१४ चैत (२०८१), काठमाडौं । नेकपा (एमाले) कोशी प्रदेश सम्पर्क कमिटी महिला विभागले महिलालाई रोजगारी सिर्जना गरी आत्मनिर्भर बनाउने योजना अन्तर्गत बेकरी तालिम सम्पन्न भएको छ । 
काठमाडांैमा सञ्चालित दशदिने तालिम बुधबार सकिएको छ । तालिममा २५ जना महिला सहभागी हुनुहुन्थ्यो । बेकरी बनाउने तालिममा स्थानीय उत्पादनलाई प्रयोगमा ल्याइएको थियो । तालिममा सहभागी महिलाले स्थानीय उत्पादन कोदो, फापर, जौ, गहुँको आटा, नरिवल, दालचिनी आदि प्रयोग गरी पाउरोटी, दुनोट, क्रिमरोल, विस्कुट र बर्थडे केक लगायत विभिन्न केक बनाउने तालिम लिएका छन् । 
तालिमको समापनको दिन बुधबार उनीहरूले आफूले सिके बमोजिम बेकरी तयार गरी प्रदर्शन समेत गरे । कार्यक्रममा नेकपा (एमाले)का महासचिव शंकर पोखरेल, उपमहासचिव प्रदीप ज्ञवाली लगायत नेताहरू उपस्थित हुनुभई तालिममा सहभागी महिलाहरूलाई उद्यमशीलताको विकासमा देखाएको रुचिप्रति हौसला प्रदान गर्नुभएको थियो । 
कोशी प्रदेश सम्पर्क कमिटीले यस अघि पनि महिलाहरूलाई चुल्हो चौकामा मात्र सीमित नभई आर्थिक उपार्जनका काममा संलग्न गराई आत्मनिर्भर बनाउन साबुन बनाउने लगायतका तालिम उपलब्ध गराएको नेकपा (एमाले) सम्पर्क समन्वय कमिटीका उपप्रमुख थानेश्वर बस्यालले जानकारी दिनुभयो । 
नेकपा (एमाले)का कार्यकर्ताहरूलाई आय आर्जनको कुनै न कुनै उत्पादनमुलक काममा जोड्ने योजना अन्तर्गत सम्पर्क कमिटीहरूले काम गरिरहेका र यस्तै तालिमहरू अन्य प्रदेश र जिल्ला सम्पर्क कमिटीहरूले पनि सम्पन्न गरेको बस्यालले बताउनु भयो । लुम्बिनी प्रदेश सम्पर्क कमिटीले सातदिने कफि, चिया शप सञ्चालन, बाग्मतीले अचार बनाउने, दोलखा जिल्ला सम्पर्क कमिटीले कौसी तरकारी खेती र रामेछापले भाषा तथा कम्प्युटर तालिम सञ्चालन गरेको उहाँले बताउनुभयो ।