-आन्दोलनबाट भएको जनधनको क्षतिबाट एमाले स्तब्ध, घटनामा ज्यान गुमाउनेप्रति श्रद्धाञ्जली र घाइतेप्रति शीघ्र स्वास्थ्यलाभको कामना  
-योजनाबद्ध रूपमा भएको विनाशकारी घटनाको निष्पक्ष छानबिन र दोषीमाथि कानुनी कारबाहीको माग
-असामान्य चुनौतीबीच पनि नेकपा (एमाले) उच्च मनोबल कायम गरी प्रतिकूलतालाई चिरेर दृढ विश्वासका साथ अगाडि बढ्ने 

२६ भदौ (२०८२), काठमाडौं । नेकपा (एमाले)ले अबको राजनीतिक निकास संविधान र लोकतान्त्रिक विधिबाट खोजिनुपर्नेमा स्पष्ट गर्दै युवा पुस्ताका माग सम्बोधन गर्नका लागि राष्ट्रपतिलाई सार्थक संवाद सुरु गर्र्न ध्यानाकर्षण गराएको छ । 
पार्टी केन्द्रीय सचिवालयका तर्फबाट महासचिव शंकर पोखरेलले  आज वक्तव्य जारी गरी मुलुकमा पछिल्ला दिनमा देखिएको असामान्य राजनीतिक परिस्थितिप्रति नेकपा (एमाले) गम्भीर र संवेदनशील बनेको जनाउनुभएको छ । 
हालको घटनाक्रमलाई ‘राष्ट्रलाई दशकौं पछाडि धकेल्ने विनाशकारी स्थिति’को रूपमा चित्रण गर्दै वक्तव्यमा संविधानसम्मत र लोकतान्त्रिक निकास खोजिनुपर्नेमा जोड दिइएको छ ।
भदौ २३ गते जेन्जी युवाहरूले सामाजिक सञ्जालको स्वतन्त्रता, सुशासन, भ्रष्टाचार र नातावादविरुद्ध प्रदर्शन गर्दा भएको जनधनको क्षतिप्रति एमाले स्तब्ध भएको जनाएको छ । 
सो घटनामा ज्यान गुमाउनेप्रति श्रद्धाञ्जली र घाइतेप्रति शीघ्र स्वास्थ्यलाभको कामना गर्दै वक्तव्यमा निष्पक्ष छानबिन र दोषीमाथि कानुनी कारबाहीको माग गरिएको छ ।
त्यसको भोलिपल्ट भदौ २४ गते देशव्यापीरूपमा भएको आगजनी, तोडफोड, लुटपाट र हिंसात्मक घटनाले मुलुक स्तब्ध बनेको र संसद, राष्ट्रपति भवन, सिंहदरबार, सर्वोच्च अदालत, विमानस्थल, प्रहरी कार्यालयलगायत संवैधानिक निकायमा गरिएको तोडफोड तथा अभिलेख नष्ट हुनु राष्ट्रका लागि ठूलो क्षति भएको एमालेले जनाएको छ । 
यस क्रममा १३ हजारभन्दा बढी कैदीबन्दी जेल तोडेर भाग्नु शान्ति–सुरक्षामा गम्भीर चुनौती बनेको एमालेको ठहर छ ।
वक्तव्यमा योजनाबद्ध रूपमा भएको विनाशकारी घटनाको सत्यतथ्य छानबिन गर्नुपर्ने माग गरिएको छ । साथै यति ठूलो विनाश रोक्न सुरक्षा निकाय प्रभावकारी हुन नसकेको विषयमा पनि समीक्षा हुनुपर्ने पार्टीको धारणा रहेको छ ।
प्रधानमन्त्रीको राजीनामापछि अबको राजनीतिक निकास संविधान र लोकतान्त्रिक विधिबाट खोजिनुपर्नेमा एमाले स्पष्ट रहेको बताएको छ । 
युवा पुस्ताका माग सम्बोधन गर्न सार्थक संवाद सुरु गर्न राष्ट्रपतिलाई ध्यानाकर्षण गराइएको छ । साथै संसद, न्यायपालिका, प्रदेश र स्थानीय तहले लोकतन्त्रको रक्षा र सेवा प्रवाहमा सक्रिय भूमिका खेल्नुपर्ने आग्रह गरिएको छ ।
एमालेले असामान्य स्थितिको लाभ उठाउँदै देशभर अझै पनि भइरहेको आगजनी र लुटपाट नियन्त्रणका लागि सेनासहित सबै सुरक्षा निकायलाई ध्यानाकर्षण गराएको छ । पार्टीले आफ्नो पङ्क्तिलाई सार्वजनिक कार्यालय सरसफाइ, सामाजिक सद्भाव कायम गर्न र पीडितलाई सहयोग पुर्याउन आह्वान गरेको छ ।
वक्तव्यमा भनिएको छ– असामान्य चुनौतीबीच पनि एमाले दृढ विश्वासका साथ अगाडि बढ्नेछ । उच्च मनोबल कायम गरी प्रतिकूलतालाई चिर्नु आवश्यक छ ।
 महासचिव पोखरेलद्वारा जारी वक्तव्य यस प्रकार छः