११ फागुन (२०८१), चितवन । नेकपा (एमाले)का वरिष्ठ उपाध्यक्ष ईश्वर पोखरेलले एमालेलाई बलियो राष्ट्रिय शक्तिको रूपमा विकास गर्नुपर्ने बताउनुभएको छ । 
नेकपा (एमाले)ले बहुमत नल्याउने हो भने देश उँभो नलाग्ने भएकाले एमालेलाई बलियो बनाउनुपर्ने र पार्टीलाई सुदृढ बनाउन जरा केन्द्रित अभियान सुरु गरिएको बरिष्ठ उपाध्यक्ष पोखरेलले स्पष्ट पार्नुभयो ।
प्रेस चौतारी नेपाल बाग्मती प्रदेश समितिको दोस्रो प्रदेश अधिवेशन उद्घाटन कार्यक्रमलाई आइतबार चितवनमा सम्बोधन गर्दै बरिष्ठ उपाध्यक्ष पोखरेलले विगतको समीक्षा गर्दै आगामी योजना बनाएर एमालेका सबै जनसङ्गठन अघि बढ्नुपर्ने बताउनुभयो । 
नेपाली कांग्रेस र एमालेले देशमा ठुला ठुला परिवर्तन गरेको स्मरण गर्दै बरिष्ठ उपाध्यक्ष पोखरेलले २०४६ सालको आन्दोलन वा गणतन्त्र घोषणा गराउने कुरा कांग्रेस र एमालेको सहकार्यले सम्भव भएको बताउनुभयो । 
नेपालको राजनीतिमा दुईवटा पोल रहेका र एउटा पोलको नेतृत्व एमाले र अर्को पोलको नेतृत्व कांग्रेसले गर्ने भएकाले यी दुई पार्टी एक आपसमा प्रतिस्पर्धी पार्टी पनि भएको उहाँले स्पष्ट पार्नुभयो । बरिष्ठ उपाध्यक्ष पोखरेलले नेपालको विशिष्टतामा परिवर्तन र सहकार्यलाई बुझ्नुपर्ने बताउनुभएको छ । 
नेपालमा वामपन्थी नामका दक्षिणपन्थीहरू रहेकाले त्यस्ता शक्तिसँग एमालेले पार्टी एकता गर्न नसक्ने स्पष्ट पार्दै एमालेमा आउनेलाई स्वागत गर्ने भए पनि एमाले कोहीसँग मिल्न नजाने उहाँले बताउनुभयो । ‘एमालेमा आउन चाहनेलाई स्वागत गर्दछौँ, वामपन्थी एकता भने सम्भव छैन’, बरिष्ठ उपाध्यक्ष पोखरेलले भन्नुभयो । 
आफूलाई कम्युनिष्ट भन्नेहरू नै एमालेलाई कमजोर बनाउन लागेका तर एमालेलाई कमजोर बनाउनु भनेको राष्ट्र, राष्ट्रियता, राष्ट्रिय स्वाभिमान र समृद्धिको यात्रालाई कमजोर बनाउनु भएको उहाँले स्पष्ट पार्नुभयो । 
एमाले माथि लगाइएका कुनै पनि आरोपमा सत्यता नरहेको र विगत र भविष्य नभएकाहरू एमालेका विरुद्ध लागेको बरिष्ठ उपाध्यक्ष पोखरेलले बताउनुभयो । 
भ्रष्ट मनोवृत्ति भएका र जहाँसुकै गुनासो गर्ने मानिहरू एमाले हुन नसक्ने उहाँको भनाइ छ । एमालेमा कुनै गुट र उपगुट पनि नभएको उहाँले स्पष्ट पार्नुभयो । 
कार्यक्रममा पार्टीका स्थायी कमिटी सदस्य, केन्द्रीय प्रचार तथा प्रकाशन विभाग प्रमुख राजेन्द्र गौतमले जिम्मेवारीमा पुगेका मानिसले कसरी काम गरिरहेका छन् भन्ने कुरा जनताले हेरिरहेको बताउनुभयो ।
सामाजिक सञ्जाललाई व्यवस्थित र जबाफदेही बनाउन सामाजिक सञ्जाल नियमन सम्बन्धी विधेयक आएको उहाँले बताउनुभयो । सामाजिक सञ्जालमा जे लेखे पनि जवाफ दिनु नपर्ने स्थितिको अन्त्य गर्नुपर्नेमा गौतमले जोड दिनुभयो । 
नेपाल पत्रकारितामा अहिले पुँजीविहीनता र कन्टेन्टको अभाव ठुलो चुनौतीका रूपमा देखिएको र मिडियाको विकासका लागि राज्यले योगदान गर्नुपर्ने बेला आएको उहाँले स्पष्ट पार्नुभयो ।
पार्टीका बाग्मती प्रदेश कमिटी अध्यक्ष कैलाशप्रसाद ढुङ्गेलले कुनै पनि सङ्गठन र पार्टीलाई बलियो बनाउने काम विचारले गर्ने बताउँदै नेकपा (एमाले) स्पष्ट विचार र दृष्टिकोण भएको र दूरदर्शी नेता केपी शर्मा ओलीले नेतृत्व गर्नुभएको पार्टी भएको स्पष्ट पार्नुभयो । 
अराजकहरूको जगमा बसेर बेइमान कुरा गर्नेहरूलाई एमालेले ठिक ठाउँमा ल्याउनुपर्ने उहाँले बताउनुभयो । 
बाग्मती प्रदेश अध्यक्ष ढुङ्गेलले माओवादी अध्यक्ष पुष्पकमल दाहाल प्रचण्डलाई अराजक कुरा गरेर देश भड्काउने काम नगर्न आग्रह गर्नुभयो । 
कार्यक्रममा पार्टीका केन्द्रीय सदस्य जगन्नाथ थपलिया, प्रेस चौतारी नेपालका अध्यक्ष गणेश बस्नेत लगायतले पनि बोल्नुभएको थियो ।