काठमाडौं । आगामी निर्वाचनमा नेकपा (एमाले) का वरिष्ठ उपाध्यक्ष एवं काठमाडौं क्षेत्र नम्बर ५ का प्रतिनिधिसभाका उम्मेदवार ईश्वर पोखरेललाई ख्यातिप्राप्त राष्ट्रिय तथा अन्तर्राष्ट्रिय खेलाडीहरूले साथ दिने घोषणा गर्नुभएको छ । 
काठमाडौंको महाराजगञ्जमा शनिवार आयोजित कार्यक्रममा राष्ट्रिय तथा अन्तर्राष्ट्रिय खेलाडीहरू हरि खड्का, राकेश श्रेष्ठ, दीपक तामाङ, कमल तामाङ, सञ्जु महर्जन, अमर लामासहित सय जना भन्दा बढी खेलाडीले काठमाडौं क्षेत्र नम्बर ५ का प्रतिनिधिसभाका उम्मेदवार ईश्वर पोखरेल, प्रदेश सभा ५ (१) का दीपक निरौला र ५ (२) का नारायण सिलवाललाई साथ दिने घोषणा गर्नुभएको हो । 
‘खेलाडीहरूसँग ईश्वर पोखरेल’ नामको कार्यक्रममा खेलाडीहरूले एमालेको पालामा खेल क्षेत्रमा उल्लेख्य काम भएको भन्दै साथ दिने बताउनुभएको थियो । 
नेकपा (एमाले) का वरिष्ठ उपाध्यक्ष पोखरेलले एमाले सधै खेलाडीहरूको साथमा रहेको बताउनुभयो । 
एमालेको पालामा एउटा पालिका, एउटा खेलकुद ग्रामको सुरुवात गरेको बताउँदै पोेखरेलले  काठमाडौं क्षेत्र नम्बर ५ को  टोखा र बुढानीलकण्ठमा कभर्ड हल निर्माण गरिएको जानकारी दिनुभयो । 
भूकम्पपछि क्षतिग्रस्त दशरथ रंगशालाको पुनर्निर्माणदेखि देशभरका खेलाडीको बीमा कार्यक्रम र दक्षिण एसियाली खेलकुद प्रतियोगिता तथा ओलम्पिकका विजेता खेलाडीलाई मासिक भत्ताको व्यवस्था एमाले सरकारले गरेको उहाँले स्मरण गर्नुभयो ।  
एमालेको चुनावी अभियानमा साथ दिँदै नेपाली माइकल ज्याक्सनका नाममा चर्चित कलाकार रेमण्ड सापकोटाले पनि प्रस्तुति दिनुभएको थियो ।