२६ माघ (२०८१), काठमाडौं । नेकपा (एमाले)का महासचिव शंकर पोखरेलले नेपालमा नियोजित रूपमा राजनीतिक अस्थिरता फैलाउने प्रयास भइरहेको बताउनुभएको छ । 
शनिबार नेकपा (एमाले) बाग्मती प्रदेश कमिटीद्वारा आयोजित प्रदेश स्तरीय प्रशिक्षक प्रशिक्षण कार्यक्रममा महासचिव पोखरेलले त्यसकै परिणामस्वरूप नेपाललाई बङ्गलादेश र श्रीलङ्का जस्तै बनाइदिने धम्की आउने गरेको बताउनुभयो । 
यो विश्व राजनीतिको प्रभाव पनि भएको उहाँको धारणा छ । 
नेपाललाई बङ्गलादेश र श्रीलङ्का बनाइदिन्छौँ भन्दै नेताहरूलाई गाली गरेर गन्तव्यमा नपुगिने बताउँदै महासचिव पोखरेलले देश बनाउन नागरिकमा आशा जगाउनुपर्ने धारणा राख्नुभयो । 
राष्ट्र निर्माणमा आम नागरिकको सहभागिता जोड्नुपर्ने उहाँले बताउनुभयो । राज्यले नागरिकको लागि लोककल्याणकारी काम गर्नुपर्नेमा जोड दिँदै महासचिव पोखरेलले भन्नुभयो– राज्यलाई कमजोर पारेर व्यक्ति बलियो बनाएर समाजवादमा पुग्न सकिँदैन, समाजवादमा जान बलियो राज्य आवश्यक पर्दछ । 
यसका लागि एमालेलाई निर्णायक राष्ट्रिय शक्ति बनाउन आवश्यक रहेको र एमालेको एकल बहुमतको सरकार आवश्यक रहेको उहाँको धारणा छ । 
महासचिव पोखरेलले पार्टीलाई बलियो बनाउनुपर्ने र त्यसका लागि पार्टी भन्दा बाहिर रहेको प्रगतिशील शक्तिलाई पार्टीमा जोड्नुपर्ने बताउनुभयो । 
दुईवटा ठुला पार्टी नेपाली कांग्रेस र नेकपा (एमाले) मुलुकमा राजनीतिक स्थिरता दिन एक ठाउँमा आएका बताउनुभयो । 
पाँचदिनसम्म चलेको प्रशिक्षक प्रशिक्षण कार्यक्रममा पार्टीका उपाध्यक्ष युवराज ज्ञवाली, उपमहासचिव तथा स्कुल विभाग प्रमुख प्रदीप ज्ञवाली, स्थायी कमिटी सदस्य डा. राजन भट्टराई, केन्द्रीय अनुशासन आयोगका अध्यक्ष केशव वडाल, लेखा आयोगका अध्यक्ष डा.पुष्पराज कँडेल तथा पार्टी स्कुल विभागका सदस्यहरू र विज्ञहरूले प्रशिक्षण दिनुभएको छ ।