प्रेस चौतारी नेपालको दशौं महाधिवेशन विराटनगरमा शुरू
१० चैत (२०८१), विराटनगर । प्रेस चौतारी नेपालको १०औँ राष्ट्रिय महाधिवेशन विराटनगरमा आजबाट शुरू भएको छ । महाधिवेशनको नेकपा (एमाले)का महासचिव शंकर पोखरेलले उद्घाटन गर्नुभयो ।

 उद्घाटन समारोहलाई सम्बोधन गर्दै महासचिव पोखरेलले सत्यको विश्लेषण नगरी भ्रमका पछि दौडन नहुने बताउनुभयो । उहाँले हिजो देश कहाँ थियो र आज कहाँ छ भन्ने कुरा विश्लेषण नगरी लोकतन्त्र आएपछि देशमा केही भएको छैन भनि गरिएको भ्रमको पछि लाग्नु नहुने बताउनुभयो । 
आज राजावादीहरूले लोकतन्त्रमा देश विकासको कुनै काम हुन सकेन भनेर भ्रम फिँजाइरहेको बताउँदै महासचिव पोखरेलले राजाको पालामा भएको विकास र लोकतन्त्रमा राजनीतिक दलले शासन गर्दा भएका विकास तुलना गरेर हेर्न आग्रह गर्नुभयो । 
उहाँले कुतर्क गरेर जनतालाई भ्रम फिँजाउने कुचेष्टा नगर्न राजावादीहरूलाई चेतावनी दिनुभयो । ‘लोकतन्त्रले के दियो, गणतन्त्रले के दियो भन्ने कुरा तथ्यका आधारमा विश्लेषण गरेर हेर्नुपर्दछ’, महासचिव पोखरेलले भन्नुभयो । 
विगतमा माओवादीको सशस्त्र द्वन्द्वको निशाना राजा नभएर कांग्रेस र एमाले भएको स्मरण गर्दै माओवादीलाई सशस्त्र द्वन्द्वको बेला कसले पालन पोषण गरेका थिए भन्ने कुरा प्रमाणित हुँदै गएको उहाँले बताउनुभयो । राजवादी र भारतीयहरू माओवादीलाई हामीले संरक्षण गरेका थियौँ भन्दै हिँड्न थालेको महासचिव पोखरेलले सुनाउनुभयो ।  
आज जुन हिसाबले सामाजिक सञ्जालमार्फत सामाजिक अराजकता मच्चाइँदै छ त्यसको पछि लाग्ने हो भने लोकतन्त्र नै जोखिममा पर्ने उहाँले बताउनुभयो । लोकतन्त्रमा प्रेस स्वतन्त्रतामा कुनै बन्देज नलाग्ने भए पनि सामाजिक अराजकतालाई भने रोक्नुपर्नेमा जोड दिँदै महासचिव पोखरेलले भन्नुुभयो– समाजलाई जहिले पनि अस्थिरतामा रुमलेर यो समाज अगाडि बढ्न सक्दैन । 
नेपालमा राजतन्त्र ब्युँताउने कुरा किमार्थ सम्भव नरहेको उहाँले बताउनुभयो । सङ्गठित शक्तिहरूले लामो तयारी गरेर राजाको पक्षमा प्रदर्शन गरेको भए पनि त्यसले गणतन्त्र उल्टाउने कुरा सम्भव नरहेको महासचिव पोखरेलले स्पष्ट पार्नुभयो । 
संविधान संशोधनका लागि दुई दलले आवश्यक वातावरण बनाउने काम गरिरहेका र अहिले संयन्त्र बनाएर संविधान संशोधन गरी स्थायित्व कायम गरेर अघि बढ्ने उहाँले स्पष्ट पार्नुभयो । 
सञ्चार क्षेत्र र सञ्चारकर्मीले सत्य र तथ्यलाई स्थापित गर्नु पर्ने बताउँदै सञ्चार क्षेत्र हावाको भरमा चल्नु नहुने स्पष्ट उहाँको भनाइ छ । सञ्चार क्षेत्रले अब विकास र समृद्धिको एजेण्डा लिएर अघि बढ्नुपर्नेमा उहाँले जोड दिनुभयो । अब सञ्चार क्षेत्रको मिसन पनि बदलिनुपर्ने महासचिव पोखरेलको धारणा छ । 
जिम्मेवारी लिने तर काम नगर्ने मनोविज्ञानबाट मुक्त हुनुपर्नेः ढकाल

