति अख्तियार गरिएको जनाइएको छ । 
त्यसैगरी भ्रष्टाचारविरुद्ध अभियान सञ्चालन गर्ने, गरिब नागरिकका लागि आधारभूत घर निर्माण गर्ने अभियान अघि बढाउने, विकासका कामहरूलाई प्रभावकारी प्रचार गर्ने तथा प्रत्येक विकासे संस्थाले गरेको कार्यको श्वेतपत्र जारी गर्ने व्यवस्था मिलाउने कुरामा बैठकले जोड दिएको छ ।
सामाजिक सञ्जालको दुरुपयोग रोक्न आवश्यक उपाय अपनाइने तथा सङ्गठन निर्माणलाई अझ प्रभावकारी बनाइने निर्णय गरिएको छ ।
बैठकमा पार्टीका केन्द्रीय सचिव तथा प्रदेश इन्चार्ज पद्मा अर्यालले अहिले सामाजिक अराजकताले चुनौती सिर्जना गरेको भन्दै योजनावद्ध आक्रमणको सामना गर्न सबै कार्यकर्ता दृढ भएर लाग्नुपर्ने बताउनुभयो । पार्टी निर्माण भावनात्मक रूपमा नभई एजेन्डामा आधारित भएर गर्नुपर्ने उहाँको भनाइ थियो ।
पार्टीका स्थायी कमिटी सदस्य तथा सङ्गठन विभाग प्रमुख काशिनाथ अधिकारीले पार्टीले २५ वर्षभित्र नेपाललाई समृद्ध बनाउने तथा एमालेलाई राष्ट्रिय शक्ति बनाउने सङ्कल्प लिएको बताउनुभयो । पार्टीलाई सशक्त बनाउन पुराना कार्यकर्ताको सम्मान गर्दै सङ्गठन निर्माण गर्ने, सामाजिक सञ्जालको सदुपयोग गर्ने र वडास्तरमा जनसेवा केन्द्रित अभियान सञ्चालन गर्नुपर्ने धारणा उहाँले राख्नुभयो ।
नेकपा (एमाले) लुम्बिनी प्रदेश अध्यक्ष राधाकृष्ण कँडेलले सरकारलाई मात्र दोष लगाउने प्रवृत्ति त्यागेर काम गर्ने संस्कृति विकास गर्नुपर्ने बताउनुभयो । वार्षिक योजनासँगै त्रैमासिक तथा चौमासिक समीक्षाको आवश्यकतामा उहाँले जोड दिनुभयो । सङ्गठन विस्तारका क्रममा प्रभावशाली युवा नेतृत्वलाई अगाडि ल्याउनुपर्ने उहाँको सुझाव थियो ।
बैठकले विभिन्न जिल्लाबाट २९ जना नेताहरूलाई प्रदेश कमिटी सदस्य मनोनयन गर्ने निर्णय गरेको छ । मनोनीत हुनेहरूमा दाङबाट कृष्ण भुषाल, गोविन्द आचार्य, रामप्रसाद गैरे, वृहस्पति श्रेष्ठ, रोल्पाबाट गंगाराम बुढा, रूपन्देहीबाट जोगलाल विक, युवराज घिमिरे, मधुकला कुँवर, अब्दुल रहमान, कपिलवस्तुबाट विश्राम चौधरी, लंक हमाल, भगवानदास चौधरी, अब्दुल रहमान खान, बर्दियाबाट टीका सम्सेली, रामसोहन चौधरी, बाँकेबाट भुमिसरा धिताल, रामकुमार दीक्षित, प्युठानबाट धनबहादुर रायमाझी, तुलसी शर्मा, पुरन गुरुङ, रुकुमपूर्वबाट भावना बुढाथोकी, अर्घाखाँचीबाट ईश्वरा पोखरेल, सरोज भुसाल, सिद्धि भुसाल, गुल्मीबाट सावित्रा आचार्य, चेतन बस्नेत, चिन्तामणि पाण्डेय, पाल्पाबाट नारायण जिसी, नारायण  आचार्य  हुनुहुन्छ ।