मर्चवार समृद्धिको जिम्मा एमालेले लिन्छः उप्रधानमन्त्री एवं अर्थमन्त्री पौडेल
१४ भदौ (२०८२), रुपन्देही ।  नेकपा (एमाले)का उपाध्यक्ष तथा उपप्रधानमन्त्री विष्णुप्रसाद पौडेलले मुलुकको समुन्नत विकासका लागि बलियो पार्टी र सक्षम नेतृत्व अपरिहार्य भएको बताउनुभएको छ ।
शनिबार मर्चवारमा आयोजित बृहत पार्टी प्रवेश कार्यक्रममा बोल्दै उहाँले एमाले देशको नेतृत्व गर्न सक्ने पार्टी भएको र पार्टीमा जनता र नेताहरूको आकर्षण बढिरहेको बताउनुभयो । 
‘बलियो पार्टी बिना देशको विकास सम्भव छैन भन्ने कुरा बुझेर आज हजारौं जनता, पूर्व अध्यक्षहरूसहित, एमालेमा प्रवेश गर्नुभएको छ’, उपाध्यक्ष पौडेलले भन्नुभयो– यसबाट म निकै खुसी छु ।
उहाँले मर्चवारको विकासको जिम्मा एमालेलाई दिन आग्रह गर्दै, आगामी २–४ वर्षभित्र मर्चवार क्षेत्रलाई बुटवल, भैरहवा र लुम्बिनीजस्तै बनाउने प्रतिबद्धता जनाउनुभयो ।
सरकारी अस्पताल, सरकारी क्याम्पस निर्माण तथा अन्य पूर्वाधार विकासका लागि बजेट व्यवस्था गर्ने प्रतिबद्धता पनि उहाँले जनाउनुभयो । ‘आजको मितिदेखि मर्चवारलाई पछाडि पर्न दिने छैनौं’, उपप्रधानमन्त्री पौडेलले स्पष्ट पार्नुभयो ।
पार्टी प्रवेश कार्यक्रमलाई सम्बोधन गर्दै पार्टीका पोलिटब्युरो सदस्य लिला गिरीले मर्चवार क्षेत्रको पूर्वाधार विकास तथा कृषिको आधुनिकीकरणमा पार्टीले उल्लेखनीय काम गरेर देखाउने प्रतिवद्धता जनाउनुभयो ।
कार्यक्रममा सम्मरीमाई गाउँपालिकाका पूर्व अध्यक्ष जितेन्द्रनाथ शुक्ला र मर्चवारी गाउँपालिकाका पूर्व अध्यक्ष केशवनन्दन बानियाले उपप्रधानमन्त्री पौडेल समक्ष मर्चवार क्षेत्रमा चार लेनको रिङ्ग रोड निर्माण गर्न आग्रह गर्नुभयो ।
शुक्लाले मलखाद, कृषि सामग्री र सिँचाइ सुविधा सहज रूपमा उपलब्ध गराउन सरकारको ध्यानाकर्षण गराउनुभयो । एमालेमा प्रवेश गर्दै शुक्लाले भन्नुभयो– बलियो पार्टी बिना विकास सम्भव छैन भन्ने बुझेर मैले एमाले रोजेको हुँ ।
कार्यक्रममा नेताहरूले एमाले मात्र देश विकासको प्रमुख आधार हुन सक्ने निष्कर्ष प्रस्तुत गरेका थिए । कार्यक्रममा एमाले नेताहरू तुलसीप्रसाद चौधरी र सुनिता ठटेरले तराई मधेशको समृद्धि एमालेकै नेतृत्वमा सम्भव हुने भन्दै पार्टीमा आबद्ध भएकालाई स्वागत गर्नुभयो ।