७ साउन (२०८२), बुटवल । नेकपा (एमाले)का उपाध्यक्ष एवं उपप्रधानमन्त्री विष्णु पौडेलले एमालेलाई विभाजन गर्न खोज्नेहरूको सपनामाथि तुषारापात भएको बताउनुभएको छ ।
मुलुकको सर्वोच्च संस्था राष्ट्रपति जस्तो पदमा आसिन भैसकेको व्यक्ति पार्टी राजनीतिमा आउनु उपयुक्त नहुने भनेर नेकपा (एमाले)को केन्द्रीय कमिटीले एकमतले निर्णय गरेपछि विभाजन चाहनेहरूको सपना तुहिएको बताउनुभयो ।
नेकपाका संस्थापक महासचिव पुष्पलालको स्मृति दिवसका अवसरमा बुधबार बुटवलमा नेकपा (एमाले) रूपन्देहीद्वारा आयोजित अन्तर्क्रिया कार्यक्रमलाई सम्बोधन गर्दै उपाध्यक्ष पौडेलले यस्तो बताउनुभएको हो ।
‘विगतमा एमालेको विभाजनमा भूमिका खेलेकाहरूले अहिले फेरि पनि विभाजन गर्न सकिन्छ कि भनेर कोसिस गरिरहेका थिए, तर पार्र्टीले एकमतले निर्णय गरेपछि उनीहरूको सपनामाथि तुषारापात भएको छ’, उपाध्यक्ष पौडेलले भन्नुभयो–पार्टीभित्र अस्थिरता मच्चाउने र विभाजनको कोसिस गर्ने तत्वहरूको सपना विफल भएको छ ।
अर्थमन्त्री पौडेलले चौतर्फी हमलाका बाजुद पनि सरकार आफ्नो मिसनमा अगाडि बढिरहेको पनि बताउनुभयो ।
उहाँले देशलाई अस्थिर बनाइराख्ने तत्वहरूले सरकारलाई असफल बनाउन विभिन्न प्रयत्न गरिरहेको उल्लेख गर्दै तर सरकारले यी सबै प्रयत्नलाई चिर्दै अगाडि बढिरहेको बताउनुभयो ।
सरकार ढल्दैछ भनेर बारम्बार प्रचार गर्ने गरिएको, केही भएन भनेर नकारात्मक भाष्य सिर्जना गर्न खोजिएको र सिङ्गो समाजलाई गलत दिशातर्फ धकेल्न सकिन्छ कि भनेर प्रयत्न गरिएको भन्दै अर्थमन्त्री पौडेलले भन्नुभयो– यस्ता खाले सबै प्रयत्नलाई चिरेर सरकार मुलुकमा सुशासन, आर्थिक विकास र समृद्धिको सपना साकार पार्ने दिशामा अगाडि बढेको छ ।
उहाँले काँग्रेस–एमाले गठबन्धन मुलुकमा सुशासन र स्थिरता दिनका लागि निर्माण गरिएको भन्दै आगामी २०८४ सम्मै यो गठबन्धन कायम रहने पनि बताउनुभयो । ‘बाहिर जसरी गठबन्धन भत्किँदैछ भनेर प्रचार गरिए पनि त्यसमा कुनै सत्यता छैन, शान्ति, स्थिरता र सुशासनका लागि गठबन्धनको निर्माण भएको हो’, अर्थमन्त्री पौडेलले भन्नुभयो– आगामी २०८४ सम्म यो गठबन्धन तलमाथि हुँदैन ।