detail-img

‘अंगीकृत नागरिकतामा गठबन्धन सरकारद्वारा आत्मसमर्पण’

ललितपुर । नेकपा (एमाले) का उपाध्यक्ष बिष्णु पौडेलले  एमाले बाहेक एक्लै चुनाव लड्ने शक्ति कुनै पनि पार्टीसँग नरहेको बताउनुभएको छ । 
नेकपा (एमाले) ललितपुरले बिहीबार आयोजना गरेको प्रशिक्षण भेलामा उपाध्यक्ष पौडेलले उक्त कुरा बताउनुभएको हो । 
उपाध्यक्ष पौडेलले गत स्थानीय तहको चुनावमा कांगे्रस पनि एक्ले चुनाव लड्न नसकेको बताउनुभयो । 
पौडेलले भन्नुभयो, “गत स्थानीय तहको चुनावमा कांग्रेसले चुनाव लड्न सकेन, माओवादीले चुनाव लड्न सकेन, माधव नेपालको झुण्डले चुनाव लड्न सकेन, जसपाले चुनाव लड्न सकेन, चुनाव लड्ने एकमात्र पार्टी भनेको एमाले हो । ”
नेकपा (एमाले) आर्थिक, सामाजिक, राजनीतिक रुपान्तरणको संवाहक भएको भन्दै उहाँले उत्पादक शक्तिको हित गर्ने, मजदुर किसान, निम्न पुँजीपति वर्ग र राष्ट्रिय पुँजीपति वर्गको हित एमालेले मात्रै गर्ने वताउनुभयो ।  
नेपालीहरू नेपालमा अल्पमतमा पर्ने गरी काँग्रेस नेतृत्वको सरकारले वैवाहिक अंगीकृत नागरिकताको व्यवस्था गरेर आत्मसमर्पण गरेको उहाँको भनाई थियो ।  
“यो गठबन्धन सरकारले आज विवाह गर्ने, भोलि बिहे दर्ता गर्ने, पर्सि नागरिकता प्राप्त गर्ने, निकपर्सी चुनावमा उठ्ने र एक महिनाको चुनाव प्रचारपछि अर्को महिना मन्त्री हुने अर्थात् विवाह गरेर आएको तीन महिनामा संघीय सरकारको मन्त्री समेत हुनेगरी ढोका खोलिदिएको छ”, पौडेलले भन्नुभयो । 
कार्यक्रममा नेकपा (एमाले) का स्थायी कमिटी सदस्य तथा बाग्मती प्रदेश इञ्चार्ज काशिनाथ अधिकारी, पोलिटब्यूरो सदस्य तथा ललितपुर ईञ्चार्ज सुशीला नेपाल, केन्द्रीय सदस्य तथा ललितपुर सह इञ्चार्ज हरिकृष्ण व्यञ्जनकार, केन्द्रीय सदस्य बाबुराम थापा, एमाले बाग्मती प्रदेश अध्यक्ष केशव पाण्डे, संघीय सांसद नवराज सिलवाल लगायतले मन्तव्य व्यक्त गर्नुभएको थियो । 

