तेह्रथुम । नेकपा (एमाले)का अध्यक्ष केपी शर्मा ओलीले हिंसात्मक गतिविधिले कुनै पनि प्रकारका समस्या समाधान नहुने बताउनुभएको छ ।
मध्यपहाडी (पुष्पलाल) लोकमार्ग यात्रा अभियानको १६औं दिन आज(२०८० मङ्सिर २९ गते) तेह्रथुमको म्याङ्लुङमा आयोजित कार्यक्रमलाई सम्बोधन गर्दै अध्यक्ष ओलीले विरोधका नाममा गरिने हिंसात्मक गतिविधि र मुठभेडले समस्याको समाधान नदिने बताउनुभयो । 
उहाँले लोकतन्त्रमा सबै समस्याको समाधान लोकतान्त्रिक विधिबाट र शान्तिपूर्ण ढङ्गले खोज्नुपर्नेमा जोड दिनुभयो । 
बाटोमा रुख ढालेर, कालो झण्डा देखाएर समस्या समाधान हुँदैन भन्ने कुरा सबैले बुझ्न आवश्यक रहेको अध्यक्ष ओलीले बताउनुभयो ।
उहाँले भन्नुभयो– जे पनि आन्दोलन होइन, कालो झण्डा देखाउनु, अझ त्योभन्दा धेरै गर्नु समाधान होइन, लोकतान्त्रिक विधिबाट समाधान खोज्नुपर्छ ।
नेकपा (एमाले)ले प्रभावकारी ढङ्गले देश विकासको काम गरिरहेका अवस्थामा देशी विदेशी शक्ति आत्तिएर षडयन्त्रपूर्ण ढङ्गले सत्ताबाट हटाउने काम भएको चर्चा गर्दै उहाँले एमालेले फेरि पनि जनताको अभिमतबाट सरकारमा पुग्ने अठोटका साथ काम गरिरहेको बताउनुभयो । 
अध्यक्ष ओलीले एमालेले जनमतमा विश्वास गर्ने हुँदा धैर्यता अपनाएर वर्तमान सत्ता गठबन्धन तोड्ने बताउनुभयो ।

उहाँले भन्नुभयो– हामी धैर्यता राख्छौं, जनतामा विश्वास गर्छौं, जनताको अभिमतमा विश्वास गर्छौंै, हामीले आवेश, आक्रोश र उत्तेजना देखाएर होइन, धैर्यतापूर्ण ढङ्गले अहिलेको गठबन्धनलाई तोड्ने छौँ । यस गठबन्धनका अपराधहरूलाई, देशको प्रगतिका निम्ति बाधक बनेका यसका षडयन्त्रमूलक क्रियाकलापलाई भण्डाफोर गरेरै छाड्छौं ।
देश बनाउने कुरा आजको भोलि नहुने भन्दै उहाँले त्यसका लागि योजनाबद्ध ढङ्गले अगाडि बढ्नुपर्ने बताउनुभयो । 
अध्यक्ष ओलीले समृद्धिका लागि सङ्कल्प यात्रा कसैका विरुद्ध नभएको र यात्रा जनताका समस्या बुझ्ने र तिनको समाधान खोज्नका लागि गरिएको प्रस्ट पार्नुभयो । यात्राका क्रममा सबैसँग छलफल गरिएको र यस क्रममा जनताको साथ समर्थन देखेर आफूहरु निक्कै उत्साहित भएको अध्यक्ष ओलीले बताउनुभयो ।
नेकपा (एमाले)प्रति जनताको भरोसा रहेका र त्यसै बमोजिम  एमाले भरोसायोग्य पार्टी भएको उहाँले बताउनुभयो । आफूहरू अनेकौं जेलनेल र दुखकष्ट सहेर अहिलेको अवस्थासम्म आएको भन्दै अध्यक्ष ओलीले जनताले अलमलमा नपरिकन एमालेलाई  साथ दिनुपर्ने बताउनुभयो ।
उहाँले भन्नुभयो– देशको रक्षा गर्न सक्ने, देशलाई अगाडि बढाउन सक्ने, देशमा समृद्धि ल्याउन सक्ने, जनतालाई विकासका लागि बाटो देखाउन सक्ने, पूर्वाधार तयार गर्न सक्ने, भौतिक पूर्वाधार, सामाजिक पूर्वाधारको व्यवस्था गर्न सक्ने पार्टी एमाले मात्रै हो । शान्ति स्थापना गर्न, सुशासन दिन र एकताबद्ध भएर देश अगाडि बढाउन सक्ने काम पनि एमालेले मात्र गर्न सक्छ भन्ने स्पष्ट भएको अध्यक्ष ओलीले बताउनुभयो ।
अध्यक्ष ओलीले नेकपा (एमाले)प्रति जनताले विश्वास देखाइरहेको र जनताको विश्वासलाई एमालेले तलमाथि हुन नदिने प्रतिबद्धता व्यक्त गर्नुभयो । 
नेपालको राजनीतिमा तेह्रथुमले नवजागरण ल्याएको स्मरण गर्दै उहाँले नेपालको भविष्य सुन्दर देख्ने दृष्टि कायम राखेकोमा सम्पूर्ण तेह्रथुमबासीलाई धन्यवाद दिनुभयो ।

अध्यक्ष ओली पार्टीका सहकर्मी नेताहरूका साथ आज आफ्नो जन्मघर आठराई गाउँपालिका–४ इवा पुग्नुभयो । अध्यक्ष ओली आज जन्मघरमै बस्नुभयो भने पार्टीका अन्य नेताहरू पनि पाँचथरको आठराइमै बास बस्नुभएको छ । गृह जिल्ला तेह्रथुम र जन्मस्थल इवामा अध्यक्ष नेतृत्वको नेकपा (एमाले)को यात्रा अभियान टोलीलाई साँस्कृतिक झाँकी, बाजागाजा, विभिन्न भेषभूषामा भव्य स्वागत गरिएको थियो । 
यही मङ्सिर १४ गते बैतडीबाट मध्यपहाडी (पुष्पलाल) लोकमार्गमा ‘सम्बन्ध स्थानीय, सन्देश राष्ट्रिय’ नाराका साथ शुभारम्भ गरिएको ‘झुलाघाट–चिवाभञ्ज्याङः समृद्धिका लागि सङ्कल्प यात्रा पुस २ गते पाँचथरको चिवाभञ्ज्याङमा पुगेर समापन गरिने छ ।