२३ फागुन (२०८१), बाग्लुङ । नेकपा (एमाले)का महासचिव शंकर पोखरेलले लोकतन्त्रमा भरोसा गर्ने पार्टीहरू देश र लोकतन्त्रप्रति चुनौती आउँदा एक ठाउँमा उभिनु स्वाभाविक भएको बताउनुभएको छ । 
नेकपा (एमाले) बाग्लुङद्वारा आयोजित वडा केन्द्रित अभियानको अभिमुखीकरण कार्यक्रमलाई बिहीबार सम्बोधन गर्दै महासचिव पोखरेलले कांग्रेस र एमाले मिल्नुको उद्देश्य राजनीतिक अस्थिरता अन्त्य गर्नको लागि भएको बताउनुभयो । 
महासचिव पोखरेलले भन्नुभयो– चुनौतीलाई सामना गर्न लोकतन्त्रमा विश्वास गर्ने दलहरू मिल्नु स्वाभाविक थियो, हामी अहिले मिलेका छौँ । 
मुलुक राजतन्त्रको अकर्मण्यता र स्वार्थी व्यवहारका कारण पछाडि परेको उहाँले बताउनुभयो । 
अहिले एउटा स्वार्थी जमात फेरि राजा आऊ देश बचाउ भन्दै नारा लगाएर हिँडेको सन्दर्भमा महासचिव पोखरेलले भन्नुभयो–जुन राजाले यो मुलुकलाई यो हालतमा पुर्यायो, फेरि राजा आऊ देश बचाउ भन्नु मुर्खता हो ।
नेपालमा हिंसात्मक राजनीतिलाई अगाडि बढाउने कुरामा राजतन्त्रको पनि हात रहेको उहाँले बताउनुभयो । माओवादीलाई राजतन्त्रले उक्साएर राजनीतिक दलहरू विरुद्ध प्रयोग गरिएको उहाँले प्रष्ट पार्नुभयो । नेपाली राजनीतिलाई हिंसामा होम्ने र जातजातिका नाममा अस्थिरता मच्चाउने काम राजतन्त्रको आडमा माओवादीले गरेको उहाँको भनाइ छ । 
नेपालमा नीतिका आधारमा अब राजनीतिक ध्रूवीकरण आवश्यक रहेको हुँदा देशलाई अब दुई ध्रूवमा विभाजित गर्नुपर्ने बताउँदै महासचिव पोखरेलले त्यसका लागि बलिया दुई राजनीतिक दल आवश्यक रहेको धारणा राख्नुभयो । 
देश बनाउने हो भने आँट र सामथ्र्य भएको नेता आवश्यक पर्ने र त्यो आँट र सामर्थ्य नेकपा (एमाले)का अध्यक्ष एवं वर्तमान प्रधानमन्त्री केपी शर्मा ओलीसँग रहेको महासचिव पोखरेलले बताउनुभयो । कार्यक्रममा पार्टीका स्थायी कमिटी सदस्य किरण गुरुङ, पोलिटव्यूरो, केन्द्रीय कमिटी र प्रदेश कमिटीका नेता कमरेडहरूको पनि अतिथिका रुपमा उपस्थिति रहेको थियो ।