उद्घाटन समारोहमा नेकपा (एमाले) स्थायी कमिटी सदस्य एवं जनसङ्गठन समन्वय संयन्त्रका प्रमुख भानुभक्त ढकालले जिम्मेवारी लिने तर काम नगर्ने मनोविज्ञानबाट मुक्त हुनुपर्ने बताउनुभयो । 
नेता ढकालले पद मैले पाउनु पर्छ, काम अरूले गर्नुपर्छ भन्ने मनोविज्ञानबाट बाहिर आएर जिम्मेवारी अनुसारको काम गर्नुपर्ने बताउनुभयो । 
पार्टी वा सङ्गठनभित्र कोही आयो भने म पछि पर्ने हुँ कि भन्ने भ्रम केही नेताहरूमा देखिएको भन्दै  उहाँले सबैलाई समेट्दा मात्र सङ्गठन बलियो हुने बताउनुभयो । ‘आफूलाई नहुँदा एमालेलाई देखाइदिन्छु भन्ने व्यक्ति एमाले हुन सक्दैन’, नेता ढकालले भन्नुभयो । 
नेकपा (एमाले)का नीति र नेतृत्वको विरुद्ध आक्रमण भइरहेको बेला एमाले र त्यसका जनसङ्गठनभित्र कुनै विवाद हुनु नहुने र त्यसो भयो भने मात्र मिसन २०८४ सफल हुने उहाँको धारणा छ ।
नेतृत्व आवश्यकताले स्थापित गराउँछः गौतम

समारोहमा नेकपा (एमाले) स्थायी कमिटी सदस्य एवं प्रेस चौतारी नेपालका इञ्चार्ज राजेन्द्र गौतमले नेतृत्व व्यक्तिको इच्छाले मात्र हुन्न, आवश्यकताले स्थापित गराउँछ भन्नुभयो । 
नेता गौतमले सङ्गठनमा अनुशासन जरूरी रहेको र अनुशासनमा नरहने कार्यकर्ताले सङ्गठन चलाउन नसक्ने स्पष्ट पार्नुभयो । प्रेस चौतारी नेपाललाई परिणाम दिन सक्ने नेतृत्व आवश्यक रहेको उहाँले बताउनुभयो । कसलाई कहाँ खटाउँदा राम्रो काम गर्छ भन्ने हेरेर नै जिम्मेवारी दिइने नेता गौतमको भनाइ छ । 
पत्रकारले पस्किने विषयले लोकतन्त्रलाई बलियो बनाउन कति सहयोग गरेको छ भन्ने कुरा हेर्नुपर्नेमा उहाँले जोड दिनुभयो । अहिले सामाजिक सञ्जाल पढिनसक्नुको अवस्थामा रहेको नेता गौतमले सुनाउनुभयो । ‘सामाजिक सञ्जालले नागरिकको स्वतन्त्र रूपमा बाँच्न पाउने अधिकार नै खोसेको छ’, उहाँले भन्नुभयो । 
सामाजिक सञ्जालले ज्युदो मानिसको मृत्यु भएको भन्ने सम्मका भ्रामक सूचना प्रवाह गरिरहेका र यसलाई रोक्न आवश्यक रहेको इन्चार्ज गौतमले स्पष्ट पार्नुभयो । सामाजिक सञ्जाललाई नियन्त्रण होइन नियमन गर्न अति आवश्यक रहेको उहाँले बताउनुभयो । 
अहिले एमाले र देश गम्भीर सङ्कटमा रहेको बताउँदै उहाँले यसलाई जोगाउन सबै एकताबद्ध हुनुपर्नेमा जोड दिनुभयो । त्यसैले प्रेस चौतारी नेपालले एकताबद्ध भएर सक्षम नेतृत्व छान्नुपर्नेमा उहाँले जोड दिनुभयो ।
सञ्चार क्षेत्रले लोकतन्त्र र गणतन्त्रको रक्षाका लागि काम गर्नुपर्नेः राई

