झापा । नेकपा (एमाले) का अध्यक्ष केपी शर्मा ओलीले नेपालमा राजनीतिको नेतृत्व गर्ने नेता नै बिकाउ भएका कारण विकास सोचे अनुरुप अघि बढ्न नसकेको बताउनुभएको छ ।  
देश गरिव भए पनि नेता बिकाउ धन्दामा नलागेको भए चाँडै विकास योजनाले गति लिने थियो तर नेताहरु देश बनाउने भन्दा आफू बन्ने सोचले बिकाउ धन्दामा लागेका कारण मुलुकले दुःख पाएको बताउनुभयो । 
शनिबार झापाको दमक–९ स्थित कृष्ण मन्दिर चौकमा नेकपा (एमाले) र राप्रपाले संयक्त रुपमा आयोजना गरेको मतदातासँग उम्मेदवार कार्यक्रमलाई सम्बोधन गर्दै अध्यक्ष ओलीले उक्त धारणा राख्नुभएको हो । 
अध्यक्ष ओलीले भन्नुभयो– ‘नेकपा (एमाले) को नेतृत्वमा भएको सरकार ढाल्ने काम समेत यही नेता बिकाउ धन्दामा लागेकाले भएको हो । एमालेभित्र पनि यस्तो सोच राखेका नेता थिए । जस्ले मुलुक बनाउने भन्दा आफू कसरी बन्ने भन्ने आशयले पार्टीभित्र चरम गुटबन्दी र बिकाउमा लागेर पार्टी फुटाएर आफ्नै पार्टीको सरकार ढालेको प्रष्ट पार्नुभयो ।

‘२०७४ सालको निर्वाचनको परिणाम आएपछि नै तत्कालीन नेकपाको नेतृत्वमा सरकार बनाउनै नदिने खेल सुरु भयो । यो खेल सफल नभएपछि मेरो नेतृत्वमा सरकार गठन भयो । एमाले र माओवादी एकीकरणपछि पार्टीभित्र झन ठूलो समस्या आयो । सरकारलाई  काम गर्न नदिने, असफल बनाउने षडयन्त्रका बीच ४१ महिनामा नै सरकार अल्पमतमा पुर्याएर ढाल्ने काम भयो । त्यसपछि देश विकासको काम पूर्ण रुपमा ठप्प भयो ।’ 
विभिन्न चुनौतीका बीच पनि एमालेको सरकारले छोटो समयमा गरेको अस्वाभाविक विकास निर्माणले गर्दा खाने धन्दा बन्द हुने भयो भनी अनैतिक र अप्राकृतिक गठबन्धन बनाई अहिलेको सरकार भ्रष्टाचार र कमिशनखोरहरुको चङ्गुलमा चलिरहेको र मुलुकलाई असफलताको बाटोतिर अघि बढाइरहेको बताउँदै अध्यक्ष ओलीले यसलाई रोक्न पनि अब एमालेको नेतृत्वको सरकार निर्माण गर्न आवश्यक छ भन्नुभयो । 
उहाँले आफ्नो सरकार हुँदा अघि बढेका योजना समेत अहिले सबै कटौती गरेर सरकार कमाउने खाने धन्दामा लागेको, नातावाद, गुटबन्दी गर्नमै व्यस्त रहेको बताउनुभयो । 
उहाँले आफ्नो नेतृत्वको सरकारले पूर्वपश्चिम रेलमार्ग निर्माणको काम अघि बढाउँदा उडाएर हास्ने नेपाली काँग्रेसले नै अहिले आफ्नो घोषणापत्रमा जनतालाई झुक्याउन रेलमार्ग निर्माण गरिने लेखेको बताउनुभयो । अहिले रेलमार्गको जग्गाको मुआब्जा वितरणको प्रक्रिया अघि बढाउनै लाग्दा आफ्नो सरकार ढालेको बताउनुभयो । 
आफ्नो नेतृत्वको सरकारले विकासका ठूला–ठूला योजना अघि बढाएको, त्यस बाहेक मानिसका दैनिक जनजीवन सहज बनाउने, गरिव आवास कार्यक्रम अन्तर्गत लाखौँ विपन्नलाई घर निर्माण गरिएको, बालबालिका र बृद्धबृद्धालाई समेत संरक्षणका कार्यक्रम अघि बढाइएको अध्यक्ष ओलीले वताउनुभयो । 
अध्यक्ष ओलीले आजै कमल गाउँपालिकामा पनि कार्यकर्ता भेलामा सम्बोधन गर्नुभयो ।

अध्यक्ष ओलीले अदालतबाट प्रधानमन्त्री तोक्ने काम संसारमा कहीँ नभएको र अहिलेको सरकार बेथितिको सन्तान भएको बताउनुभयो । उहाँले वर्तमान सरकार अस्वाभाविक र अलोकतान्त्रिक ढङ्गले बनेको  बताउनुभयो ।
अध्यक्ष ओलीले भन्नुभयो, ‘लोकतन्त्रमा शक्ति पृथकीकरणको सिद्धान्त हुन्छ, हाम्रो सर्वोच्च अदालतले संविधान र शक्ति पृथकीकरणको सिद्धान्त मानेन, न्यायको गला रेट्यो, न्याय कुल्चियो, न्यायाधीशहरु नै भन्छन् न्यायालयमा सेटिङ भयो, न्यायाधीशहरु भ्रष्ट भए ।’
आगामी मंसिर ४ को चुनावबाट वर्तमान गठबन्धन र परमादेशी सरकारलाई हराएर जनादेशको सरकार बनाउनुपर्ने अध्यक्ष ओलीले बताउनुभयो । 
उहाँले भन्नुभयो–‘यो गठबन्धनलाई पराजित गरेर हामीले देश जोगाउनुपर्नेछ, देशको अस्तित्व, स्वाभिमान, देशको हितलाई जोगाएर विकासको बाटोमा हामी अगाडि बढ्नुपर्नेछ, यसका लागि मंसिर ४ गते एउटा अवसर आएको छ, गठबन्धन जस्तो विदेशीको दलाल, अरुको सुविधाका लागि काम गर्ने, कम्फरटेबल सरकार बनाउँछु भन्ने सुन्नुभएकै होला यस्तो गठबन्धनलाई पराजित गर्नुपर्नेछ ।’
अध्यक्ष ओलीले देशको हितको पक्षमा, राष्ट्रिय स्वाधीनता र स्वाभिमानको पक्षमा काम गर्ने सरकार बनाउनुपर्छ, त्यसका निम्ति आगामी निर्वाचनलाई  सदुपयोग गर्नुपर्छ भन्नुभयो । 
राप्रपा, जसपा र परिवार दललाई साथ लिएर एमालेको नेतृत्वमा सरकार बनाउने घोषणा पनि अध्यक्ष ओलीले गर्नुभयो । 
उहाँले भन्नुभयो, ‘एकल बहुमतको सरकार चाहिन्छ, त्यसले राप्रपा, परिवार दल र जसपालाई साथ लिएर चल्नेछ, देशभक्त शक्तिहरुलाई लिएर चल्नेछ र जनताका समस्यालाई समाधान गर्नेछ ।’
अध्यक्ष ओलीले सबैमा एकता र राष्ट्रियताको भाव जगाउने काम पनि आफूले गरेको बताउनुभयो । जातिजाति लडाउने अवस्थालाई आफूले सरकारले नेतृत्व गर्दा अन्त्य गरेको उहाँले बताउनुभयो ।