प्रधानमन्त्रीद्वारा सुशासन र समृद्धिको यात्रामा साथ दिएर शुभकामना सार्थक बनाउन राष्ट्रसेवक कर्मचारीलाई आग्रह 

११ फागुन (२०८१), काठमाडौं । प्रधानमन्त्री केपी शर्मा ओलीले जनतालाई छिटो छरितो सेवा दिएर सुशासन र समृद्धिको यात्रामा साथ दिन राष्ट्रसेवक कर्मचारीहरूलाई आग्रह गर्नुभएको छ ।
प्रधानमन्त्री ओलीको ७४औँ जन्मदिनका अवसरमा उहाँलाई शुुभकामना दिन आज प्रधानमन्त्री तथा मन्त्रिपरिषद्को कार्यालयले सिंहदरबारमा आयोजना गरेको कार्यक्रममा प्रधानमन्त्री ओलीले आफूलाई गरिएको ‘वर्थ डे विस’ले देशको गरिबी हटाउने तथा सुशासन र समृद्धि कायम गर्ने कामको नेतृत्व गर्नमा सफलता मिलेमा त्यसको सार्थकता हुने बताउनुुभएको हो ।
‘सेवा प्रवाहका कुराहरूमा सेवाग्राहीलाई सकारात्मक भावका साथ काम गरेर विकास निर्माण र सुुशासन कायम गर्ने काममा मलाई मद्धत गरेर शुुभकामनालाई सार्थक बनाउन व्यवहारिकरूपमा पनि त्यसअनुसारको काम गर्न म आग्रह गर्छु,’ प्रधानमन्त्री ओलीले भन्नुुभयो– हामी भ्रष्टाचार गर्दैनौँ र गर्न दिन्नौँ तर सम्पत्ति शुद्धीकरणका सन्दर्भमा देश ग्रे लिष्टमा परेको छ, यसलाई हटाउनुुछ । मलाई व्यक्तिगतरूपमा लाभ लिनुपर्ने कुरा केही छैन । हामी कमिसनका लागि ठेक्कापट्टाका काम गर्दैनौँ । विकास निर्माणका लागि ठेक्का लगाउँछौँ । यसमा सबैको साथ होस् भन्ने मेरो चाहना हो ।
सो अवसरमा गृहमन्त्री रमेश लेखक, प्रधानमन्त्रीका मुख्य सल्लाहकार विष्णुुप्रसाद रिमाल, नेपालका सरकारका मुख्यसचिव एकनारायण अर्याल, सचिवहरू र राष्ट्रसेवक कर्मचारीको सहभागिता रहेको थियो । 

यसैबीच, नेकपा (एमाले)का अध्यक्ष एवं प्रधानमन्त्री ओलीको ७४औं जन्मदिनका अवसरमा आज पार्टीको केन्द्रीय कार्यालयले च्यासलमा शुभकामना कार्यक्रम आयोजना गर्यो । 
कार्यक्रममा अध्यक्ष ओलीलाई पार्टीका तर्फबाट उपाध्यक्ष अष्टलक्ष्मी शाक्यले जन्मदिनको शुभकामना दिनुभयो । त्यसैगरी, पार्टीका पदाधिकारीहरू, स्थायी कमिटी, पोलिटव्यूरो, केन्द्रीय कमिटीका नेताहरूका साथै ठुलो सङ्ख्यामा पार्टीका कार्यकर्ताहरूले शुभकामना दिनुभयो ।