औपचारिकभन्दा अनौपचारिक अर्थतन्त्र बलियो, विकासका लागि घातक 

वैदेशिक रोजगारीबाट प्राप्त रेमिट्यान्स देशका लागि दिगो नभएर अस्थायी अर्थतन्त्र 

१७ फागुन ( २०८१), काठमाडौं । नेकपा (एमाले)का महासचिव शंकर पोखरेलले देशको विकासका लागि औपचारिक अर्थतन्त्र बलियो बनाउनुपर्ने बताउनुभएको छ । 
नेपाल राष्ट्रिय होटेल व्यवसायी संघको प्रथम अधिवेशन उद्घाटन समारोहलाई आज सम्बोधन गर्दै महासचिव पोखरेलले नेपालको समग्र अर्थतन्त्र औपचारिक भन्दा अनौपचारिक भएको र यसको प्रभाव देशको समग्र विकासमा परेको बताउनुभयो । 
नेपालमा अनौपचारिक अर्थतन्त्र बलियो भएको र त्यो अवस्था देशको विकासका लागि सकारात्मक नभएको बताउनुभयो ।
अहिले नेपालको अर्थतन्त्रको आधार उत्पादन र उद्यम भन्दा पनि वैदेशिक रोजगारी भएको र यो देशका लागि दिगो नभएर अस्थायी अर्थतन्त्र भएको महासचिव पोखरेलको धारणा छ । मुलुकको अर्थतन्त्रमा देखिएको चुनौतीलाई चिरेर अहिलेको सरकार गम्भीरतापूर्वक अघि बढेको उहाँले बताउनुभयो । पहिलेको तुलनामा अर्थतन्त्रमा केही सुधार भए पनि अझै सन्तोषजनक अवस्था नभएको महासचिव पोखरेलको भनाइ छ । 
उहाँले नेपाल हरेक हिसाबले पर्यटनको लागि सम्भावनाको क्षेत्रको रूपमा रहेको र पर्यटन क्षेत्र विस्तारको लागि होटेल क्षेत्रको विकास हुनुपर्ने बताउनुभयो । 
नेपालमा जति पर्यटक ल्याउनुपर्ने हो त्यसको सानो हिस्सा पनि ल्याउन नसकिएको बताउँदै महासचिव पोखरेलले भन्नुभयो–हामी १०÷१२ लाख पर्यटक ल्याउँदा खुसी मनाएर बसेका छौँ । अहिले पनि व्यावसायिक क्षेत्र जसरी उठ्नुपर्ने हो त्यस अनुरूप उठ्न सकेको छैन, यो मुलुकको लागि प्रमुख चुनौती भएको छ । 
कानुनका कारण सेवा प्रवाह, सुशासन र लगानीमा समस्या आयो भनेर नै सरकारले कानुन संशोधन गर्ने अध्यादेश ल्याएको स्पष्ट गर्दै महासचिव पोखरेलले भन्नुभयो– कानुनले झमेला खडा गर्यो, व्यवसायीलाई अप्ठेरो पर्यो भन्ने सन्दर्भमा कानुनको तीब्र संशोधनको अभियानमा छौँ । 
आवश्यकता भएको कारण सरकारले जिम्मेवार भएर अध्यादेश ल्याएको हुँदा यसप्रति सरकार अत्यन्त गम्भीर छ, जिम्मेवार रहेको उहाँले बताउनुभयो । महासचिव पोखरेलले देशको सङ्कट समाधानमा सरकार गम्भीर रहेको बताउनुभयो । 
कतिपयले हरेक महिना दिनमा सरकार ढल्ने हल्ला चलाउने गरेका भए पनि त्यो उनीहरूको सपना मात्र भएको बताउँदै महासचिव पोखरेलले भन्नुभयो– सरकार ढल्ने कुरा नेपालमा अस्थिरतामा रमाउन चाहनेको दिवास्वना मात्रै हो, धेरै हण्डर खाएर दुई दल एक ठाउँमा आएका हुन्, २०८४ को निर्वाचनसम्म दुई दल बीचको सहकार्य अविछिन्न रहन्छ ।
कुनै पनि देश बलियो हुन राज्य बलियो हुनुपर्ने उहाँले बताउनुभयो । त्यसको लागि राजनीतिक दल बलिया हुनुपर्ने उहाँको धारणा छ । कमजोर राजनीतिक दलले शासन गरेर देश बलियो नबन्ने महासचिव पोखरेलले स्पष्ट पार्नुभयो । 
राजनीतिक ध्रूवीकरणको माध्यम र आगामी निर्वाचनबाट देशलाई स्थायी सरकार दिनुपर्ने उहाँले बताउनुभयो । अहिलेको सत्ता समीकरण राजनीतिक अस्थिरता अन्त्य गर्नको लागि भएको पनि बताउँदै महासचिव पोखरेलले भन्नुभयो– देश बनाउने हो भने अस्थिरता अन्त्य हुनु पर्छ, स्थायित्व कायम हुनु पर्छ, त्यसकै लागि अहिलेको सरकार बनेको हो ।