२० साउन (२०८२), काठमाडौं । नेकपा (एमाले)का महासचिव शंकर पोखरेलले पार्टीको विधान महाधिवेशन मुलतः नीति निर्माणको  अधिवेशन भएको स्पष्ट गर्नुभएको छ ।
पार्टीको दोस्रो विधान महाधिवेशनको सन्दर्भमा आज पार्टी केन्द्रीय कार्यालयमा आयोजित प्रचार योजना बैठकलाई सम्बोधन गर्दै महासचिव पोखरेलले विधान महाधिवेशनले पार्टीको नीति, विधि र भविष्यको नेतृत्वका सन्दर्भमा महत्वपूर्ण निर्णयहरू गर्ने बताउनुभयो । 
नेतृत्व छान्ने महाधिवेशन र नीति बनाउने महाधिवेशन एउटै हुँदा नीतिका कुरा ओझेलमा परेका र नेतृत्वका बारेमा मात्र बहस र प्रतिष्पर्धा हुन थालेपछि एमालेले विधान महाधिवेशन र राष्ट्रिय महाधिवेशन गर्न शुरू गरेको महासचिव पोखरेलले स्पष्ट गर्नुभयो । 
नेकपा (एमाले)को पहिलो विधान महाधिवेशन २०७८ मा भएको थियो भने यो दोस्रो विधान महाधिवेशन हो । पार्टीको दोस्रो विधान महाधिवेशन भदौ २० देखि २२ गतेसम्म ललितपुरको गोदावरीस्थित सनराईज हलमा हुँदैछ । 
विधान महाधिवेशनमा राजनीतिक प्रतिवेदन, संगठनात्मक प्रस्ताव, विधि निर्माण र चारवटा केन्द्रीय निकायको प्रस्तुति रहने महासचिव पोखरेलले बताउनुभयो । 
पार्टीले मिसन–२०८४ बाट एमालेलाई निर्णायक रूपमा सफल बनाउन चाहेकाले यो विधान महाधिवेशनलाई मिसन– २०८४ सँग जोड्नुपर्छ भन्दै उहाँले यतिवेला पार्टीको भविष्य जोडिएको नेतृत्वमाथि चौतर्फी हमला भइरहेकाले प्रतिरक्षा गर्नु सिङ्गो पार्टीको कर्तव्य भएको बताउनुभयो । 
महासचिव पोखरेलले पूर्वराष्ट्रपतिको पार्टी सदस्यता नविकरण विशिष्ट प्रकारको विषय भएकाले यसका लागि विशेष निर्णय नै गरिएको स्पष्ट पार्नुभयो । उहाँले भन्नुभयो– उहाँ विशिष्ट व्यक्तित्व हो । सम्मानित व्यक्तित्व हो । त्यसैले पार्टीले पनि विशिष्ट प्रकारले सम्मानजनक निर्णय गरेको छ । उहाँले पूर्व राष्ट्रपतिका सन्दर्भमा नकारात्मक टिकाटिप्पणी रोकिनुपर्ने धारणा राख्नुभयो । 
महासचिव पोखरेलले विधान महाधिवेशनलाई राजनीतिक उत्सवको रूपमा मनाउनुपर्ने र यस सन्दर्भमा पार्टीको गौरवपूर्ण विगतको सम्झना गर्नुपर्ने बताउनुभयो । 
महाधिवेशनका सन्दर्भमा पार्टीले व्यहोरेका उतार चढाव, सरकारको नेतृत्व गर्दा हासिल गरेका उपलब्धि आदिका बारेमा ब्यापक चर्चा परिचर्चा गरेर जनजनमा विधान महाधिवेशनका सन्दर्भमा चासो र जिज्ञासा जागरण गराउनुपर्नेमा उहाँले जोड दिनुभयो । 
बैठकमा प्रचार तथा प्रकाशन विभाग प्रमुख राजेन्द्र गौतमले एक साताभित्र विभागले विधान महाधिवेशनको प्रचारका लागि विस्तृत कार्ययोजना बनाएर पार्टी केन्द्रीय कार्यालयमा बुझाउने बताउनुभयो । उहाँले केही दिन अघिको केन्द्रीय कार्यालय बैठकले महाधिवेशनको तयारीका सन्दर्भमा विभिन्न नेताहरूलाई दिएको जिम्मेवारीका बारेमा जानकारी गराउनुभयो ।
आजको बैठकमा पार्टीको केन्द्रीय प्रचार तथा प्रकाशन विभागका सदस्यहरू, प्रेस चौतारी नेपालका पदाधिकारीहरूका साथै पार्टीको बाग्मती प्रदेश र केही जनसङ्गठनका प्रचार प्रमुखहरूको उपस्थिति रहेको थियो ।