लोकप्रिय समाचार

cpnuml

लुम्बिनीका १२ जिल्लामा यसरी चलाइँदै छ प्रशिक्षण 

बुटवल । नेकपा (एमाले) लुम्बिनी प्रदेश कमिटीले पार्टी केन्द्रको निर्देशनअनुसार साउन २० र २१ गते प्रदेशस्तरीय प्रशिक्षण कार्यक्रम सकेपछि सबै जिल्लास्तरीय प्रशिक्षणका लागि मिति तय गरेर तयारी गरेको छ । 
सबै जिल्लामा पार्टी पदाधिकारी तथा अन्य शीर्ष नेतृत्वलाई सहभागिता गराएर जिल्ला तहमा रहेका अगुवा नेताहरूलाई प्रशिक्षणको तयारी गरिएको हो । 
कार्यक्रममा भरखरै सम्पन्न स्थानीय तहको निर्वाचनको आन्तरिक समीक्षा, नेतृत्व र कार्यकर्ताको समन्वयबारे छलफल, आगामी निर्वाचनको रणनीतिक तयारी तथा जिल्ला तहमा हुने विभागीय जिम्मेवारीका विषयमा गम्भीर छलफल हुनेछ ।  
प्रदेशस्तरीय प्रशिक्षणपछि रुपन्देहीमा २२ गते यसखालको कार्यक्रम सकिएको जिल्ला अध्यक्ष तेजेन्द्र केसीले बताउनुभयो । रुपन्देहीमा भएको प्रशिक्षणमा उपाध्यक्ष विष्णुप्रसाद पौडेल, महासचिव शंकर पोखरेल, उपमहासचिव प्रदीप ज्ञवाली तथा रुपन्देहीबाट पार्टी केन्द्रमा प्रतिनिधित्व गर्ने सबै नेताहरूको सहभागिता रहेको थियो । 
प्रदेश प्रचार विभागका प्रमुख डिआर घिमिरेका अनुसार नवलपरासीमा २८ गते यसखालको प्रशिक्षण तयारी गरिएको छ । त्यहाँ उपमहासचिव प्रदीप ज्ञवाली नेताहरू लीला गिरी, सरिता खनाल, राधाकृष्ण कंडेलले प्रशिक्षण दिनुहुनेछ । साउन २८ गते नै पाल्पामा हुने प्रशिक्षणमा केन्द्रीय सचिवद्वय गोकर्ण विष्ट र छविलाल विश्वकर्मा , नेताहरू दलबहादुर राना, ठाकुर गैरेलगायत सहभागी हुने कार्यक्रम तय भएको छ । 
गुल्मीमा २९ गते तय गरिएको प्रशिक्षणमा उपमहासचिव प्रदीप ज्ञवाली, सचिव गोकर्ण विष्ट, नेताहरू दिनेश पन्थी, राधाकृष्ण कंडेल सहभागी हुनुहुनेछ भने कपिलवस्तुमा पनि २९ गते नै यो कार्यक्रम हुने भएको छ । त्यहाँ उपाध्यक्ष सुवास नेम्वाङ, नेताहरू विमला घिमिरे, खिमलाल भट्टराई, विष्णु पन्थीलगायतले प्रशिक्षण दिने कार्यक्रम छ । 
अर्घाखाँचीमा साउन ३० गते प्रशिक्षणको तयारी गरिएको छ । त्यहाँ उपाध्यक्ष सुवास नेम्वाङ, सचिवद्वय टोपबहादुर रायमाझी, गोकर्ण विष्ट तथा नेताहरू चन्द्रबहादुर खड्का, बमबहादुर बिक, चेतनारायण आचार्यले प्रशिक्षण दिने कार्यक्रम तय भएको छ । 
पूर्वीरुकुममा ३० गते तय गरिएको प्रशिक्षणमा उपमहाचिव प्रदीप ज्ञवाली, नेताहरू खेममान खड्का, राधाकृष्ण कंडेल सहभागी हुनुहुनेछ भने सोही दिन दाङमा गरिने कार्यक्रममा उपाध्यक्ष युवराज ज्ञवाली, सचिव छविलाल विश्वकर्मा, नेता नरुलाल चौधरीलगायतले प्रशिक्षण दिनुहुने छ ।  
बाँकेमा ३१ गते तय गरिएको कार्यक्रममा उपाध्यक्ष युवराज ज्ञवाली, सचिव छविलाल विश्वकर्मा तथा नेताहरू लीला गिरी, लक्ष्मण ज्ञवाली, सूर्य ढकालले प्रशिक्षण दिनुहुने भएको छ । प्युठानमा पनि ३१ गते उपाध्यक्ष सुवास नेम्वाङ, सचिव टोपबहादुर रायमाझी, नेताहरू सूर्य थापा, बिमला घिमिरे, खिमलाल भट्टराईले सम्बोधन गर्नुहुने छ ।  
त्यसैगरी बर्दियामा भदौ १ गते सचिव छविलाल विश्वकर्मा तथा नेताहरू लीला गिरी, लक्ष्मण ज्ञवाली र रोल्पामा पनि  भदौ १ गते सचिव टोपबहादुर रायमाझी तथा नेताहरू खिमलाल भट्टराई, नबिन रोकाले प्रशिक्षण दिने कार्यक्रम तय गरी तयारी गरिएको एमाले लुम्बिनी प्रदेश कमिटीले जनाएको छ । 

