१६ माघ (२०८१), रसुवा । नेकपा (एमाले)का बरिष्ठ उपाध्यक्ष ईश्वर पोखरेलले वर्तमान सरकार राष्ट्रिय समस्या समाधान गर्न इमान्दारीका साथ लागिरहेको बताउनुभएको छ ।  
रसुवाको कालिकास्थामा आज नेकपा (एमाले) रसुवा जिल्ला कमिटीको आयोजनामा भएको तीनमहिने जरा केन्द्रित अभियानको अभिमुखीकरण शुभारम्भ गर्दै बरिष्ठ उपाध्यक्ष पोखरेलले विगतमा बिभिन्न आन्दोनमा सहकार्य हुने गरेको नेपाली कांग्रेससँग बलियो सहकार्य रहेकाले सरकार ढल्ने कुनै सम्भावना नरहेको स्पष्ट गर्नुभयो । 
नेपाली कांग्रेससँगको सहकार्य २०८४ को निर्वाचनसम्म जाने विश्वास व्यक्त गर्दै बरिष्ठ उपाध्यक्ष पोखरेलले २०८४ सालको निर्वाचनमा एमालेले बहुमत ल्याउनुपर्ने हुँदा पार्टीका नेताकार्यकर्ता जनतामा जानु आवश्यक भएकाले पार्टीले जरा केन्द्रित अभियान थालेको बताउनुभयो । 
उहाँले जिल्लाका नेताकार्यकर्तालाई टोल र बस्तीमा पुगेर जनताको बीचमा पार्टी र बर्गीय सङ्गठन सुदृढ गर्न आग्रह गर्नुभयोे । 
कार्यक्रममा पार्टीका स्थायी कमिटी सदस्य तथा बाग्मती प्रदेश इ्न्चार्ज डा. राजन भट्टराईले जनतामा आधारित टोलटोलमा मजवुत सङ्गठनले मात्र सफलता मिल्ने बताउनुभयो । 
कार्यक्रममा पार्टी केन्द्रीय सदस्य प्रेम तामाङ, जिल्ला अध्यक्ष जनार्दन ढकाललगायतका बक्ताले आफ्नो धारणा राख्नुभएको थियो ।