१४ भदौ (२०८२), काठमाडौं । नेकपा (एमाले)का उपमहासचिव प्रदीप ज्ञवालीले पूर्वराष्ट्रपति विद्यादेवी भण्डारीको पार्टी सदस्यता नवीकरण नहुने बताउनुभएको छ । 
शनिबार प्रेस चौतारीको केन्द्रीय कार्यालयमा आयोजित पार्टीको दोस्रो विधान महाधिवेशनको सन्दर्भमा भएको अन्तरसम्वाद कार्यक्रममा उपमहासचिव ज्ञवालीले पार्टीले संस्थागत निर्णय गरेर प्रणाली बसाइसकेकाले अब पूर्व राष्ट्रपति भण्डारीको पार्टी सदस्यता नवीकरणको कुरा उठाउनु आवश्यक नभएको स्पष्ट गर्नुभयो । 
राष्ट्रपति र उपराष्ट्रपति जस्ता पदमा पुगेका व्यक्तिहरूले पार्टीमा आबद्ध हुनेभन्दा पनि देशकै अभिभावकीय भूमिका निर्वाह गर्नुपर्नेमा जोड दिँदै उहाँले संविधानको धारा ६२ को उपधारा ६ मा निर्वाचित वा मनोनित जुनसुकै पदमा भए पनि राष्ट्रपति वा उपराष्ट्रपतिमा निर्वाचित हुने बित्तिकै सबै पदहरूबाट स्वतः मुक्त हुने कुरा उल्लेख भएको स्मरण गराउनुभयो । 
उपमहासचिव ज्ञवालीले पार्टी अप्ठ्यारो परिस्थितिबाट गुज्रिरहेको समयमा बोल्ड लिडर आवश्यक पर्ने र त्यो प्रधानमन्त्री एवं पार्टी अध्यक्ष केपी शर्मा ओली नै भएको र उहाँको नेतृत्वमा मात्रै पार्टीले वर्तमान चुनौतीहरूको सामना गर्न सक्ने बताउनुभयो । 
एमालेले जनताको बहुदलीय जनवाद (जबज)को विकल्प खोज्न थाल्यो भनेर बुझ्दै नबुझि टिकाटिप्पणी भइरहेकोमा आपत्ति जनाउँदै उहाँले माक्र्सवाद–लेनिनवादलाई नेपालको विशिष्ट परिस्थितिमा लागू गर्ने क्रममा यसको सिर्जनात्मक प्रयोगको रूपमा एमालेले जबज ल्याएको र नेपालको सन्दर्भमा माक्र्सवाद भनेकै जबज भएको स्पष्ट पार्नुभयोे । 
उपमहासचिव ज्ञवालीले पार्टीको पाँचौँ राष्ट्रिय महाधिवेशनमा कार्यक्रम भने पनि सिद्धान्तका आधारहरू रहेको, छैटौँ महाधिवेशनमा निर्देशक विचारको रूपमा सबै विचारहरूलाई मार्गदर्शन गरेको, सातौँमा त्यसैलाई निरन्तरता दिएको, आठौँमा मार्गदर्शक सिद्धान्त भनेको, नवौँमा २० वर्षको अभ्यासले जबज कसरी सही प्रमाणित भयो भन्ने विषयमा छलफल गरेको र दशौँमा त्यसलाई अझ माथि उठाएको जबजको विकासक्रमबारे स्पष्ट गर्नुभयो । यही कारण जबजलाई मार्गदर्शक सिद्धान्तको रूपमा थप पुष्टि गर्नुपर्ने उहाँको भनाइ छ ।
पार्टीको यस महाधिवेशनमा जबजले सामन्तवादको अन्त्य गर्न, निरङ्कुश राजतन्त्र अन्त्य गरेर संघीय लोकतान्त्रिक गणतन्त्र स्थापना गर्न, सामाजिक न्याय, समावेशीता र मौलिक अधिकारसहितको प्रणाली स्थापित गर्न, समाजवादउन्मुख संविधान निर्माण गर्न मार्गदर्शन गरेको विषयमा जोड दिइने उपमहासचिव ज्ञवालीले बताउनुभयो । 
जबजको यात्रा यहाँ मात्रै नरोकिने भन्दै अब समृद्धिको यात्रामा जानका लागि जबजलाई समयाअनुकूल विकास गर्नुपर्ने र यस विकासको क्रममा लोकतान्त्रीकरणका कुराहरू पनि थप गर्न खोजिएको उहाँले जानकारी दिनुभयो ।
कार्यक्रममा पार्टीका स्थायी कमिटी सदस्य तथा संगठन विभाग प्रमुख काशीनाथ अधिकारी र केन्द्रीय प्रचार तथा प्रकाशन विभाग प्रमुख राजेन्द्र गौतमको पनि उपस्थिति रहेको थियो ।