cpnuml

 सचिवालय बैठक– निर्वाचन घोषणा पत्र मस्यौदा कमिटी र निर्वाचन परिचालन कमिटी गठन

च्यासल (ललितपुर) । नेकपा (एमाले) सचिवालयको ११ औं बैठक विहीबार पार्टी कार्यालय च्यासलमा अध्यक्ष केपी शर्मा ओलीको अध्यक्षतामा सम्पन्न भएको छ । 
बैठकले आगामी प्रतिनिधि सभा र प्रदेश सभा निर्वाचनका सन्दर्भमा महत्वपूर्ण निर्णय गरेको पार्टीका उपमहासचिव प्रचार तथा प्रकाशन विभाग प्रमुख पृथ्वी सुब्बा गुरूङले वताउनुभयो । 
बैठकपछि निर्णयहरूबारे जानकारी गराउँदै उपमहासचिव गुरूङले भन्नुभयो– ‘बैठकले पार्टीे स्थायी कमिटीको बैठक भदौ ७ गते, पोलिटव्यूरो बैठक भदौ ९ गते र केन्द्रीय कमिटी बैठक भदौ १० र ११ गते काठमाडौंमा बस्ने निर्णय गरेको छ ।’ 
साथै, सचिवालय बैठकले निम्नानुसार विभिन्न निर्णय गरेको छः
१. बैठकले अध्यक्ष केपी शर्मा ओलीको अध्यक्षतामा आठ सदस्यीय निर्वाचन घोषणापत्र मस्यौदा कमिटी गठन गरेको छ । कमिटीमा बरिष्ठ उपाध्यक्ष ईश्वर पोखरेल, उपाध्यक्षहरू अष्टलक्ष्मी शाक्य, रामबहादुर थापा, विष्णु पौडेल, महासचिव शंकर पोखरेल, उपमहासचिवद्वय प्रदीप ज्ञवाली र विष्णु रिमाल रहनुभएको छ । 
२.बैठकले अध्यक्ष केपी शर्मा ओलीको अध्यक्षतामा निर्वाचन परिचालन कमिटी गठन गरेको छ । जसमा केन्द्रीय कमिटी, केन्द्रीय निकाय तथा केन्द्रीय सल्लाहकार परिषद्का पदाधिकारी, प्रदेश कमिटीका अध्यक्ष, पार्टीको केन्द्रीय विभागका सचिवहरू र जनसंगठनका अध्यक्ष र महासचिवहरू रहनुभएको छ । 
३.बैठकले केन्द्रीय कमिटीमा मनोनयन गरेको छ । जसमा, जीवन गौतम (दाङ), बृजेशकुमार गुप्ता (कपिलबस्तु), धर्मदत्त देवकोटा (बारा), र अमृत राजवंशी –झापा) हुनुहुन्छ । त्यसैगरी, नवराज पौडेल (बाग्लुङ) लाई सल्लाहकार परिषद् सदस्यमा मनोनयन गरिएको छ । 
४. बैठकले विभिन्न विभागमा रिक्त रहेका सचिव मनोनयन गरेको छ । विभाग सचिवको जिम्मेवारी पाउनेहरूमा– सुन्दर भुसाल– उद्योग, बाणिज्य तथा आपूर्ति विभाग, विमल शर्मा– कृषि तथा पशुपन्छी विकास विभाग, सुरज अधिकारी– पुस्तकालय तथा अभिलेख विभाग, घनेन्द्र श्रेष्ठ– पर्यटन प्रबद्र्धन तथा नागरिक उड्डयन विभाग, मेघराज पौडेल– युवा तथा खेलकुद विभाग, एस.जी.शर्मा– भौतिक पूर्वाधार तथा यातायात व्यवस्था विभाग, सोभियत ढकाल– विपद् व्यवस्थापन तथा स्वयंसेवा विभाग, केवी उप्रेती–सहकारी तथा गरिबी निवारण विभाग, आरसी लामिछाने–भूमि व्यवस्था विभाग, सन्जीव रोकाहा– विज्ञान तथा प्रविधि विभाग, पुष्कर खाती–सामाजिक सुरक्षा विभाग र गजेन्द्र थपलिया शहरी विकास विभाग रहनुभएको छ । 
५.बैठकले केन्द्रीय सदस्यहरूको जिम्मेवारी हेरफेर गरेको छ । जस अनुसार, रामदयाल मण्डल– सहइन्चार्ज, मधेश प्रदेश, सरोज यादव– इन्चार्ज, महोत्तरी जिल्ला, प्रमोद नारायण यादव– सहइन्चार्ज, धनुषा जिल्ला, भीम कार्की– उपप्रमुख, भूमि व्यवस्था विभाग, कृष्ण थापा– इन्चार्ज कास्की जिल्ला रहनुभएको छ । 
६.बैठकले तीनवटा केन्द्रीय विभाग गठन गरेको छ । जसअनुसार, भौतिक पूर्वाधार तथा यातायात व्यवस्था विभाग, शहरी विकास विभाग र भूमि व्यवस्था विभाग रहेका छन् । 
७.बैठकले नीति अनुसन्धान प्रतिष्ठानको कार्यविधि र स्थानीय तह विकास विभागको निर्देशिका पारित गरेको छ । साथै, पार्टीमा नवप्रवेशीहरुलाई संगठनमा व्यवस्थापन गर्नेबारेमा निर्णय गरेको छ । नवप्रवेशीहरुलाई जिम्मेवारी दिने सम्बन्धमा प्रदेश कमिटीको सिफारिशमा केन्द्रीय कमिटीले आवश्यक निर्णय लिने छ । 

