काठमाडौं । नेकपा (एमाले) स्वास्थ्य तथा जनसङ्ख्या विभागले आफ्नो बार्षिक कार्ययोजना तयार गरेको छ । उक्त कार्ययोजना पार्टीका स्थायी कमिटी सदस्य तथा विभागका प्रमुख कृष्णगोपाल श्रेष्ठले आज महासचिव शंकर पोखरेललाई हस्तान्तरण गर्नुभयो ।

सो अवसरमा महासचिव पोखरेलले जनतासँग प्रत्यक्ष सरोकार रहने स्वास्थ्य सेवाको विषय संवेदनशील रहेकाले विभागले हरेक समय स्वास्थ्य क्षेत्रका विषयमा आफ्नो ध्यान केन्द्रित गर्नुपर्ने वताउनुभयो । 
विभागले स्वास्थ्य क्षेत्रसँग सम्बन्धित आवश्यक नीति निर्माण र स्वास्थ्य क्षेत्रका समस्या समाधानका लागि पार्टीलाई सुझाव दिने लगायत बर्षभरिमा गरिने विभिन्न सेवामूलक काम समेटेर कार्ययोजना बनाएको छ ।  
सो अनुसार विभागले स्वास्थ्य विज्ञहरू, राष्ट्रिय स्वास्थ्यकर्मी महासंघका घटक संगठनहरू र पार्टी नेतृत्वसँग छुट्टाछुट्टेै अन्तरक्रिया आयोजना गर्ने छ । त्यसैगरी विभाग र महासंघले संयुक्त रूपमा स्वास्थ्य शिविरहरू सञ्चालन गर्ने, पार्टी र जनसंगठनका सार्वजनिक कार्यक्रमहरूमा स्वास्थ्य डेस्क सञ्चालन गर्ने, स्वास्थ्य स्वयंसेवा अभियान, सरसफाइ अभियान सञ्चालन गर्ने कार्ययोजना बनाइएको छ भने महासंघमार्फत स्वास्थ्यकर्मीहरूलाई व्यावसायिक दक्षता बृद्धिका लागि प्रशिक्षण सञ्चालन गरिने छ । विभागले नेपालको कम्युनिष्ट आन्दोलनमा योगदान गर्नुभएका कम्युनिष्ट नेताहरूको स्वास्थ्य अवस्थाका बारेमा जानकारी लिने विषयलाई पनि कार्ययोजनामा समेटेको छ । 
महासचिव पोखरेललाई विभागको कार्ययोजना हस्तान्तरण गर्दै विभागका प्रमुख कृष्णगोपाल श्रेष्ठले गतबर्षको कार्ययोजनामा टेकेर परिमार्जित कार्ययोजना बनाइएको वताउनुभयो । उहाँले गत दुईमहिनामा आफ्नो नेतृत्वमा विभागले गरेका कामको पनि जानकारी गराउनुभयो । विभागले यसबीचमा स्वास्थ्य क्षेत्रका समस्याका बारेमा नेपाल सरकारका स्वास्थ्य तथा जनसङ्ख्यामन्त्रीलाई ज्ञापनपत्र बुझाइएको, पार्टी अध्यक्ष केपी शर्मा ओलीसँग चिकित्सकहरूको अन्तरक्रिया कार्यक्रम आयोजना गरिएको लगायत कामको जानकारी गराउनुभयो । सो अवसरमा विभागका सचिव महेन्द्र श्रेष्ठ, राष्ट्रिय स्वास्थ्यकर्मी महासंघका अध्यक्ष डा. झलक गौतम लगायत विभागका सदस्यहरूको उपस्थिति रहेको थियो ।