५ भदौ (२०८२), काठमाडौं । नेकपा (एमाले)का महासचिव शंकर पोखरेलले यतिवेला पार्टीको पुरै ध्यान विधान महाधिवेशनमा केन्द्रित भएको बताउनुभएको छ । 
नेकपा (एमाले) मधेस प्रदेशले विधान संशोधनको लागि बर्दिबासमा आयोजना गरेको सुझाव सङ्कलन बैठकमा बोल्दै महासचिव पोखरेलले विधान महाधिवेशनमा विधान संशोधनका लागि केन्द्रको प्रस्ताव तलसम्म पठाइसकिएकाले त्यसमा आवश्यक सुझाव दिन आग्रह गर्नुभयो । 
पार्टीमा उमेरहद, कार्यकाल र पूर्वराष्ट्रपति सक्रिय राजनीतिमा फर्कने कि नफर्कने भन्ने विषय पार्टीले टुङ्ग्याइसकेकाले अब त्यसमा बहस आवश्यक नरहेको उहाँले स्पष्ट पार्नुभयो । 
अब नेकपा (एमाले)को राष्ट्रिय गन्तव्य समृद्ध नेपाल सुखी नेपाली भएको उहाँले बताउनुभयो । अब यो विषय राष्ट्रिय आकाङ्क्षा मात्र होइन पार्टीहरूको लक्ष बन्नुपर्नेमा महासचिव पोखरेलले जोड दिनुभयो । 
पार्टीमा मुख्य नेतृत्वको वरिपरि सबै केन्द्रित रहनुपर्ने बताउँदै उहाँले बहुपदीयको अर्थ बहुगुट हुनु नभएको स्पष्ट पार्नुभयो । पार्टीको नीति र कार्यक्रमप्रति सबैको प्रतिबद्धता तथा नेतृत्वप्रतिको अधीनस्थताले पार्टीलाई बलियो बनाउने महासचिव पोखरेलले बताउनुभयो । पार्टीलाई सबल बनाउने हो भने सिङ्गो पार्टी नेतृत्वको वरिपरि हुनुपर्दछ’, उहाँले भन्नुभयो । 
पार्टीलाई बहुसङ्ख्यक जनताको माझमा पुर्याउन पार्टीमा दुई खालका सदस्यताको प्रस्ताव ल्याइएको महासचिव पोखरेलले स्पष्ट गर्नुभयो । ‘चुनावका बेलामा काम नलाग्ने, नेता कार्यकर्ताको कुनै अर्थ छैन, अघि पछि एमाले हुने, चुनावको बेला कता भोट हाल्छ भन्ने ठेगान नहुने नेता कार्यकर्ताको के अर्थ ?’, उहाँले भन्नुभयो ।  
राजनीतिक सङ्घर्षको केन्द्रीय थलो निर्वाचन भएको बताउँदै अब चुनावमा काम लाग्ने नेता, कार्यकर्ता र पार्टी बनाउनुपर्नेमा उहाँले जोड दिनुभयो ।  
अहिले पार्टी र पार्टी नेतृत्वका विरुद्ध चौतर्फी घेराबन्दी र आक्रमण भइरहेको बताउँदै महासचिव पोखरेलले भन्नुभयो– एमालेको सबैभन्दा चर्को विरोध एमाले देशभक्त भएको मन नपराउनेले गरिरहेका छन् । 
मधेस बनाउनको लागि मधेस प्रदेश र मधेसका स्थानीय तहमा एमाले नेतृत्वको सरकार आवश्यक रहेको उहाँले बताउनुभयो । 
पार्टीको महाधिवेशनमा पार्टीलाई कसरी निर्णायक शक्ति बनाउन सकिन्छ भन्ने विषयमा छलफल गरिने उहाँले बताउनुभयो । मिसन– २०८४ लाई केन्द्रित गरी पार्टीको अभियान अघि बढ्ने महासचिव पोखरेलले स्पष्ट पार्नुभयो । 
उहाँले लोकप्रिय हुनुको अर्थ राजनीतिमा सफल हुनु नभएको धारणा राख्दै राजनीति लोकप्रियताले मात्र चल्ने नभई विचार, सिद्धान्त र आदर्शबाट चल्ने बताउनुभयो । लोकप्रियताका माध्यमबाट चर्चामा आएका राष्ट्रिय स्वतन्त्र पार्टीका सभापति ठगीमा संलग्न भएकै कारण जेलमा पुगेको महासचिव पोखरेलको भनाइ छ । 
अहिले मुलुकमा शान्ति, समृद्धि, स्थिरता र सुशासनको लागि एमालेले सरकारको नेतृत्व गरेको उहाँले बताउनुभयो । आफ्नो स्वार्थका लागि समाजलाई उत्तेजित बनाउने काम नगर्न पनि महासचिव पोखरेलले आग्रह गर्नुभयो ।