२४ फागुन ( २०८१), काठमाडौं । नेकपा (एमाले) स्थायी कमिटी सदस्य एवं जनसङ्गठन समन्वय संयन्त्रका प्रमुख  भानुभक्त ढकालले सामाजिक सञ्जाल विधेयक मिडिया क्षेत्रको नियन्त्रण गर्न नभई अराजकता घटाउन ल्याउन लागिएको बताउनुभएको छ । 
प्रेस चौतारी नेपाल उपत्यका प्रदेश कमिटीको दोस्रो अधिवेशनको उद्घाटन समारोमा उहाँले विधेयकमा भएका कमजोरी सच्याउन आफूले पनि सहयोग गर्ने प्रतिबद्धता जनाउनुभयो । 
उहाँले भन्नुभयो– बलियो सरकार भएकै बेला सच्याउँ र कार्यान्वयनमा ल्याउँ, बलियो सरकार भएकै बेला काम गर्न सकिएन भने पछि गर्न सकिँदैन ।
वर्तमान सरकार कसैले डोरी लगाएर ताने पनि २०८४ सम्म नढल्ने नेता ढकालले बताउनुभयो । उहाँले एमाले अध्यक्ष केपी शर्मा ओली नेतृत्वको सरकार २०८३ असारमा र २०८४ को निर्वाचनपछि कांग्रेस सभापति शेरबहादुर देउवा नेतृत्वको सरकार ढल्ने स्पष्ट गर्नुभयो । 
दुई नेता देउवा र ओलीको समझदारी भएसम्म कसैले बोल्दैमा फरक नपर्ने स्थायी कमिटी सदस्य ढकालले बताउनुभयो । आगामी चैत ५ गते हुने स्ववियु निर्वाचनलाई स्वस्थ र मर्यादित बनाउन मिडियाबाट सहयोगका लागि उहाँले आग्रह गर्नुभयो ।
स्थायी कमिटी सदस्य तथा केन्द्रीय प्रचार तथा प्रकाशन विभाग प्रमुख राजेन्द्र गौतमले लोकतन्त्रका लागि स्वतन्त्र मिडिया आवश्यक रहेको बताउनुभयो । उहाँले त्यसैले सामाजिक सञ्जाल विधेयक लोकतन्त्रको पक्षमा र मिडियाको पक्षमा हुने बताउनुभयो ।
कर्यक्रममा प्रेस चौतारी नेपालका अध्यक्ष गणेश बस्नेत, एमाले बाग्मती प्रदेशका उपसचिव भक्तकुमारी लामा लगायतले बोल्नुभएको थियो ।