राजविराज । नेकपा (एमाले) को मिसन ग्रासरुट (पार्टी सुदृढीकरण तथा विस्तार अभियान) अन्तर्गत सप्तरीको राजगढ गाउँपालिका वडा नं. ४ को बेल्ही र वडा नं.५ को मुसरनिया टोलमा भेला तथा प्रशिक्षण कार्यक्रम सम्पन्न भएका छन् । 
नेकपा (एमाले) का केन्द्रीय सदस्य तथा मिसन ग्रासरुटका लागि केन्द्रीय प्रतिनिधि सन्जिव झाको उपस्थिति र वडा कमिटीका अध्यक्ष अशोक साहको अध्यक्षतामा बेल्हीमा प्रशिक्षण सम्पन्न गरिएको छ । प्रशिक्षण कार्यक्रममा पार्टीका जिल्ला अध्यक्ष ताराकान्त चौधरी, राजगढ गाउँपालिकाका अध्यक्ष ओमप्रकाश मण्डल, राष्ट्रिय युवा संघ, नेपाल, सप्तरीका अध्यक्ष चितरन्जन यादवको उपस्थिति रहेको थियो । 
यसैगरी राजगढ गाउँपालिका वडा नं.५ को मुसरनियाटोलमा भएको  कार्यक्रमको अध्यक्षता वडा सचिव राम अवतार मन्डलले गर्नुभएको थियो ।
त्यस्तै शम्भुनाथ नगरपालिका वडा नं. ५ मोहनपुरमा भएको कार्यकर्ता भेलाको अध्यक्षता वडा सचिव हरिदेव चौधरीले गर्नुभएको थियो । उक्त कार्यक्रममा प्रदेश कमिटी सदस्य देव नारायण चौधरी, महेश चौधरी, शम्भुनाथ नगरपालिका अध्यक्ष श्रीनारायण चौधरी लगायतको उपस्थिति रहेको थियो ।