नेकपा (एमाले) मोरङ जिल्ला कमिटीको दशौं अधिवेशन

१७ फागुन (२०८१), विराटनगर । नेकपा (एमाले)का उपाध्यक्ष  रामबहादुर थापा ‘बादल’ले समाजवादको स्थापनाका लागि एमालेमात्र सक्षम रहेको बताउनुभएको छ । 
नेकपा (एमाले) मोरङ जिल्ला कमिटीको दशौं अधिवेशनको आज उद्घाटन गर्दै उपाध्यक्ष थापाले नेपालमा समाजवादको स्थापनाका लागि एमालेको महत्वपूर्ण भूमिका आवश्यक रहेको बताउनु्भयो । 
उपाध्यक्ष थापाले मोरङ ऐतिहासिक जिल्ला भएको र यहाँ कम्युनिस्ट तथा कांग्रेसको ऐतिहासिक वर्चस्व रहेको चर्चा गर्दै  नेपालमा समाजवादको स्थापना बिना पार्टीले सोच अनुरुप सामाजिक जीवनमा परिवर्तन सम्भव नरहेको धारणा राख्नुभयो । 
उपाध्यक्ष थापाले भन्नुभयो– जनताको बहुदलीय जनवाद (जबज) मार्गदर्शक सिद्धान्त बनेर समाजवाद ल्याउने माध्यम बन्न सक्छ । 
उहाँले माओवादीको राजनीतिक भविष्य अनिश्चित रहेको बताउनुभयो । 
उद्घाटन समारोहमा पार्टीका अर्का उपाध्यक्ष गुरु बरालले समाजवादको पूर्वाधार निर्माण गर्ने दिशामा अघि बढ्नुपर्ने बताउनुभयो । उहाँले पार्टी एकता बलियो बनाउने दिशामा सबै जुट्नुपर्ने आवश्यकतामा जोड दिनुभयो । 
त्यसैगरी पार्टीका उपमहासचिव प्रदीप ज्ञवालीले मोरङ ऐतिहासिक मजदुर आन्दोलनको आधारभूमि रहेको र मनमोहन अधिकारीको नेतृत्वमा भएको आन्दोलनले पार्टीको जग बसालेको बताउनुभयो । 
अन्तर्राष्ट्रिय राजनीति र युक्रेन सङ्कटको चर्चा गर्दै उहाँले साना राष्ट्रहरूलाई शक्तिशाली मुलुकहरूले कसरी नियन्त्रण गर्न खोजिरहेका छन् भन्ने विषयमा प्रकाश पार्नुभएको थियो । 
उपमहासचिव ज्ञवालीले पार्टीभित्र अस्वस्थ प्रतिस्पर्धाको प्रवृत्ति बढेकोप्रति चिन्ता व्यक्त गर्दै कार्यकर्ताको भावना बुझी सर्वसम्मत नेतृत्व चयन गर्नुपर्ने आवश्यकतामा जोड दिनुभयो । उहाँले विगतमा माओवादीले कांग्रेस र एमालेको काँधमा बसेर बन्दुक पड्काएको बताउँदै अहिले एमालेले कांग्रेससँग मिलेर सरकार बनाउनुको कारण देशको समृद्धि रहेको प्रस्ट्याउनुभयो । 
पार्टीका स्थायी कमिटी सदस्य शेरधन राईले एमालेको नेतृत्व सक्षम हुनुपर्नेमा जोड दिँदै पार्टीभित्र जिम्मेवारी धेरै भएकाले कार्यकर्ताले त्यसलाई आत्मसात गर्नुपर्ने बताउनुभयो । 
पार्टीमा एकताका लागि नेतृत्वले कार्यकर्ताको भावना बुझ्नुपर्ने भनाइ उहाँले राख्नुभयो । 
कोशी प्रदेशका मुख्यमन्त्री तथा पार्टीका स्थायी कमिटी सदस्य हिक्मत कार्कीले एमाले एक भएमा मोरङमा कुनै अन्य दल टिक्न नसक्ने विश्वास व्यक्त गर्दै सर्वसम्मत नेतृत्व चयनका लागि आग्रह गर्नुभयो । 
उहाँले मोरङमा पार्टी सुदृढ भएको र स्थानीय तहसम्म सङ्गठन विस्तार भइसकेको बताउनुभयो । 
उद्घाटन समारोहका स्थायी कमिटी सदस्य तथा जनसङ्गठन समन्वय संयन्त्रका प्रमुख भानुभक्त ढकालले पुराना नेताहरूले पदमा पुनः प्रतिस्पर्धा गरिरहँदा नयाँ पुस्ताले कहिले अवसर पाउने भन्ने विषयमा छलफल गर्नुपर्ने बताउनुभयो ।  कार्यक्रममा नेकपा (एमाले) कोशी प्रदेश कमिटी अध्यक्ष घनश्याम खतिवडा, केन्द्रीय सदस्य जीवन घिमिरेले लगायत नेताहरूले अधिवेशन सफलताको शुभकामना दिनुभएको थियो । 
अधिवेशनमा सहभागी नेताहरूले पार्टीलाई अनुशासित, सक्षम र जनतामुखी बनाउनुपर्नेमा जोड दिँदै सर्वसम्मत नेतृत्व चयन गरेर पार्टी एकताको सन्देश दिनुपर्ने धारणा राख्नुभएको छ । 
नेकपा (एमाले) मोरङका अध्यक्ष बाबुराम कार्कीको अध्यक्षतामा भएको उद्घाटन समारोहमा उपाध्यक्ष शान्ति लिम्बूले स्वागत मन्तव्य राख्नुभएको थियो भने सचिव रविन थापाले कार्यक्रम सञ्चालन गर्नुभएको थियो । करिब एक हजार प्रतिनिधि सहभागी रहेको अधिवेशन फागुन १९ गतेसम्म चल्ने छ ।