२१ चैत (२०८१), बैङ्कक  । प्रधानमन्त्री केपी शर्मा ओली आज बहुक्षेत्रीय प्राविधिक तथा आर्थिक सहयोगका लागि बङ्गालको खाडीको प्रयास (बिमस्टेक)कोे छैटौँ शिखर सम्मेलनमा भाग लिन थाइल्याण्ड आउनुभएका सदस्य मुलुकका राष्ट्रप्रमुख–सरकार प्रमुखसँगको साइडलाइन भेटवार्ता र अन्य भेटवार्तामा व्यस्त रहनुभयो । 
थाइल्याण्डको औपचारिक भ्रमणका कार्यक्रमहरू सकेर बिमस्टेककोे छैटौँ शिखर सम्मेलनमा भाग लिने क्रममा बैङ्ककमा रहनुभएका प्रधानमन्त्री ओलीसँग आज श्रीलङ्काका प्रधानमन्त्री डा. हरिनी अमरासुरिया, भूटानी प्रधानमन्त्री छिरिङ तोब्गे, म्यान्मारका प्रधानमन्त्री मिन आङ हलिङ र संयुक्त राष्ट्रसङ्घको एसिया प्रशान्त क्षेत्रका लागि आर्थिक तथा सामाजिक आयोगका कार्यकारी सचिव अमिदा सलैहले छुट्टाछुट्टै भेटवार्ता गर्नुभयो । 

श्रीलङ्काका प्रधानमन्त्री अमरासुरियासँगको भेटमा उहाँहरूबीच द्विपक्षीय सम्बन्ध र आपसी हितका विविध विषयमा छलफल भएको थियो । 
भेटमा परराष्ट्रमन्त्री डा. आरजु राणा देउवा, प्रधानमन्त्रीका मुख्य सल्लाहकार विष्णुप्रसाद रिमाल, परराष्ट्र मन्त्रालयका सचिव अमृतबहादुर राईलगायत सहभागी हुनुहुन्थ्यो ।

यसैगरी, भुटानी प्रधानमन्त्री तोब्गेसँगको साइडलाइट भेटवार्तामा उहाँहरूबीच गत सेप्टेम्बरमा संयुक्त राष्ट्रसङ्घको ७९औँ महासभाका क्रममा न्युयोर्कमा भएको भेटको स्मरणका साथै सहकार्यका विविध पक्षमा छलफल भएको थियो । 

यस्तै, प्रधानमन्त्री ओली र म्यान्मारको स्टेट एडमिनिस्ट्रेसन काउन्सिलका अध्यक्षसमेत रहनुभएका प्रधानमन्त्री हलिङबीचको साइडलाइट भेटवार्तामा दुईपक्षीय, क्षेत्रीय र बहुपक्षीय सम्बन्ध थप बलियो बनाउने विषयमा छलफल भएको थियो । 

यस्तै, संयुक्त राष्ट्रसङ्घको एसिया प्रशान्त क्षेत्रका लागि आर्थिक तथा सामाजिक आयोगका कार्यकारी सचिव अमिदा सलैहसँगको भेटमा उक्त निकायको नेपालमा सहकार्य र नेपालको विकासशील राष्ट्रमा स्तरोन्नतिमा सहयोगका विषयमा कुराकानी भएको थियो ।