cpnuml

‘निर्वाहमुखी कृषि प्रणालीमा परिवर्तन ल्याउनुपर्छ’

काठमाडौं । नेकपा (एमाले) का अध्यक्ष केपी शर्मा ओलीले अहिलेसम्म नेपाली जनतालाई खाली गरिबी वितरण भएको वताउँदै अब सम्पन्नता वितरण गर्नेतर्फ जानुपर्ने वताउनुभएको छ । 
अध्यक्ष ओलीले कृषिको महत्व र देशको आत्मनिर्भरतालाई एमालेले बुझ्ने वताउँदै समृद्ध नेपाल निर्माणमा नै हरेक नागरिकको सम्पन्नता निर्भर रहेको र त्यसमा कृषि क्षेत्रको महत्वपूर्ण योगदान रहने विचार व्यक्त गर्नुभयो ।   
नेकपा (एमाले) को केन्द्रीय कृषि तथा पशुपन्छी विकास विभागद्वारा बुधबार राजधानीमा आयोजित ‘कमरेड केपी शर्मा ओलीसँग कृषि वैज्ञानिकहरू’ विषयक अन्तर्क्रिया कार्यक्रममा अध्यक्ष ओलीले उक्त विचार व्यक्त गर्नुभएको हो । 
अध्यक्ष ओलीले खाद्य सुरक्षा मानव अधिकारको पहिलो शर्त हो, भोको पेटले अरू कुरा सोच्न सक्दैन भन्नुहुँदै खाद्य उत्पादन पर्याप्त गर्न  निर्वाहमुखी र परम्परागत कृषि प्रणालीमा परिवर्तन गरेर  सघन कृषि प्रणालीमा जानुपर्ने वताउनुभयो ।  
‘हामीसँग जस्तो भूगोल, प्रकृति, हावापानी, उर्वरता भएको जमीन छ, त्यस अनुसार सही सदुपयोग गर्न सकेका छैनौं’ चर्चा गर्दै अध्यक्ष ओलीले भन्नुभयो– ‘हामीले कृषि वनतर्फ जाने कुरामा पनि ध्यान दिनुपर्छ । विश्वका विभिन्न मुलुकमा फलफूल, काजु, मसलाका जङ्गल देख्न पाइन्छ । हामीले पनि आँप जस्ता फलफूल लगायौं भने आम्दानी पनि हुन्छ, जङ्गल पनि हुन्छ ।’
हाम्रो कृषि प्रणालीलाई नयाँ विज्ञान र प्रविधिको प्रयोग गरेर न्यूनतम लागतमा अधिकतम प्रतिफल प्राप्त हुनेतर्फ जानुपर्ने र त्यो कृषि तथा पशुपालन दुवै क्षेत्रमा गर्नुपर्ने उहाँले वताउनुभयो । 
मानिसलाई बाँच्नका लागि खाना अनिवार्य रहेको र खाना सन्तुलित मात्र नभई स्वस्थ पनि हुनुपर्ने हुँदा अर्गानिक कृषि उत्पादनमा जानुुपर्ने चर्चा गर्दै अध्यक्ष कमरेडले भन्नुभयो– ‘अहिले हाम्रो माटो विरामी छ । पहिले विरामी माटोलाई स्वस्थ बनाउनुपर्छ । अलिकति पैसाको लोभले कृषि उत्पादनमा अनेक प्रकारका विषादी र रासायनिक मलको प्रयोग भइरहेको छ । यसबाट माटो मृत्युतर्फ गइरहेको र यसलाई जोगाउन नसके कामै नलाग्ने मरूभूमि हुने छ । हामीले माटोलाई मृत्युतर्फ जानबाट जोगाउनुपर्छ ।’

