२४ फागुन (२०८१), राँझा (बाँके) । नेकपा (एमाले)का महासचिव शंकर पोखरेलले पुरानो समय कस्तो थियो भन्ने बिर्सेका र पुरानो अवस्था नभोगेकाहरूले अहिले नेपालमा केही भएको छैन भन्ने गरेको बताउनुभएको छ । 
नेकपा (एमाले) स्थानीय विकास विभागले शनिबार नेपालगञ्जमा आयोजना गरेको स्थानीय तह निर्वाचनमा नेकपा (एमाले)बाट उम्मेदवार हुनेहरूलाई सम्मान तथा अभिमुखीकरण कार्यक्रममा बोल्दै महासचिव पोखरेलले बाँके बर्दियाबाट राजाको पालामा काठमाडौं जान भारत हुँदै जानुपर्ने अवस्था थियो भन्ने नबिर्सन आग्रह गर्नुभयो । 
आज देशमा जे जति परिवर्तन भएको छ, त्यो धेरै परिवर्तन २०७४ साल पछाडि भएको बताउँदै महासचिव पोखरेलले भन्नुभयो– आज यो समाज परिवर्तन भएको छ भन्ने कुरा अहिलेका संरचनाले नै बताउँदैन र ? 
अहिले जे भएको छ त्यो पर्याप्त छैन भन्न सकिने भए पनि राजाको पालामा उल्का भएको थियो, बहुदल आएपछि केही भएन भनि गर्ने गरिएको प्रचार गलत भएको उहाँले बताउनुभयो । यो जनतालाई मूर्ख बनाउने प्रयास बाहेक केही नभएको उहाँको भनाइ छ । 
नेपाली जनताको विकास र समृद्धिको सपना पुरा हुन नदिन चाहनेहरूले नेपाली समाजमा विभिन्न बहानामा अस्थिरता मच्चाउने प्रयत्न गरिरहेको र अहिले तिनै तत्वहरूले ‘राजा आऊ देश बचाऊ’को नारा लगाउन लागेका महासचिव पोखरेलले बताउनुभयो ।  
उहाँले गाउँको विकासका लागि गाउँमा पैसा पठाउने कामको थालनी एमालेले गरेको स्मरण गराउनुभयो । महासचिव पोखरेलले देश बनाउने पार्टी एमाले भएको बताउँदै अब एमालेलाई मिलीजुली सरकारमा होइन, एकल बहुमतको सरकारमा पु‍र्याउनु पर्ने धारणा राख्नुभयो । उहाँले एमालेलाई बलियो बनाउनका लागि वडा केन्द्रित ‘जरा अभियान’ सञ्चालन गरिएको बताउनुभएको छ ।
सुदृढ  राजनीतिक दलबाट नै राष्ट्र निर्माण हुने बताउँदै उहाँले नेकपा (एमाले)लाई निर्णायक राष्ट्रिय शक्ति निर्माण गर्ने यात्रामा स्थानीय तहका पूर्वजनप्रतिनिधिका साथै युवा वर्गको  योगदान हुने विश्वास व्यक्त गर्नुभयो ।  
महासचिव पोखरेलले भन्नुभयो– नेकपा (एमाले)ले जतिबेला काम गर्ने मौका पाएको छ त्यतिबेला काम गरेर देखाएको छ । अहिले पार्टी ‘समृद्ध नेपाल, सुखी नेपाली’को राष्ट्रिय आकाङ्क्षा पूरा गर्न क्रियाशील रहेको छ । 
देशमा हरेक कामका लागि चाहिने एमाले भए पनि आज त्यही एमालेमाथि आक्रमण भइरहेको बताउँदै उहाँले भन्नुभयो– यो हमला एमाले र एमाले अध्यक्ष माथिको मात्र होइन, नेपाली जनता माथिको हमला हो, विकास र समृद्धि माथिको हमला हो, आज नेकपा एमाले माथि जुन खालको षडयन्त्र भइरहेको छ, त्यो देश माथिको षडयन्त्र हो, विकास र समृद्धि विरुद्धको षडयन्त्र हो । 
आज सत्ताबाट बाहिरिएकाहरूले एमालेविरुद्ध विष बमन गरिरहेका र देशमा सबैभन्दा ज्यादा सत्ताको दोहन गर्नेहरू अहिले सुशासनको कुरा गर्दै हिंडिरहेको महासचिव पोखरेलले बताउनुभयो । 
माओवादीले पशुपतिमा सुनको जलहरीलाई पित्तल हो भनेर भ्रम फैलाई आम मानिसको ध्यान त्यसतर्फ केन्द्रित गरेर देशमा सुन तस्करीमा लागेको उहाँको भनाइ छ । 
महासचिव पोखरेलले माओवादी भूमिहीन र सुकुम्वासीको समस्या समाधान गर्ने पक्षमा नरहेको बताउनुभयो । माओवादीले सुकुम्वासीको नाममा राजनीति गरिरहने नियोजित षडयन्त्र अनुसार भूमि सम्बन्धी अध्यादेश संसदबाट पास हुन नदिने र रोक्ने नीति लिएको उहाँको धारणा छ । 
उहाँले जरा केन्द्रित अभियान र मिसन–२०८४ ले एमालेलाई अझ सशक्त शक्तिका रूपमा स्थापित गर्ने बताउनुभयो ।
महासचिव पोखरेलले नेकपा (एमाले)लाई निर्णायक शक्ति निर्माण गर्ने यात्रामा स्थानीय तहका पूर्वजनप्रतिनिधिका साथै युवा वर्गको  योगदान हुनेमा आफू विश्वस्त रहेको बताउनुभयो । 
सुदृढ  राजनीतिक दलबाट नै राष्ट्र निर्माण हुने उहाँको तर्क थियो । ‘समृद्ध नेपाल, सुखी नेपाली’को राष्ट्रिय आकाङ्क्षा पूरा गर्न आफ्नो दल क्रियाशील रहेको उहाँको अभिमत थियो । 
नेकपा (एमाले) बाँके स्थानीय विकास विभाग प्रमुख मीन मल्लको अध्यक्षतामा भएको कार्यक्रममा पार्टीका केन्द्रीय सदस्य सूर्य ढकाल, दीपा शर्मा, शान्ति ढकाल, मोहम्मद हारुन हलवाई, पशुपतिदयाल मिश्रा सहभागी हुनुहुन्थ्यो ।