२७ साउन (२०८२), काठमाडौं । नेकपा (एमाले)का केन्द्रीय सदस्य विष्णु रिजालले पार्टीका अध्यक्ष एवं प्रधानमन्त्री केपी शर्मा ओलीले नै अर्को कार्यकाल पार्टीको नेतृत्व गर्नुपर्ने आवश्यकता ठानिएरै विधानका कतिपय व्यवस्था संशोधन गर्न लागिएको बताउनुभएको छ । 
मानव अधिकार एलायन्सका इन्चार्ज समेत रहेका युवा नेता रिजालले मंगलवार वीरगन्जमा आयोजित संगठनको कार्यक्रममा एमालेमा नेतृत्व बदल्नु पर्छ कि पर्दैन भन्ने कुरा एमालेको आन्तरिक विषय हो, अरूको होइन भन्नुभयो । 
उहाँले भन्नुभयो– पार्टीको अध्यक्ष कसलाई बनाउने ? के गर्ने भन्ने कुरा एमालेले गर्ने हो । केपी शर्मा अ‍ोलीकै नेतृत्व एकपटक आवश्यक छ भन्ने एमालेलाई महसुस भयो । मोही माग्ने ढुङ्ग्रो लुकाउने गर्नु आवश्यक छैन । उहाँलाई फेरि अध्यक्ष बनाउनकै लागि विधानको ७० वर्षे व्यवस्था हटाएका हौं । 
पार्टी पदाधिकारीमा दुई कार्यकालको व्यवस्था दशौं महाधिवेशनमै हटाइसकेको र डा. पुष्प कँडेललाई लेखा आयोगको तेस्रो पटक अध्यक्ष बनाइएको केन्द्रीय सदस्य रिजालले स्मरण गराउनुभयो । 
पार्टीको केन्द्रीय कमिटी बैठकले विधान संशोधन प्रस्ताव पारित गरी छलफल र सुझावका लागि मातहतका कमिटीमा पठाएको छ । आगामी भदौ २०–२२ मा हुने पार्टीको दोस्रो विधान महाधिवेशनबाट पार्टीको विधान संशोधन गरिने छ ।