‘नेपालको ६० प्रतिशत जनसंख्या कृषि क्षेत्रमा रहेको र यो अचाक्ली धेरै हो, यसलाई छ गुणा घटाउनुपर्छ र उत्पादन चार गुुणाले बढाउनुपर्छ’ चर्चा गर्दै अध्यक्ष ओलीले भन्नुभयो– ‘राष्ट्रिय आम्दानीमा भने कृषि क्षेत्रको योगदानलाई घटाउनुपर्छ । उद्योग, व्यापार, सेवा क्षेत्रबाट बढाउनुुपर्छ ।’
कार्यक्रममा डा. विष्णुराज उप्रेतीले ‘नेपालको वर्तमान कृषिको अवस्था र सुधारका सम्भाव्य क्षेत्रहरू’ विषयमा कार्यपत्र प्रस्तुत गर्नुभएको  थियो । 
कार्यपत्र प्रस्तुत गर्दै डा. उप्रेतीले नेकपा (एमाले) का अध्यक्ष केपी शर्मा ओली नेतृत्वको सरकारका पालामा अगाडि सारिएको ‘समृद्ध नेपाल, सुखी नेपाली’ को राष्ट्रिय सङ्कल्पले कृषि, वन, उद्योग सबै क्षेत्रलाई मार्गदर्शन गरेको वताउनुभयो । 
उहाँले नेपालको विकासको आधार कृषि नै हो भन्दै कृषि क्षेत्रको विकासका लागि स्थानीय सरकारलाई बढी अधिकार दिनुपर्ने तथा प्रदेश र संघले सहजीकरण गर्नुपर्ने धारणा राख्नुभएको थियो । 
डा.उप्रेतीको कार्यपत्रमाथि प्रा. डा. कैलाशनाथ प्याकुरेल र डा. विमला राई पौडेलले टिप्पणी गर्नुभएको थियो । 
नेकपा (एमाले) केन्द्रीय कमिटीका सदस्य तथा विभाग प्रमुख गिरधारीलाल न्यौपानेको अध्यक्षतामा भएको अन्तर्क्रियामा कृषि मन्त्रालय, नेपाल कृषि अनुसन्धान परिषद्, कृषि विश्वविद्यालय र विभिन्न गैर सरकारी संघ संस्थामा रहेर लामो अनुभव बटुल्नुभएका कृषि वैज्ञानिक, कृषि विज्ञ, नीति निर्माता लगायतले आफ्ना सुझाव राख्नुभएको थियो ।  छलफलमा दुई दर्जन कृषि बैज्ञानिकले कृषि क्षेत्रको वर्तमान अवस्था र आगामी दिनमा नीतिगत रूपमा गर्नुपर्ने व्यवस्थाबारेमा ध्यानाकर्षण गराउनुभएको थियो ।  कार्यक्रममा प्रस्तुत कार्यपत्र र त्यसका आधारमा मौखिक तथा लिखित रुपमा आएका सुझावलाई एमाले कृषि तथा पशुपन्छी विभागले प्रतिवेदन तयार पारेर पार्टीमा बुझाउनेछ ।

