२१ चैत ( २०८१), काठमाडौं । नेकपा (एमाले)का बरिष्ठ उपाध्यक्ष ईश्वर पोखरेल र महासचिव शंकर पोखरेलले आज प्रेस चौतारी नेपालका नवनिर्वाचित अध्यक्ष, उपाध्यक्ष, महासचिवसहितको टिमलाई बधाई तथा कार्यकाल सफलताको शुभकामना दिनुभयो । 
सो अवसरमा महासचिव शंकर पोखरेलले प्रेस चौतारीको देशव्यापी संरचना नै एउटा ठूलो सञ्चार गृहको हैसियतमा रहेको र देशैभरिका गतिविधि सङ्कलन गरेर प्रेस चौतारी केन्द्रले त्यस्ता गतिविधिलाई आम सञ्चार माध्यमसम्म पुर्याउने सामर्थ्य राख्ने बताउनुभयो । 
‘प्रेस चौतारीमा आवद्ध पत्रकारहरूले एक ठाउँका समाचार अर्को ठाउँमा सजिलै पुर्याउन सक्छन्’, महासचिव पोखरेलले भन्नुभयो– समाचार विष्लेषण, टिप्पणी आदि लेख्न हैसियत राख्दछन् । चौतारीको यो सामर्थ्यलाई पार्टीको हितमा प्रयोग गर्नुपर्दछ । 
प्रेस चौतारीमा छापा, विद्युतीय, न्यू मिडिया र सोसल मिडिया सञ्चालनमा राम्रो दखल भएका पत्रकारहरू भएको उहाँले बताउनुभयो । 
महासचिव पोखरेलले प्रेस चौतारी कार्यकर्ता उत्पादन गर्ने सङ्गठन भन्दा पनि पार्टीका पक्षमा समाचार र विचार उत्पादन गर्ने सङ्गठन भएको बताउनुभयो । उहाँले पार्टी गतिविधिका समाचार, पार्टीले आम जनतामा पुर्याउनु पर्ने विषयहरू र पार्टीमाथिको प्रहार विरुद्ध चौतारीले सङ्गठित रूपमा प्रतिवाद गर्नुपर्ने बताउनुभयो । 
महासचिव पोखरेलले भन्नुभयो– चौतारीका सदस्यहरूको दोहोरो भूमिका हुन्छ । पार्टी कार्यकर्ता र पत्रकार । तपाईंहरूले बढ्ता क्याडर हुँदा पत्रकारिता क्षेत्र छुट्न पनि सक्छ । बढी व्यावसायिक पत्रकार हुँदा पार्टीका विरुद्ध हुन पनि सक्छ । त्यसैले यस कुरामा विशेष ध्यान दिनुहोला । प्रेस चौतारीले पार्टीको नीति र नेतृत्वलाई आम जनता समक्ष स्थापित गर्न सदा क्रियाशील हुनुपर्ने महासचिव पोखरेलले बताउनुभयो । 
पार्टीका विरुद्ध भएका मिडिया हमला, साइवर हमलाको प्रतिवादका लागि चौतारी अग्रपङ्क्तिमा आउनुपर्ने भनाइ राख्दै उहाँले भन्नुभयो– एमालेको नेतृत्वविरुद्ध विरोधीहरूले सम्पूर्ण शक्ति परिचालन गरेका छन् । त्यसको प्रतिवादमा पार्टीको सानो हिस्सा मात्र लागेको छ । सूचना र प्रविधिलाई पार्टीको हितमा प्रयोग गर्न सबैलाई प्रोत्साहित गर्नुपर्दछ ।  
बधाइ कार्यक्रममा पार्टीको सङ्गठन विभाग प्रमुख काशिनाथ अधिकारी, जनसङ्गठन समन्वय संयन्त्रका प्रमुख भानुभक्त ढकाल, प्रचार तथा प्रकाशन विभाग प्रमुख राजेन्द्र गौतम, प्रेस चौतारीका निवर्तमान अध्यक्ष गणेश बस्नेत लगायत उपस्थित हुनुहुन्थ्यो । प्रेस चौतारी नेपालका नवनिर्वाचित अध्यक्ष गणेश पाण्डेले १०औं महाधिवेशनबाट निर्वाचित नेतृत्वले सक्रियतापूर्वक काम सुरु गरेको बताउनुभयो ।