–जनसङ्गठनहरूका केन्द्रीय कमिटी र पदाधिकारी सङ्ख्या घटाउने निर्णय
–पार्टीका दुई केन्द्रीय विभागमा सचिव पदपूर्ति, सुदूरपश्चिम प्रदेशमा सदस्यहरू मनोनयन 
१८ फागुन (२०८१), काठमाडौं । नेकपा (एमाले) केन्द्रीय सचिवालयको बैठकले पार्टीका जनसङ्गठनहरूका केन्द्रीय कमिटीको आकार र पदाधिकारीको सङ्ख्या घटाउने निर्णय गरेको छ । 
पार्टी अध्यक्ष एवं सम्माननीय प्रधानमन्त्री केपी शर्मा ओलीको अध्यक्षतामा आज पार्टी केन्द्रीय कार्यालय, च्यासलमा बसेको केन्द्रीय सचिवालयको ४५औं बैठकले सो निर्णय गरेको हो । 
बैठकले दुईवटा केन्द्रीय विभाग सचिव पदपूर्ति गरेको छ भने सुदूरपश्चिम प्रदेश कमिटीमा सदस्यहरू मनोनयन गरेको छ । 
बैठकलाई सम्बोधन गर्दै अध्यक्ष  एवं प्रधानमन्त्री ओलीले सचिवालयको ४४औं बैठकयता विकसित समसामयिक राजनीतिक विषय तथा सरकारका कामका बारेमा जानकारी गराउनुभएको थियो ।
बैठकले देहाय बमोजिमको निर्णय गरेको छः 
१.जनसङ्गठन समन्वय सम्बन्धी निर्देशिकामा संशोधनका सम्बन्धमा– जनसङ्गठन समन्वय संयन्त्रले प्रस्ताव गरे बमोजिम जनसङ्गठनको केन्द्रीय कमिटीको अधिकतम सङ्ख्या क्रमशः १५० र ९९ मा सीमित गर्ने, जनसङ्गठनको हालको अधिकतम् १७ पदाधिकारीहरूको सङ्ख्या घटाई ९ मा सीमित गर्ने । अध्यक्ष र महासचिवका अतिरिक्त उपाध्यक्ष महिलासहित २, उपमहासचिव १ र सङ्गठन– प्रचार– विदेश र कोषको जिम्मेवारी तोकेरै सचिव (कोषाध्यक्ष भएमा सोसहित)को सङ्ख्या ४ मा सीमित गर्ने ।
संयन्त्रमा संरचनागत रूपमा सचिव राख्न उपयुक्त नहुने तर प्रमुखले आवश्यकताका आधारमा सचिवको जिम्मेवारी तोक्न सक्ने ।
केन्द्रमा सचिवालय र केन्द्रीय कमिटीका बीचमा अन्य कुनै तह नराख्ने ।
२.स्थानीय तहका प्रमुख/अध्यक्ष तथा उपप्रमुख/उपाध्यक्षहरूको कार्यशाला आगामी चैतमहिनाभित्र सम्पन्न गर्ने । 
३.विभागमा सचिवहरूको पदपूर्ति सम्बन्धमा–  केन्द्रीय प्रचार तथा प्रकाशन विभागको सचिवमा गणेश पाण्डे (लमजुङ) र स्थानीय विकास विभाग सचिवमा नवराज गेलाल (भक्तपुर)लाई मनोनयन गरिएको छ ।
४. पार्टीको स्थापना दिवस–अप्रिल २२ (बैशाख ९, २०८२) पार्टीको ७६औं स्थापना दिवस भव्य रूपमा मनाउने । 
५. मनोनयन– सुदूरपश्चिम प्रदेश कमिटी सदस्यमा मनोनयनका लागि आएका नामहरू अनुमोदन गरिएको छ । सो अनुसार, जयन्त स्वार (अछाम) रामबहादुर बुढा (अछाम), नन्दसिंह कठायत (अछाम) र अमर विक (अछाम) प्रदेश कमिटी सदस्य मनोनयन हुनुभएको छ ।  
८. शोक प्रस्ताव– 
 क) नेकपा (एमाले) केन्द्रीय उपाध्यक्ष कमरेड युवराज ज्ञवाली, केन्द्रीय सदस्य कमरेड लक्ष्मण ज्ञवाली एवं पूर्व सांसद रामकुमार ज्ञवालीका दाजु एवं पार्टीका प्रतिबद्ध योद्धा कमरेड फणिन्द्र ज्ञवालीको यही फागुन १० गते ७६ वर्षको उमेरमा भएको निधनबाट पार्टी दुखित भएको छ । २००५ सालमा रुरुक्षेत्र–१, भड्कुवा गुल्मीमा जन्मिनुभएका कमरेड फणिन्द्र ज्ञवाली २०२६ सालदेखि कम्युनिष्ट आन्दोलनमा आबद्ध हुनुभएको थियो । उहाँ पार्टीका असल आश्रयदाता, तीन पटकसम्म वडा अध्यक्षमा निर्वाचित लोकप्रिय जनप्रतिनिधि र निष्ठावान कार्यकर्ता हुनुहुन्थ्यो । दुःखको यस घडीमा केन्द्रीय सचिवालय कमरेड फणिन्द्र ज्ञवालीप्रति भावपूर्ण श्रद्धाञ्जली अर्पण गर्दछ र उपाध्यक्ष कमरेड युवराज ज्ञवालीसहित उहाँका शोकाकुल परिवारजनमा गहिरो समवेदना व्यक्त गर्दछ । 
ख) नेकपा (एमाले) केन्द्रीय अनुशासन आयोगका अध्यक्ष कमरेड केशव बडालकी जीवनसँगिनी कमरेड शान्ति बडालको हालै भएको असामयिक निधनबाट पार्टी दुखित भएको छ । कमरेड केशव बडालको राजनीतिक यात्रा अगाडि बढाउनका लागि स्व. शान्ति बडालको अत्यन्त महत्वपूर्ण भूमिका रहेको थियो । उहाँले पार्टीलाई हरेक चुनौतीपूर्ण अवस्थामा निरन्तर साथसहयोग पुर्याउँदै आउनु भएको थियो । दुःखको यस घडीमा केन्द्रीय सचिवालय कमरेड शान्ति बडालप्रति भावपूर्ण श्रद्धाञ्जली अर्पण गर्दछ र पत्नी वियोगमा पर्नुभएका कमरेड केशव बडालसहित शोकाकुल परिवारजनमा गहिरो समवेदना व्यक्त गर्दछ ।