१४ फागुन (२०८१), काठमाडौं । नेकपा (एमाले)का महासचिव शंकर पोखरेलले राजनीतिक दलभित्र योगदान कम र अवसरको खोजी बढी हुँदै गएको बताउनुभएको छ । 
नेकपा (एमाले) उद्योग व्यवसाय विशेष जिल्ला कमिटीको आयोजनामा बुधबार काठमाडौंमा भएको जिल्लास्तरीय प्रशिक्षक प्रशिक्षण कार्यक्रममा महासचिव पोखरेलले यसले पार्टीमा अवसरवाद जन्मिएको बताउनुभयो । 
‘यसले असन्तुष्टि बढ्छ, असन्तुष्टिले अराजकता बढाउँछ, अवसरवाद र अराजकता राजनीतिक आन्दोलनका बाधक हुन्, यी दुई कुरालाई परास्त नगरी हामी अघि बढ्न सक्दैनौँ’, उहाँले भन्नुभयो । 
अवसरवादलाई परास्त गर्न विचारलाई बलियो बनाउनुपर्ने बताउँदै महासचिव पोखरेलले भन्नुभयो– अवसरवादलाई परास्त गर्न वैचारिक र राजनीतिक आन्दोलनलाई अघि बढाउनु पर्दछ । 
कुनै पनि सङ्गठन एकताबद्ध र अनुशासित भएन भने उसले उपलब्धि प्राप्त गर्न नसक्ने उहाँले बताउनुभयो । कुनै पनि उद्देश्यको लागि साङ्गठानिक शक्ति आवश्यक पर्ने महासचिव पोखरेलले बताउनुभयो । 
नेपालमा काम जति नपढेका मानिसलाई लगाउने र पढेका मानिसहरू ठालु पल्टने संस्कार नै विकास भएको बताउँदै महासचिव पोखरेलले भन्नुभयो– काम जति नपढेका मान्छेलाई लगाउने, पढेका जति ठालु पल्टने, अन्त कतै यस्तो हुन्छ ?, के कारणले हाम्रो देश बनेन भन्ने कुरा यसैले पुष्टि गर्छ । 
कुनै पनि देश छिटो विकास हुनको लागि स्वास्थ्य र शिक्षामा विकास गर्नुपर्ने उहाँको धारणा छ । नेपालको शिक्षा र स्वास्थ्यको क्षेत्र निक्कै कमजोर रहेको उल्लेख गर्दै स्वास्थ्य र शिक्षामा जोड दिनुपर्ने महासचिव पोखरेलले बताउनुभयो । 
प्रविधि र आधुनिक यन्त्रको प्रयोग गरी देशमा उत्पादन बढाउनुपर्ने उहाँको धारणा छ । नेपालको भूगोल सुहाउँदो प्रविधि र यन्त्र उपकरण उत्पादन र प्रयोगले देशले तीब्र विकास हासिल गर्ने महासचिव पोखरेलको भनाइ छ । सरकार फेरबदल भइरहने कुराले जुन रूपमा नेपाल अघि बढ्नुपर्ने हो त्यो हिसाबले अघि बढ्न नसकेको उहाँले बताउनुभयो । 
पुँजी निर्माण बिना राष्ट्रिय पुँजी नबन्ने बताउँदै उहाँले नेपालीको बचत संस्कृति अति कमजोर रहेको र यसमा सुधार गरी बचत संस्कृति विकास गर्नुपर्ने बताउनुभयो ।  
त्यस्तै राज्यलाई कर तिर्ने बानी नेपालीको अति कमजोर रहेको उल्लेख गर्दै महासचिव पोखरेलले भन्नुभयो– कर तिर्ने भन्दा कर नतिर्नेको जमात बढी छ, नेपालमा कर तिर्ने संस्कृति नै छैन । 
विदेशबाट आएको ऋण र अनुदान पनि उचित सदुपयोग हुन नसकेको बताउँदै महासचिव पोखरेलले विदेशबाट ऋण ल्याएर देश बनाउँछु भन्ने सोचाइ नै गलत भएको धारणा राख्नुभयो । 
देश आर्थिक रूपमा कमजोर र सामाजिक रूपमा अराजक बन्दै गएको कारण समस्यामा पर्न लागेकाले अहिले देशका ठुला दुई राजनीतिक दल मिलेर सरकार बनाएको उहाँले बताउनुभयो । 
नेपालमा साना पार्टीले ठुला पार्टीलाई घुर्क्याएर शासन गर्ने गलत संस्कार सुरु भएको र म अरूको सहयोगमा प्रधानमन्त्री बनेको हुँ भन्ने कुरालाई समेत बिर्सिएर ठुला दलमाथि माओवादीले शासन गर्न सुरु गरेपछि दुई दल मिलेका महासचिव पोखरेलले स्पष्ट पार्नुभयो । 
‘हामी शासन गर्नको लागि मात्र होइन, अहिले सङ्कटग्रस्त बनेको अर्थतन्त्रलाई लयमा फर्काउन, सुशासन कायम गर्न र जनतामा बढ्दै गएको निराशालाई चिर्नका लागि हामी मिलेका हौँ’, उहाँले भन्नुभयो ।