आमजनता पार्टीका वरिष्ठ उपाध्यक्ष उपेन्द्र साहसहित विभिन्न नेता कार्यकर्ता एमालेमा प्रवेश 

६ भदौ (२०८२), काठमाडौं ।  नेपाल कम्युनिष्ट पार्टी (एमाले)का अध्यक्ष एवं प्रधानमन्त्री केपी शर्मा ओलीले आमजनता पार्टी (आजपा)का वरिष्ठ उपाध्यक्ष उपेन्द्र साहसहित विभिन्न नेता कार्यकर्तालाई आज पार्टी प्रवेश गराउनुभएको छ ।

पार्टी केन्द्रीय कार्यालय, ललितपुरको च्यासलमा आयोजित कार्यक्रममा एमालेका पूर्वकेन्द्रीय सदस्यसमेत रहनुभएका साहसहितका नेता तथा कार्यकर्तालाई उहाँले पार्टीमा प्रवेश गराउनुभएको हो ।

सो अवसरमा आजपाका स्थायी कमिटी सदस्य मनोजकुमार यादव, फतुवा विजयपुर नगरपालिकाका पूर्वउपप्रमुख कान्तिदेवी महतो, माधवनारायण नगरपालिकाका पूर्वउपप्रमुख सिमलकुमारी साहसहित रौतहट र धनुषाका अन्य नेताहरु पनि एमालेमा प्रवेश गर्नुभयो । यसैगरी, पार्टी प्रवेश गर्ने आजपाका अन्य नेताकार्यकर्ताहरूमा रिमाकुमारी यादव, श्याम यादव, लालबहादुर साह, राजेशप्रसाद साह, श्याम नन्दन प्रसाद कानु र रञ्जन साह कानु हुनुहुन्छ । 

अध्यक्ष ओलीले नवप्रवेशीहरुलाई पार्टीमा स्वागत गर्दै गलत बाटो देखाउनेको बहकावमा लागेर केही समय अलमलमा परे पनि अब सही घरमा आउनुभएकामा सबैलाई धन्यवाद दिनुभयो ।

“हामी शान्ति, मानवता, विकास र सुख चाहन्छौँ । अपराध सोचेर बस्नेहरूको जञ्जालबाट तपाइंहरु मुक्त हुनुभएको छ, अध्यक्ष ओलीले भन्नुभयो, “एमालेको ठूलो परिवार भएर काम गरौँ । मिलेर देश बनाउँ । गलत काम नगरौँ ।”

पूर्वराष्ट्रपति विद्यादेवी भण्डारीको पार्टी सदस्यता कायम हुनु नहुनेबारे एमाले केन्द्रीय कमिटीको निर्णयका सम्बन्धमा स्पष्ट हुन आग्रह गर्दै अध्यक्ष ओलीले भन्नुभयो, “अहिले पूर्वराष्ट्रपतिको सदस्यता खोसिएको भन्ने आरोपका कुराहरु आएका छन्, खासमा राष्ट्रपति भएपछि उहाँले पार्टी सदस्यता त्याग्नुभएको हो । कर्मचारीलाई झुक्याएर रसिद काट्दैमा हुँदै नभएको सदस्यता कायम हुँदैन ।”

‘उहाँ आफैले पार्टीको सदस्यता छोडेर राष्ट्रपति हुन जानुभएको हो, सदस्य रहनका लागि राष्ट्रपति हुन नजानुपर्थ्यो । सदस्य छैन भने नवीकरण कसरी हुन्छ ? छाडेको सदस्यता नवीकरण हुँदैन, भइरहेको सदस्यता मात्र नवीकरण हुन्छ’, स्पष्ट पार्दै अध्यक्ष ओलीले पूर्व राष्ट्रपतिको सदस्यताका बारेमा कोही पनि भ्रममा नपर्न आग्रह गर्नुभयो । 

अध्यक्ष ओलीले भन्नुभयो, “पार्टीमा आएर सदस्यता नवीकरण र नयाँ सदस्यताका लागि निवेदन दिनुभएको पनि छैन । पार्टीमा असन्तुष्ट र एकाध जनसङ्गठनमा हारेकाहरुलाई जम्मा गरेर उहाँले पार्टी एकतामा यसरी असहयोग गर्नुहोला भन्ने हामीले कल्पना पनि गरेका थिएनौँ ।”

कार्यक्रममा नेता उपेन्द्र साहले प्रभु साह नेतृत्वको आजपाले जनताका लागि काम गर्छ भन्नु भ्रम रहेकोे भन्दै देश र जनताका पक्षमा काम गर्ने पार्टी एमाले नै हो भन्ने विश्वाससहित आजपाका नेता तथा कार्यकर्तासहित आफू एमालेमा प्रवेश गरेको बताउनुभयो ।