१८ चैत (२०८१), काठमाडौं । पूर्वराजाका समर्थकहरूको नाममा शुक्रबार काठमाडौंका विभिन्न ठाउँमा हिंसात्मक आक्रमणबाट भएको क्षतिको नेकपा (एमाले)ले आइतबार स्थलगत अवलोकन गरेको छ । 
नेकपा (एमाले)का महासचिव शंकर पोखरेलको नेतृत्वमा गएको टोलीले क्षति भएको संरचनाको स्थलगत अवलोकन गरेको हो । टोलीले आक्रमणबाट क्षति भएका एकीकृत समाजवादीको पार्टी कार्यालय, कान्तिपुर टेलिभिजन, अन्नपूर्ण पोष्टको कार्यालय, भाटभटेनी सुपर मार्केट तथा पत्रकार सुरेश रजकलाई आगो लगाई जलाएको घर तथा ढुङ्गामुढा गरेर क्षति पु‍र्याएको घरको स्थलगत अवलोकन गरेको थियो । 
स्थलगत अवलोकन टोलीमा महासचिव पोखरेलका साथै पार्टीका स्थायी कमिटी सदस्यहरू काशीनाथ अधिकारी, भानुभक्त ढकाल, डा. राजन भट्टराई, पार्टी केन्द्रीय कार्यालय सचिव डा.भीष्म अधिकारी  लगायत सहभागी हुनुहुन्थ्यो । 
स्थलगत अवलोकन गर्दै महासचिव पोखरेलले शुक्रबारको घटना अत्यन्त दुःखद र आततायी घटना भएको बताउनुभयो । उहाँले घटनाको निष्पक्ष छानबिन गरी दोषीलाई कारबाहीको दायरामा ल्याउनुपर्ने बताउनुभयो । महासचिव पोखरेलले घटनाप्रति दुःख व्यक्त गर्नुभयो ।