 

cpnuml

‘वन उपयोगबाट समृद्धिको ढोका खोल्न सकिन्छ’

काठमाडौं । नेपाल कम्युनिस्ट पार्टी (एमाले) का अध्यक्ष केपी शर्मा ओलीले सामुुदायिक वनको सम्बन्ध ग्रामीण जीवनसँग जोडिएको बताउनुुभएको छ ।
सामुुदायिक वन दिवसको अवसरमा काठमाडौँमा आयोजित कार्यक्रमलाई सम्बोधन गर्दै अध्यक्ष ओलीले वनको संरक्षण तथा यसको उपयोगले समृद्धिको ढोका खोल्नसक्ने विश्वास व्यक्त गर्नुुभयो । 
‘वनले इन्धन, जनजीविका, विकासमा समेत भूमिका निर्वाह गरिरहेको छ । वनको सम्बन्ध अर्थतन्त्रसँग जोडिएकाले यसको संरक्षणमा उपभोक्ता, स्थानीय सरकार, राज्य र अन्तर्राष्ट्रिय समुुदाय अघि बढ्न आवश्यक छ । विश्वकै अर्थतन्त्रमा वनले ठूलो भूमिका निर्वाह गरेको छ ।’ 
नेपालको हरेक ग्रामीण जनजीवनसँग वन प्रत्यक्ष जोडिएकाले यसको संरक्षणले मात्रै थप क्षेत्रमा विकास गर्न सकिने उहाँले बताउनुुभयो । 
अध्यक्ष ओलीले भन्नुभयो– ‘पारिस्थितिक प्रणालीलाई जोगाउन वनले महत्वपूर्ण भूमिका खेल्ने भएकाले वन विनाको मानव जीवनको कल्पना समेत गर्न सकिँदैन । नेपालको बाहुल्यता ग्रामीण क्षेत्र भएको र कृषि तथा पशुुपालनको क्षेत्रको विकास गर्न वन निक्कै आवश्यक रहेको छ ।’
‘वनको विकास र संरक्षणले एउटा देश, समुुदायले मात्रै मुनाफा पाउने नभएर यसको सम्बन्ध पूरै पृथ्वीसँग रहेको छ । नेपाल ५८ मिटरदेखि सबैभन्दा अग्लो भागसम्म फैलिएको र हरेक भागमा वन रहेकाले जैविक विविधता जोगाउन यसले विशेष भूमिका खेल्ने छ ।’
पृथ्वी जोगाउन नेपालका सामुुदायिक वनले महत्वपूर्ण भूमिका निर्वाह गरिरहेको चर्चा गर्दै अध्यक्ष ओलीले वन विनाशको असरबारे नेपालीले राम्रोसँग बुुझेको बताउनुुभयो । 
नेपालको वनले विश्व समुुदायलाई समेत ठूलो गुन लगाएको बताउँदै वन विनाशले समाजका धेरै क्षेत्रमा असर पारेपछि यसको संरक्षणमा नेपालले निर्वाह गरेको भूमिकाको विश्वले प्रशंसा गर्ने गरेको उहाँको भनाई थियो । 
नेपालको ग्रामीण क्षेत्रमा पशु आहार तथा खाना पकाउने प्रमुख इन्धनको रूपमा दाउराको प्रयोग हुने गरेकोमा वन विनाशले सबै क्षेत्रमा असर पारेको उहाँले बताउनुुभयो ।
वन विनाशले ग्रामीण क्षेत्रमा विशेष गरेर महिलाले कष्ट पाएपछि सामुुदायिक वनको अवधारणा आएको स्मरण गर्दै सोही अवधारणले नेपालले वन संरक्षणमा निक्कै ठूलो सफलता मिलेको अध्यक्ष ओलीको भनाई थियो । 
सामुुदायिक वनको अभियानलाई अघि बढाउँदा नेपालका महिलाको नेतृत्व विकास समेत भएको उहाँले बताउनुुभयो । 
नेपालको वनमध्ये सालको वनको अझ धेरै महत्व भएकाले यसमाथि बैज्ञानिक वन व्यवस्थापनको नाममा गैर कानुुनी काम भएको र सामुुदायिक वनका नेतृत्वकर्ताले यसका बारेमा जानकारी गराएपछि सो कार्य आफूले रोकेको उहाँले वताउनुभयो ।

