१४ भदौ (२०८२), ललितपुर । नेपाल कम्युनिष्ट पार्टी (एमाले) का महासचिव शंकर पोखरेलले अध्यक्ष केपी शर्मा ओलीकै नेतृत्वमा राष्ट्रिय स्वाभिमान, स्थायित्व र समृद्धि सम्भव हुने बताउनुभएको छ । 
आज गोदावरी नगर कमिटीद्वारा आयोजित कार्यकर्ता भेला तथा प्रशिक्षण कार्यक्रममा सम्बोधन गर्दै महासचिव पोखरेलले भन्नुभयो– देशमा अध्यक्ष ओलीको विकल्प छैन । संसदमा दोस्रो ठूलो पार्टी भए पनि जनताको मनमा एमाले नै पहिलो पार्टी हो । 
महासचिव पोखरेलले ७० वर्षे उमेर सीमा हटाइएको अध्यक्ष ओलीका लागि मात्र नभएको तर नेतृत्व क्षमता र राजनीतिक दृष्टिकोणकै कारण उहाँ राष्ट्रको निर्विकल्प रहेको दोहोर्याउनुभयो । उहाँले भन्नुभयो– संवैधानिक संसदीय व्यवस्थामा राष्ट्रपतिको छुट्टै स्थान छ । पूर्व राष्ट्रपति सम्मानित र मर्यादित रहनु आवश्यक छ । पार्टीले आफ्नो नेताको सम्मानमा कुनै कसर बाँकी राखेको छैन ।
भारतले लगाएको नाकाबन्दीको अध्यक्ष ओलीकै नेतृत्वमा डटेर सामना गरिएको स्मरण गर्दै महासचिव पोखरेलले भन्नुभयो– कालापानी, लिपुलेक र लिम्पियाधुरासहितको नेपालको नक्सा बदल्ने सामथ्र्य ओलीबाहेक कसैमा छैन । ढिलोचाँडो छिमेकीले पनि यस विषयमा सुन्नै पर्छ ।
उहाँले एमाले पटक–पटक विभाजित भए पनि पुनः संगठित हुने क्षमता राख्ने पार्टी भएको स्पष्ट गर्नुभयो । महासचिव पोखरेलले भन्नुभयो– दूरदर्शी नेतृत्व अध्यक्ष ओलीमै छ, एमाले बलियो राजनीतिक शक्ति बनेको छ र अब पार्टी ‘मिसन– २०८४’ सफल पार्दै अघि बढ्छ ।
कार्यक्रममा पार्टीका स्थायी कमिटी सदस्य तथा बाग्मती प्रदेश इञ्चार्ज डा. राजन भट्टराईले पनि पार्टीभित्र निराश हुने अवस्था नरहेको बताउनुभयो । 
उहाँले भन्नुभयो– २०७९ को तुलनामा अहिलेको परिवेश अनुकूल हुँदै गएको छ । व्यक्तिगत दम्भ र जुँगाको लडाइँ त्यागेर फराकिलो छाती बनाएर पार्टी एक भए विजय सुनिश्चित हुनेछ ।
डा. भट्टराईले पार्टी एकता, संगठन विस्तार र कार्यकर्ताको सक्रियताबाट ‘मिसन– २०८४’ सफल पार्दै एमाले अझ शक्तिशाली बन्ने विश्वास व्यक्त गर्नुभयो ।
नगर कमिटी अध्यक्ष विक्रम घिमिरेले विधान महाधिवेशन गोदावरीमै हुनु नगरवासीका लागि सुखद भएको बताउनुभयो । उहाँले गोदावरीमा गुट उपगुटलाई ठाउँ नदिइन अठोट गर्दै २०५४ सालको एमालेको विरासत २०८४ सालमा फर्किने विश्वास व्यक्त गर्नुभयो । यसैगरी, कमिटी उपाध्यक्ष रमी प्रधानाङ्गले समय–समयमा आन्तरिक तथा बाह्य प्रहार भए पनि एमाले कहिल्यै विचलित नभएको स्मरण गर्दै सबै स्थानीय कार्यकर्ता एकताबद्ध भई संगठन सुदृढ बनाउन लाग्नुपर्नेमा जोड दिनुभयो । कार्यक्रममा पार्टीका पोलिटव्यूरो सदस्य सुशीला नेपाल, केन्द्रीय सदस्यहरू बाबुराम थापा, रुपनारायण श्रेष्ठ, ललितपुर जिल्ला अध्यक्ष पुरुषोत्तम आचार्य लगायत नेताहरूको उपस्थिति रहेको थियो ।