११ फागुन(२०८१), काठमाडौं । नेकपा (एमाले)का महासचिव शंकर पोखरेलले एमालेलाई बलियो बनाउनका लागि ‘जरा केन्द्रित अभियान’ सञ्चालन गरेको बताउनुभएको छ । 
ललितपुरको च्यासलस्थित पार्टीको केन्द्रीय कार्यालयमा आज भएको नेपाल राष्ट्रिय भूतपूर्व सैनिक तथा प्रहरी सङ्गठन (नेपोन) बाग्मती प्रदेश कमिटी दोस्रो अधिवेशनलाई सम्बोधन गर्दै महासचिव पोखरेलले जरा केन्द्रित अभियान र मिसन–२०८४ ले २०८४ सालमा हुने निर्वाचनमा एमालेलाई निर्णायक राष्ट्रिय शक्तिका रूपमा स्थापित गर्ने रहेको बताउनुभयो ।
मुलुक बनाउनका लागि बलियो राजनीतिक दल आवश्यक रहेको उल्लेख गर्दै महासचिव पोखरेलले एमाले मुलुकमा राजनीतिक स्थायित्व कायम गर्न सक्ने क्षमता बोकेको पार्टी भएको बताउनुभयो । 
उहाँले निर्णायक शक्ति निर्माण गर्ने यात्रामा भूतपूर्व सैनिक तथा प्रहरी सङ्गठनको योगदान रहने बताउनुभयो । 
नेपालमा रहेको जनशक्तिलाई सीप, ज्ञान र क्षमता प्रदान गरेर परिचालन गर्नु अहिलेको आवश्यकता भएको महासचिव पोखरेलको भनाइ थियो । उहाँले बलिया राजनीतिक दल निर्माण गरेर राज्यलाई बलियो बनाउनुपर्ने बताउनुभयो । 
‘जबसम्म पार्टी बलियो हुँदैन जनता बलिया हुँदैनन् । पार्टी बलियो नभई राज्य बलियो हुँदैन । त्यसैले लोकतन्त्रमा राज्य बलियो बनाउन बलिया पार्टी आवश्यक हुन्छ’, महासचिव पोखरेलले भन्नुभयो । उहाँले नागरिकलाई पुँजी निर्माणतर्फ अग्रसर गराउनुपर्ने बताउनुभयो ।सङ्गठनका अध्यक्ष विनोद पाण्डेले मुलुकमा देखिएको अस्थिरता एमाले र नेपाली कांग्रेस मिलेर चिर्ने काम गरिरहेको बताउनुभयो । सम्मेलनले नयाँ नेतृत्व चयन गर्नेछ ।