 

 

cpnuml

कार्यकर्ताका लागि भदौदेखि स्कुल सञ्चालन गरिने 

काठमाडौं । नेकपा (एमाले) केन्द्रीय स्कुल विभागले आफ्नो बार्षिक कार्ययोजना पारित गरेको छ । 
सोमबार पार्टी कार्यालय च्यासलमा बसेको बैठकले कार्ययोजना पारित गर्दै आगामी भदौ महिनादेखि नियमित रूपमा स्कुल चलाउने निर्णय गरेको उपमहासचिव तथा स्कुल विभाग प्रमुख प्रदीप ज्ञवालीले वताउनुभयो । 
प्रशिक्षण जनसंगठनबाट शुरू गर्न लागिएको छ । भदौ २ गतेदेखि पार्टी कार्यालय च्यासलमा दिइने प्रशिक्षणमा पहिलो लटमा अखिल नेपाल राष्ट्रिय स्वतन्त्र विद्यार्थी युनियन (अनेरास्ववियु) ले भाग लिन पाउने भएको छ । प्रशिक्षण तीनदिने हुने छ भने चालीस जनाको सहभागिता रहने छ । 
त्यसपछि राष्ट्रिय युवा संघका युवा कार्यकर्तालाई प्रशिक्षण दिने कार्यतालिका रहेको छ । क्रमशः सबै जनसंगठनलाई प्रशिक्षण दिइने र भदौभरमा सात\आठवटा जनसंगठनका पदाधिकारी तथा सदस्यहरूलाई प्रशिक्षण दिइसक्ने योजना रहेको उपमहासचिव ज्ञवालीले वताउनुभयो । 
प्रशिक्षणमा मार्क्सवादी दर्शन र पार्टी जीवनमा त्यसको प्रयोग, जनताको बहुदलीय जनवाद र समृद्ध नेपालको निर्माण, पार्टीको दशौं महाधिवेशनको कार्यदिशा, आजको सन्दर्भमा संगठनात्मक व्यवस्थापन र पार्टी जीवनमा सूचना प्रविधिको प्रयोग लगायतका विषयमा नेताहरूले प्रशिक्षण दिनु हुने छ । 
नेकपा (एमाले) मा स्थानीय निर्वाचन अघि र त्यसपछि पनि निरन्तर पार्टी प्रवेश चलिरहेको र अहिले पार्टीमा हजारौंको संख्यामा नवप्रवेशी रहनुभएकाले उहाँहरूलाई पनि पार्टीले प्रशिक्षण दिने भएको छ । 
उपमहासचिव ज्ञवालीले नवप्रवेशी लक्ष्यित प्रशिक्षण कार्यक्रम चलाउने निर्णय गरिएको वताउनुभयो । उहाँले भन्नुभयो– ‘नवप्रवेशी साथीहरूलाई एमालेको काम गर्ने शैली, संस्कार, मूल्य–मान्यता लगायत विषयमा प्रशिक्षित गर्ने योजना रहेको छ ।’ 
असोजदेखि दुई महिना सिङ्गो पार्टीपङ्ती निर्वाचनमा केन्द्रित हुने भएकाले विभागले आफ्नोे बार्षिक कार्ययोजना अन्तर्गतको निर्धारित कामलाई पुसदेखि पुनः निरन्तरता दिने छ । पुसपछि प्रशिक्षक प्रशिक्षण कार्यक्रम सञ्चालन गर्ने योजना रहेको छ । 
विभागले पाठ्यसामग्री तयारी र प्रकाशनलाई पनि कार्ययोजनामा राखेको छ । विभाग प्रमुख ज्ञवालीले पाँच\छवटा पुस्तक तयार भइसकेका र प्रकाशन गर्ने योजना रहेको बताउनुभयो । 

नेकपा (एमाले) को मोबाइल एप डाउनलोड गर्नुहोस् ।

cpnuml