२१ फागुन (२०८१), झापा । आज फागुन २१, सुखानीमा झापा आन्दोलनका वीर योद्धाहरूले सहादत प्राप्त गरेको दिन अर्थात् सहिद स्मृति दिवस । 
वि.सं. २०२९ साल फागुन २१ गते झापाको चन्द्रगढीबाट इलाम जेल सार्ने नाममा तत्कालीन झापा विद्रोहका पाँच जना नेताहरू रामनाथ दाहाल, नेत्र घिमिरे, कृष्ण कुइँकेल, वीरेन राजवंशी र नारायण श्रेष्ठलाई तत्कालीन निरङ्कुश पञ्चायती सरकारले सुखानीको जङ्गलमा हत्या गरेको दिन । 
नेकपा (एमाले) झापा र इलामको आयोजनामा आज सुखानीमा सहिदहरूको सम्मानमा स्मृति कार्यक्रम आयोजना गरियो । सहिदहरूका शालिकमा माल्यार्पण गरी सम्मान प्रकट गरिएपछि कार्यक्रमलाई सम्बोधन गर्दै नेकपा (एमाले)का उपाध्यक्ष गुरु बरालले एमाले बाहेक कसैले पनि सदिहको सपना पूरा गर्न नसक्ने बताउनुभयो । उहाँले सहिदको सपना पूरा गर्न एमाले प्रतिबद्ध रहेको बताउनुभयो । 
सुशासन, विकास र समृद्धि हासिल गरेपछि मात्रै सुखानीका सहिदहरूको सपना पूरा हुने बताउँदै उहाँले गन्तव्यहीन यात्रामा रहेका, अलमलमा परेकाहरूलाई पार्टीमा फर्किन पनि आह्वान गर्नुभयो । 
माई नगर कमिटीको व्यवस्थापनमा आयोजित ५३औं सहिद दिवसमा उपाध्यक्ष बरालले सबै कम्युनिष्ट तथा देशभक्तहरूलाई समृद्ध राष्ट्र निर्माण गर्ने अभियानमा जोडिन आग्रह गर्नुभयो । उहाँले भन्नुभयो – यो मुलुकको विकासको नेतृत्व एमालेले गर्छ, तपाईहरू मुलप्रवाहमा समाहित हुनुहोस् । 
नेपाली जनताको मुक्तिका लागि जीवन बलिदान दिने सहिदहरूको सपना साकार पार्न एमाले बाहेकले खुट्टा कमाउने अवस्था छ, उहाँले भन्नुभयो– अरुले खुट्टा लरबराउन सक्छन्, बाटो विराउन सक्छन् । गन्तव्यहीन यात्रा रोज्न सक्छन् । तर, एमाले सहिदको सपना पूरा गर्न सधैं प्रतिबद्ध भई लागिरहने छ । 
नेता बरालले संविधानका सबल पक्षलाई अघि बढाउँदै कमजोरी रहेको अवस्थामा सच्याएर जानुपर्ने बताउनुभयो । संविधान कार्यान्वयनको चरणमा कुनै कमजोरीहरू रहेको खण्डमा सच्याएर जान सकिने धारणा व्यक्त गर्नुभयो । 
कार्यक्रममा सहिद नेत्र घिमिरेकी छोरी कल्पना घिमिरेले सहिद परिवारलाई कुनै स्वार्थ नरहेको बताउनुभयो । विगतमा सबैखाले समस्याहरू भोगियो, अब जनताको सुख नै सहिद परिवारको एक मात्र स्वार्थ हुने उहाँको धारणा छ । 
सुखानी सहिदहरूको प्रेरणाले नै लाखौं नेपाली एमालेमा लागेको र देशको सबैभन्दा ठुलो कम्युनिष्ट पार्टी बन्न सफल भएको उहाँको भनाइ छ । उहाँले सहिदले देखाएको बाटो नभुल्न आग्रह गर्दै जनताको चाहनालाई प्राथमिकतामा राखेर जानुपर्ने बताउनुभयो ।