काठमाडौं । नेकपा (एमाले) ले बुद्ध एयरको स्थापना गरेर नेपालको हवाई सेवामा निजी क्षेत्रको प्रवेश, विकास र विस्तारमा महत्वपूर्ण योगदान गर्नुभएका व्यवसायी सुरेन्द्रबहादुर बस्नेतको निधनमा दुःख व्यक्त गरेको छ । 
अध्यक्ष केपी शर्मा ओलीले उहाँको परिवारलाई समवेदना सन्देश पठाई स्व. बस्नेतप्रति हार्दिक श्रद्धाञ्जली अर्पणका साथै शोक सन्तप्त परिवारमा गहिरो समवेदना व्यक्त गर्नुभएको छ । 
पार्टीका महासचिव शंकर पोखरेलले स्व. बस्नेतको परिवारलाई भेट्नु भई अध्यक्षको सन्देश हस्तान्तरण गर्नुभएको छ । साथै, उहाँका छोरा वीरेन्द्रबहादुर बस्नेत लगायत शोक सन्तप्त परिवारमा समवेदना व्यक्त गर्नुभयो । अध्यक्ष ओलीको सन्देशमा बुद्ध एयरका संस्थापक कार्यकारी अध्यक्ष बस्नेतले नेपालको हवाई सेवामा पुर्याउनुभएको योगदान अविस्मरणीय रहेको उल्लेख छ । साथै, सरकारी सेवा तथा निजी व्यावसायिक क्षेत्रबाट उहाँले देशका लागि गर्नुभएका काम अनुशरणीय रहेको पनि अध्यक्ष ओलीको सन्देशमा उल्लेख गरिएको छ । 
भोजपुरको दिङ्लास्थित साल्मामा जन्मनुभएका सुरेन्द्रबहादुर बस्नेतले सर्वोच्च अदालतको न्यायाधीश, प्रमुख निर्वाचन आयुक्त, प्रेस काउन्सिल नेपालको अध्यक्ष लगायत विभिन्न भूमिकामा रहेर राष्ट्रसेवामा महत्वपूर्ण भूमिका निर्वाह गर्नुभएको थियो । उहाँको यही पुस १० गते निधन भएको हो ।