३ भदौ (२०८२), संखुवासभा । नेकपा (एमाले)का स्थायी कमिटी सदस्य एवं केन्द्रीय प्रचार तथा प्रकाशन विभाग प्रमुख राजेन्द्र प्रसाद गौतमले राष्ट्रिय गौरवको पद राष्ट्रपति भैसकेको व्यक्ति पार्टीको सदस्य भएर काम गर्न नमिल्ने बताउनुभएको छ । 
पूर्व राष्ट्रपति विद्यादेवी भण्डारीलाई राजनीति बाहेक सामाजिक सेवाको क्षेत्रमा लाग्न सुझाउँदै नेता गौतमले पूर्व राष्ट्रपतिलाई आफ्नो गर्विलो हैसियत नबिर्सन अनुरोध गर्नुभयो । 
उहाँले पूर्व राष्ट्रपति भण्डारीको पार्टी सदस्यताबारे अन्तरपार्टी निर्देशनमै उल्लेख भएकाले यसबारे धेरै चर्चा गर्नु आवश्यक नरहेको स्पष्ट पार्नुभयो । 
आज नेकपा (एमाले) संखुवासभा जिल्ला कमिटीको छैटौँ पूर्ण बैठकलाई सम्बोधन गर्दै नेता गौतमले पार्टीको आसन्न विधान महाधिवेशनको सन्दर्भमा महत्वपूर्ण सुझावहरू दिन जिल्ला कमिटीलाई आग्रह गर्नुभयो । यही भदौ २० गतेबाट सुरु हुने विधान महाधिवशनमा सङ्खुवासभाबाट १४ जना प्रतिनिधि सहभागी हुनेछन् ।
बैठकमा केन्द्रीय सदस्य तुलसी प्रसाद न्यौपानेले अन्तरपार्टी निर्देशनको महत्वका बारेमा प्रष्ट पार्नुभएको थियो । त्यस्तै, बैठकमा कोशी प्रदेश कमिटी अध्यक्ष घनश्याम खतिवडाले पार्टी सदस्यता नवीकरण र विस्तारलाई जोडदिन आग्रह गर्नुभयो । 
बैठकमा जिल्ला अध्यक्ष खड्ग बहादुर राईले एक करोड सात लाख २७ हजार पाँचसयको आर्थिक प्रतिवेदन र वार्षिक कार्ययोजना प्रस्तुत गर्नुभयो । बैठकमा प्रस्तुत भवन निर्माणसहितको कार्ययोजना सर्वसम्मतले पारित गरेको छ । 
कार्ययोजनामा २०८३ को असारभित्रमा करिब भवन निर्माणको काम सम्पन्न गर्ने लक्ष्य रहेको छ ।
भवन निर्माणका लागि पार्टी सदस्यहरूबाट सहयोग सङ्कलन अभियान चलाउने र देउसीभैलो समेत खेल्ने तयारी रहेको जिल्ला प्रचार विभाग प्रमुख नविन दाहालले बताउनुभयो । बैठकमा केन्द्रीय विभाग र प्रदेश कमिटी सदस्यहरू, जिल्ला कमिटी पदाधिकारी तथा सदस्यहरूको उपस्थिति रहेको थियो ।