१३ मङ्सिर (२०८२), काठमाडौं । नेकपा (एमाले)का सचिव एवं ११औं राष्ट्रिय महाधिवेशन प्रचार समितिका संयोजक पद्मा अर्यालले पार्टीको नेतृत्वमा केपी शर्मा ओलीको विकल्प नरहेको बताउनुभएको छ । 
११औं महाधिवेशन प्रचार समितिको आज पार्टी कार्यालय च्यासलमा बसेको बैठकलाई सम्बोधन गर्दै सचिव अर्यालले यस्तो बताउनुभएको हो ।
उहाँले भन्नुभयो– यो विषम परिस्थितिबाट देश र पार्टीलाई जोगाउन फेरि पनि उहाँको विकल्प छैन । यो अहिलेको आवश्यकता हो ।  अहिले  एमालेमा केपी ओलीको विकल्प केपी ओली नै हो ।
पछिल्लो समय  महाधिवेशन नजिकिँदै गरेको र पार्टीको नेतृत्वको विषयमा बहस  भइरहँदा ओलीको विकल्प ओली नै रहेको अर्यालले प्रष्ट पार्नुभएको हो । उहाँले पार्टीको महाधिवेशनले अध्यक्ष केपी शर्मा ओलीलाई नै पुनः अनुमोदित गर्ने दृढ विश्वास  व्यक्त गर्नुभयो । 
मुलुकको वर्तमान सङ्कटपूर्ण राजनीतिक परिस्थितिलाई मध्यनजर गर्दै पार्टीभित्र सुदृढ एकताको आवश्यकतासमेत रहेको सचिव अर्यालले  औंल्याउनुभयो । उहाँले सम्बद्ध सबै पार्टी संरचना, संगठन  तथा कार्यकर्ताहरूलाई अझ उन्नत  एकता र आन्तरिक समन्वयलाई अझ मजबुत बनाउन  आग्रह गर्नुभयो ।
अध्यक्ष ओलीको नेतृत्वमा राष्ट्रलाई सही ढङ्गले दिशा निर्देश हुने  विश्वास सचिव अर्यालले व्यक्त गर्नुभयो ।
अहिले मुलुक अभूतपूर्व सङ्कटको घडीबाट गुज्रिइरहेको  बताउँदै उहाँले एमालेमाथि भैरहेको चौतर्फी प्रहारको सामना गर्न, राष्ट्र र राष्ट्रियता जोगाउन तथा कोमामा रहेको संविधानलाई बचाउन एमाले अझ सुदृढ, सबल, सक्षम र एकताबद्ध हुन जरुरी रहेको बताउनुभयो ।
सचिव अर्यालले भन्नुभयो– अहिले एमालेमा अध्यक्ष ओलीको अपरिहार्यता अझ बढेको छ, मुलुकमा देखापरेको विषम परिस्थितिबाट पार्टी, राष्ट्र  र राष्ट्रियता जोगाउन उहाँको विकल्प छैन । यो अहिलेको आवश्यकता हो ।
उहाँले पार्टीभित्रको एकता, स्थायित्व र प्रभावकारी नेतृत्वमार्फत देशसमक्ष उपस्थित चुनौती समाधान गर्न सकिने हुँदा यस सन्दर्भमा आम पार्टीपंक्ति गम्भीर हुँदै एकताबद्ध हुन आग्रह गर्नुभयो ।
अझै पनि पार्टीमा सहमतिका आधारमा नेतृत्व निर्माणको औचित्य र आवश्यकता  रहेको बताउँदै सचिव अर्यालले  केपी ओलीको अध्यक्षतामा सर्वसम्मत नेतृत्व निर्माण हुने विश्वास व्यक्त गर्नुभयो ।