१ फागुन (२०८१), काठमाडौं । नेकपा (एमाले)का महासचिव शंकर पोखरेलले अबको समय मुलुकको विकास र समृद्धिको समय भएको बताउनुभएको छ । 
नेपाल निजामती कर्मचारी संगठनको १२ औँ महाधिवेशनको बन्द सत्रलाई बिहीबार काठमाडौंमा सम्बोधन गर्दै महासचिव पोखरेलले सुशासन र सेवा प्रवाह विकास र समृद्धिका महत्वपूर्ण विषय भएका बताउनुभयो । 
उहाँले भन्नुभयो– विकास र रूपान्तरणका काममा तिब्रता राज्यको कर्तव्यका रूपमा रहने गर्दछ, निजामती कर्मचारी क्षेत्रले त्यो काममा राज्यलाई सफल बनाउने कि असफल बनाउने भन्ने भूमिका हुन्छ । 
अहिले सुशासन र विकास आयोजनाका कामको तिब्रता लगायतका विषयमा प्रश्न उठिरहेको र समग्रतामा भन्दा राज्य प्रभावकारी भएन भन्ने प्रश्न उठेको उल्लेख गर्र्दै महासचिव पोखरेलले सरकारले यसलाई सम्बोधन गर्न कानुनी सुधारको काम सुरु गरेको बताउनुभयो । 
यसका लागि संरचनागत सुधार पनि त्यतिकै आवश्यक रहेको र  निजामती कर्मचारीले यस कुरालाई राम्रोसँग बुझेकाले समस्याको समाधान पनि उनीहरूले दिन सक्ने धारणा महासचिव पोखरेलले राख्नुभयो । 
राजनीतिक स्थायित्वको अभाव र राजनीतिक अस्थिरताको कारण जनतामा निराशा बढ्दै गएको एकातिर छ भने अर्कोतिर काम गर्ने वातावरण नबनेको गुनासो पनि त्यतिकै आउने गरेको उहाँले सुनाउनुभयो । 
मुलुकको आर्थिक अवस्था कमजोर हुँदा पेसाकर्मीले पाउने सुविधा पनि अति न्यून भएको महासचिव पोखरेलले बताउनुभयो । यी सबै समस्याको समाधान मुलुकलाई समृद्धितर्फ लैजाँदा मात्र हुन सक्ने उहाँको धारणा छ । 
विकासका रोकिएका कामलाई तिब्रता दिने र राजनीति स्थायित्व दिने उद्देश्यका साथ देशका प्रमुख दुई दल अहिले एक ठाउँमा उभिएका र त्यही अनुसारका काम सरकारले अघि बढाएको महासचिव पोखरेलले बताउनुभयो । तर जसरी अघि बढ्नुपर्ने हो त्यस अनुसार अघि बढ्न नसकिएको उहाँले प्रष्ट पार्नुभयो । महासचिव पोखरेलले भन्नुभयो– अहिले पनि अस्थिरतामा रमाउन चाहनेहरू देशलाई अस्थिरतामा लैजानका लागि प्रधानमन्त्री केपी शर्मा ओली माथि निरन्तर आक्रमण गरिरहेका छन्, नेकपा (एमाले) विरुद्ध अहिले पनि आक्रमणको अभियान चलिरहेको छ । 
मुलुकलाई सही दिशामा अघि बढाउनु सबैको कर्तव्य भएको उहाँले बताउनुभयो । एमालेले बलियो राष्ट्रिय शक्ति बन्नको लागि वडा केन्द्रित अभियान सुरु गरेको पनि उहाँले जानकारी दिनुभयो । 
राजनीतिक दलहरू एक्ला एक्लै चुनाव लड्दा सबैभन्दा ठुलो दलले सरकार बनाउन सक्ने र दोस्रो ठुलो दल प्रतिपक्षमा बस्ने स्थिति बन्ने महासचिव पोखरेलले बताउनुभयो । 
देश बनाउन सक्ने राजनीतिक शक्तिलाई एकल बहुमतसहित सरकारमा पु‍र्याउनु अबको आवश्यकता भएको उहाँले बताउनुभयो । यसले राष्ट्रको भविष्यलाई उज्यालो बनाउने उहाँको विश्वास छ ।