पार्टीका स्थायी कमिटी सदस्य एवं कोशी प्रदेशका इञ्चार्ज शेरधन राईले मुलुकको आम सञ्चार क्षेत्रलाई जिम्मेवार बनाउँदै राष्ट्र निर्माणको काममा लगाउनुपर्ने बताउनुभएको छ । 
आमसञ्चारले लोकतन्त्र र गणतन्त्रको रक्षाका लागि काम गर्नुपर्ने बताउँदै नेता राईले भन्नुभयो– आम जनताले प्रेस चौतारी नेपालमाथि यो आस्था र विश्वास राखेका छन् । 
आफू सञ्चार मन्त्री हुँदा श्रमजीवी पत्रकारको हितका पक्षमा धेरै काम गरेको नेता राईले बताउनुभयो । छोटो अवधिमा पनि नेपालको सूचना र प्रविधिको विकास र पत्रकारिताको विकासमा आफूले धेरै काम गरेको र यसको पछाडि प्रेस चौतारी नेपालको ठुलो सहयोग रहेको उहाँले स्पष्ट पार्नुभयो । 
सामाजिक सञ्जाललाई नियमन गर्नैपर्नेः कार्की

पार्टीका स्थायी कमिटी सदस्य एवं कोशी प्रदेशका मुख्यमन्त्री हिक्मत कार्कीले आफू मुख्यमन्त्री भएपछि धेरै कुरालाई सही बाटोमा ल्याउने प्रयास गरिरहेको हुँदा प्रदेश सरकारले गरेको काम हेरेर ठिक भए ठिक र बेठिक भए बेठिक भनिदिन पत्रकारलाई आग्रह गर्नुभयो । 
अहिले सामाजिक सञ्जाल मार्फत समाजमा अफवाह फैलाउने काम भएको बताउँदै उहाँले त्यसको प्रतिवाद आवश्यक रहेको बताउनुभयो । 
लोकतन्त्र भनेको छाडातन्त्र नभएको बताउँदै मुख्यमन्त्री कार्कीले सामाजिक सञ्जाललाई नियमन गर्नैपर्ने बताउनुभयो ।
उहाँले पहाडबाट बसाइसराइ रोक्न कोशी प्रदेश सरकारले विशेष कार्यक्रम सञ्चालन गर्न लागेको बताउनुभयो । प्रदेश सेतो हात्ती भयो, पाल्न गाह्रो भयो भन्नेलाई प्रदेश सरकारले गरेको काम हेर्न पनि उहाँले आग्रह गर्नुभयो ।
प्रेस चौतारी नेपालका अध्यक्ष गणेश बस्नेतको अध्यक्षतामा भएको उद्घाटन समारोहमा नेपाल पत्रकार महासङ्का अध्यक्ष निर्मला शर्मा, नेपाल प्रेस युनियनका सभापति शिव लम्साल लगायतले शुभकामना दिनुभएको थियो । कार्यक्रममा प्रेस चौतारी नेपालले प्रकाशन गरेको स्मारिका विमोचन गरिएको छ । 
प्रेस चौतारी नेपालले घोषणा गरेको  विभिन्न पुरस्कार पनि कार्यक्रममा प्रदान गरिएको छ । मङ्गलबारसम्म चल्ने महाधिवेशनले नयाँ नेतृत्व चयन गर्ने छ । 
पार्टीका स्थायी कमिटी सदस्य तथा जनसङ्गठन समन्वय संयन्त्रका प्रमुख भानुभक्त ढकालको अध्यक्षतामा पाँचसदस्यीय अध्यक्षमण्डल गठन गरी अधिवेशनको बन्द सत्र रातीदेखि नै शुरू भएको छ । अधिवेशन मङ्गलबारसम्म चल्ने छ ।